Ya nace yo na Santo Domingo, Dominican Republic y iyo el menor na cuatro man hermano y hermana. Educao el de mio mayores y quierre sila que engranda kame junto con aquellos maga bueno y honesto gente. Cuatro año antes yo nace, el de mio mayores ya conoce con el maga misionario de Mormon. Por causa cay decente el mudada y tiene buen conducta el maga joven hombre, el diamon mayores ya decidi que queda miembro del Church of Jesus Christ of Latter-day Saints o el Mormon Church. Uno kame na maga primero quien ya queda miembro de ese religion.

Mientras ta engranda yo, tan enjoy yo participa na maga actividad na diamon iglesia y ta gusta yo que el Mormon ta dale importancia na vida de familia y maga principio na moral. Proud yo queda un Mormon y goal de mio queda un misionario.

Cuando 18 año yo, el de mio familia ya cambia na United States para puede yo entra escuela na un buen universidad. Maga un año despues, el de mio anti y angkol, quien maga Testigo de Jehova, ya anda visita kanamon na Florida. Ya invita sila kanamon atende na un convencion junto kanila. Bilib gayot yo cay el todo alla ta busca con el maga texto na diila Biblia y ta saca nota. Poreso, ya pidi yo un ballpen y papel y ya hace tambien con el cosa sila ta hace.

Despues del convencion, el de mio anti y angkol ya habla que ciendo quierre yo queda un misionario, puede sila ayuda conmigo estudia con el Biblia. Ya pensa yo que bonito quel cay aquel tiempo, mas familiar yo con el Book of Mormon contra con el Biblia.

Durante el diamon estudiada del Biblia por medio na telefono, el de mio anti y angkol pirmi ta anima conmigo que compara con el cosa yo ta creé na cosa el Biblia ta enseña. Quierre sila que iyo mismo examina con el verdad.

Manada maga enseñanza de Mormon el ya acepta yo pero gendeh yo asigurao si paquemodo el Biblia ta suporta con ese maga idea. Ya imbia conmigo el de mio anti el Noviembre 8, 1995, issue del magasin Awake! que yan publish el maga Testigo de Jehova que donde tiene cuanto maga articulo acerca na maga enseñanza de Mormon. Ya espanta yo que manada maga enseñanza del Mormon el gendeh yo familiar. Por causa con ese, ya chequia yo con el oficial website del Mormon para confirma si deverasan ba el cosa ya menciona na Awake! Deverasan el cosa ya habla na publicacion y mas ya confirma yo se cuando ya visita yo na maga museo del Mormon na Utah.

Desde antes, ta creé yo que el Book of Mormon y el Biblia gendeh tan contra na uno y otro. Pero cuando ya principia yo le enbuenamente con el Biblia, ya nota yo que tiene maga enseñanza del Mormon el gendeh harmonia na Biblia. Por ejemplo, na Ezequiel 18:4, el Biblia ta habla que el alma ta muri. Pero na Book of Mormon, na Alma 42:9, ta habla: “El alma nunca ta muri.”

Puera na diila maga cuestionable doctrina, ya sale yo destorbao na maga nacionalistico idea que ta enseña el maga Mormon. Por ejemplo, ta enseña sila que el jardin de Eden talla na Jackson County, Missouri, U.S.A. Y el maga lider del iglesia ta enseña que na futuro, hay rula el Dios na entero mundo por medio na gobierno del United States.

Ya pensa yo si cosa hay pasa na nacion onde yo ya nace—o na otro maga nacion—si hay sucede ya se. Un noche cuando ya llama conmigo el un joven Mormon con quien tan train para queda un misionario, ya menciona yo con ele acerca con ese. Franca yo ya pregunta con ele si conforme ba le man guerra con el igual Mormon de otro nacion. Espantao yo cuando ya habla le oo! Mas ya examina yo con el maga enseñanza que ta creé yo y ya consulta con el maga lider del Mormon Church. Ya habla sila conmigo que imposible para contesta con el de mio maga pregunta pero hay puede sila se entende si hay tiene mas aclaramiento.

Ciendo nuay yo gusta con el diila explanacion, mas ya examina yo con el de mio mismo cuerpo y con el razon si porque yo quierre queda un misionario de Mormon. Ya realiza yo que el un razon si porque yo quierre queda un misionario amo cay quierre yo ayuda con el otro gente. El otro razon amo cay quierre yo que respeta conmigo el otro. Pero si acerca con Dios, nuay yo tanto cosa sabe acerca con ele. Maskin pa manada beses yo ya estudia con el Biblia de antes, nuay yo tanto dale valor con este. Nuay yo cosa sabe acerca na proposito del Dios para na tierra o para na maga gente.

Por medio na de mio estudiada del Biblia junto na maga Testigo de Jehova, ya puede yo aprende si cosa el nombre del Dios, si cosa hay pasa con el maga muerto, si cosa el papel de Jesus na cumplimiento del proposito del Dios y manada pa otro. Alegre yo cay ta queda yo mas familiar con el Biblia y ta puede habla con otro el maga verdad que ya aprende yo. Desde antes, ta creé yo que ta existi el Dios pero ahora, ta puede yo converza con ele por medio na rezo como el de mio de con todo cerca Amigo. Ya bautiza yo como uno del maga Testigo de Jehova del Julio 12, 2004 y seis meses despues, ya principia yo sirvi full-time na ministerio.

Por cinco año, ya sirvi yo na world headquarters del maga Testigo de Jehova na Brooklyn, New York. Bien alegre yo cay ya puede yo ayuda na produccion del Biblia y del maga publicacion que base na Biblia para na bien del millones na entero mundo y puede continua ayuda con otro aprende acerca con Dios.