Ya engranda yo na Warialda, un lugar na New South Wales. Na ese lugar, siembrador el maga gente y ta cuida maga carnero y vaca. Limpio na ese lugar y nuay tanto caso de crimen.

Iyo el mayor na diez man hermano. Na edad de 13 año, ya principia yo trabaja para ayuda mantene con el diamon familia. Ciendo nuay yo acaba entra escuela, ya trabaja yo como siembrador. Na edad de 15, ya trabaja yo na un rancho como el quien tan train con el maga caballo.

Alegre yo na de mio trabajo na rancho y con el maga cosas que ta puede yo mira alrededor. Ta arde yo fuego si de noche y mientras ta sinta, alegre yo mira con el luna y con el maga estrellas, y ta puede ole con el fresco aire. Ta acorda yo aquel tiempo que ta pensa yo que tiene gayot Quien ya crea con el todo maga bonito cosas que ta puede yo mira. Pero mientras ta hace yo se trabajo, tiene tambien maga mal influencia alrededor conmigo. Pirmi yo ta habla maga mal palabra y facil lang tene cigarillo. Nuay dura, yan anad ya yo puma y habla mal palabra.

Cuando ya queda yo 18 año, ya cambia yo na Sydney. Ya pricura yo queda soldao pero nuay conmigo acepta cay nuay yo acaba entra escuela. Ya tiene yo trabajo na Sydney y ya esta alla por un año. Durante na ese tiempo, ya puede yo conoce por primer vez con el maga Testigo de Jehova. Ya acepta yo con el diila invitacion que atende na diila maga miting y ya puede dayun yo nota que verdad el diila enseñanza.

Pero nuay dura despues quel, ya decidi yo bira na monte. Ya guinda yo na Goondiwindi, Queensland. Ya incuntra yo trabajo alla, ya casa y el umalin, ya principia yo queda tomador.

Tiene kame dos bilug anak hombre del de mio mujer. Cuando ya tiene yo maga anak, ya principia yo pensa enbuenamente si cosa hay sucede na de mio vida. Ya acorda yo con el cosa yo ya oi na miting del maga Testigo de Jehova na Sydney y ya decidi yo que necesita yo hace maga cambio.

Ya incuntra yo un daan issue del El Torre de Guardia que donde tiene address del Australia branch office del maga Testigo de Jehova. Ya escribi yo kanila carta para pidi ayuda. Como resulta, tiene un amable Witness quien ya anda visita conmigo. Nuay dura, yan Bible study kame.

Mientras ta estudia yo con el Biblia, ya puede yo mira que necesita yo hace maga grande cambio na de mio vida. El un texto que ya tiene gayot grande efecto conmigo amo el 2 Corinto 7:1 (El Nuevo Testamento na Chavacano). Ta anima kanaton na este texto que “limpia kita todo mancha na diaton cuerpo.”

Ya decidi yo descanza con el de mio vicio puma y toma por demas alcoholico tomada. Dificil hace con ese maga cambio cay ya dura ya se de mio maga vicio. Pero, determinao yo que vivi na manera que aceptable con Dios. Ya puede gayot ayuda conmigo cuando ya aplica yo con el principio na Roma 12:2: “No ustedes sigui con el maga custumbre de este mundo, sino cambia el de ustedes maga custumbre por medio del de ustedes maga pensamiento nuevo.” Ya realiza yo que para puede yo quita con el de mio maga vicio, necesita yo cambia con el de mio pensamiento y mira con ese maga cosas igual na mirada del Dios​—como peligroso. Por medio na de suyu ayuda, ya puede yo quita con el de mio maga vicio.

Pero, el de con todo dificil amo el de mio tendencia habla maga mal palabra. Sabe yo con el consejo del Biblia na Efeso 4:29: “No ustedes habla malo.” Maskin pa ansina, nuay yo dayun puede descanza habla maga mal palabra. Ya puede ayuda conmigo cuando ya medita yo con el cosa ya habla na Isaias 40:26. Acerca na maga estrellas na cielo, el versiculo ta habla: “Man tanga ustedes na cielo y mira. Quien ya crea con este maga cosas? Ele el quien ta guia kanila como maga soldao y ta cunta le con el cada uno kanila; ta llama le kanila na diila nombre. Por causa na de suyu grande energia y incomparable poder, nuay ni uno kanila el ya perde.” Ya pensa yo, si tiene el Dios poder para crea con el universo​—que quierre-quierre yo mira​—asigurao puede tambien le dale fuerza conmigo para hace maga cambio na vida. Por medio na rezo y esfuerzo, hinay-hinay yo ya puede controla con el de mio converzada.

Como trabajador na rancho, nuay yo tanto oportunidad converza con otro cay umpoco lang el maga gente alla onde yo ta trabaja. Pero por medio na training que ya ricibi yo na maga miting del maga Testigo de Jehova, ya aprende yo si paquemodo converza con otro. Puera con ese, ya acerta tambien yo predica el buen noticia acerca el Reino del Dios con otro gente.​—Mateo 6:9, 10; 24:14.

Ya dura ya yo alegre ta sirvi como anciano na congregacion. Un grande privilegio para conmigo que puede ayuda con el maga hermano y hermana. Pero el de con todo grande bendicion para conmigo amo que puede yo sirvi junto con el de mio fiel y amable mujer y con el diamon maga anak.

Ta rindi yo gracias con Jehova cay ya enseña le conmigo maskin nuay yo acaba entra escuela. (Isaias 54:13) Tan uyun gayot yo con el cosa ya habla na Proverbio 10:22: “El bendicion de Jehova amo el ta hace rico con el un persona.” Iyo y el de mio familia alegre aprende mas acerca con Jehova na futuro y sirvi con ele hasta para cuando.