Asegun na Biblia, el todo gente pecador. Ya hereda kita con el tendencia que comete pecado na primer gente, si Adan. Poreso, tiene vez ta puede kita hace mal cosas y posible na uliji, tan mahay kita. Ciendo ya muri para kanaton el Anak del Dios, si Jesucristo, ya paga le con el diaton maga pecado. Por medio na de suyu rescate, ya queda posible que puede perdona kanaton. Ese amo un regalo estaba con Dios.—Le con el Roma 3:23, 24.

El cuanto ya comete maga serioso culpa y ta pensa sila si perdona pa ba kanila el Dios. Maka-alegre cay el Palabra del Dios ta habla: “El sangre del disuyo Anak si Jesus ta limpia todo el diaton maga pecado.” (1 San Juan 1:7, El Nuevo Testamento na Chavacano) Preparao si Jehova perdona maskin con el maga serioso culpa si deverasan kita ta arripinti.—Le con el Isaias 1:18.

Si quierre kita que perdona kanaton si Dios Jehova, necesita kita aprende acerca con ele—entende con el de suyu maga manera, consejo y si cosa le ta pidi kanaton. (Juan 17:3) Ta perdona gayot si Jehova con aquellos quien ta arripinti y ta pricura hace maga cambio.—Le con el Maga Actividad 3:19.

Gendeh dificil para ganá el favor del Dios. Ta entende si Jehova con el diaton maga limitacion. Lastimoso le y bueno. Gendeh ba el de suyu pagka-amable y pagka-bueno ta manda move contigo para aprende pa mas acerca si paquemodo tu hace alegre con ele?—Le con el Salmo 103:13, 14.