Desde bata yo, quierre-quierre yo con el creacion. Alegre de mio familia anda man outing na monte y na maga bonito lake que puede mira alrededor na lugar onde kame ta queda na ciudad de Jyväskylä, na Central Finland. Quierre-quierre tambien yo maga animal. Cuando bata yo, quierre yo abraza con el todo gato y perro que ta puede yo mira. Mientras ta engranda yo, tan triste yo mira que el maga gente ta abusa con el maga animal. Na uliji, ya entra yo na un organizacion que ta protege con el maga animal y ya puede yo man junto con el maga gente quien igual conmigo.

Manada kame cosa ya hace para ayuda protege con el maga animal. Ya distribui kame maga informacion y ya hace maga protesta contra na maga tienda que ta vende maga producto que hacido de pelo de maga animal y maga laboratorio que tan experimento con el maga animal. Gane, ya forma kame un nuevo organizacion para protege con el maga animal. Por causa cay por demas el maga accion que ta hace kame para na diamon campaña, manada beses kame ta tiene problema contra na autoridad. Cuanto beses ya conmigo ya arresta y ya lleva na corte.

Ta man lingasa yo gendeh lang con el maga animal sino con el otro maga problema tambien na mundo. Nuay dura, ya suporta tambien yo na cuanto maga organizacion igual con el Amnesty International y Greenpeace. Ya hace yo el todo para suporta con el diila maga actividad. Ya defende tambien yo con el derecho de aquellos maga pobre, nuay comida y otro pa maga gente quien necesita ayuda.

Pero, hinay-hinay ya puede yo realiza que gendeh yo puede cambia con el mundo. Maskin pa aquel maga organizacion ya puede solva con el cuanto maga diutay problema, nuay siempre perde el maga grande problema y dol ya queda pa este mas grabe. Dol bajo na poder del maldad el entero mundo y nuay maskin quien tiene queber na maskin cosa. Ya sinti yo que nuay yo cosa puede hace.

Por causa con este, triste yo. Poreso, ya pensa yo con Dios y con el Biblia. Ta man Bible study yo de antes junto con el maga Testigo de Jehova. Maskin pa sabe yo que maga buen gente sila cay ta trata sila conmigo enbuenamente y ta dale mira personal interes, gendeh pa yo preparao hace maga cambio na de mio vida. Pero, otro este ahora.

Poreso ya saca yo con el de mio Biblia y ya principia le con este. El cosa yo ya le, ya dale gayot conmigo comforta. Ya puede yo nota manada texto na Biblia que ta enseña kanaton que trata enbuenamente con el maga animal. Por ejemplo, el Proverbio 12:10 ta habla que el “maga buen gente ta cuida con el diila maga animal.” (Good News Translation) Ya puede tambien yo entende que gendeh el Dios el causa del maga problema na mundo. Sino, el diaton maga problema ya queda mas grabe cay mayoria del maga gente gendeh ta obedece con ele. Bien alegre gayot yo cuando ya puede yo aprende acerca na amor y paciencia de Jehova.​—Salmo 103:8-14.

Na aquel mismo tiempo, ya incuntra yo un coupon para na libro What Does the Bible Really Teach? y yan request yo con ese. Nuay dura, un man maridable Witness el ya anda conmigo quien ya ofrece Bible study y ya acepta yo con ese. Ya principia tambien yo atende na maga miting na Kingdom Hall. Como resulta, el verdad na Biblia ya principia crici na de mio corazon.

Na ayuda del Biblia, ya puede yo hace manada cambio. Ya descanza yo con el de mio vicio de pumada y tomada. Ya arregla yo con el de mio ichura y nuay mas usa maga mal palabra. Y ya aprende yo que debe yo respeta con el autoridad. (Roma 13:1) Ya deja tambien yo con el de mio imoral manera de vida, un cosa que nuay yo queber de antes.

El de con todo dificil cambio para conmigo amo tiene justo mirada na organizacion de gente y nuay se dayun-dayun sucede. Del primero ta sinti yo que si man resign yo, ta man traidor yo con este maga organizacion. Pero, ya entende yo que el Reino del Dios lang el puede solva con el maga problema na mundo. Poreso ya hace yo el todo para suporta con ese Reino y ayuda con otro aprende acerca con ese.​—Mateo 6:33.

Como un activista, ta pensa yo que tiene lang dos clase de gente​—bueno o malo. Preparao yo hace cosa contra con aquellos con quien yo ta mira como mal gente. Pero ya puede conmigo ayuda el Biblia para gendeh mas odia con otro. Sino, ta pricura yo dale mira Cristiano amor con todo gente. (Mateo 5:44) El uno na maga manera que ta dale yo mira este amor amo por medio na predicacion del buen noticia acerca na Reino del Dios. Alegre yo mira si paquemodo el predicacion del buen noticia ta puede ayuda con el maga gente para tiene paz, alegria y deverasan esperanza.

Ya tiene yo paz na pensamiento cay ta confia yo con Jehova que hay solva le con el todo problema. Convincido yo que ele, como el diaton Creador, gendeh permiti que maltrata con el maga animal y maga gente hasta para cuando. Gendeh tambien le permiti que hay destroza el gente con el diaton bonito tierra. Y por medio na de suyu Reino, gendeh dura hay compone le con el todo destrozo que ya hace el maga gente. (Isaias 11:1-9) Bien alegre gayot yo cay ya puede yo sabe con ese maga verdad y ya puede ayuda con otro para dale mira fe con ese maga promesa. Ya puede yo realiza que gendeh mas yo necesita cambia con el mundo.