El mundo ahora lleno de pornografia. * Puede con este incuntra na maga advertisement, salida, musica, magasin, television, video game, gadget, website y ahora na maga online messaging app. Ta sale que comon ya el pornografia. Mas manada gente ya ahora el ta mira con este si compara de antes.​—Mira con el cajon “ Maga Informacion Acerca na Pornografia.”

Ta tiene tambien cambio na pornografia. Si Professor Gail Dines ya escribi: “Ya queda mas grabe el maga letrato ahora. Gane, el cosa ta considera que bastos de antes comon ya lang ahora.”

Cosa el de tuyu mirada con este? Peligroso ba el pornografia o gendeh? Si Jesus ya habla: “El pono bueno ta dale maga fruta bueno, pero el pono malo ta dale maga mal fruta.” (Mateo 7:17, El Nuevo Testamento na Chavacano) Cosa el fruta o resulta del pornografia? Para sabe el contestacion, considera kita con el cuanto pregunta acerca na pornografia.

SI COSA TA HABLA EL MAGA EXPERTO: Bien maka-addict el pornografia y el cuanto researcher y therapist ta habla que igual ese na droga.

Si Brian, * quien yan addict na pornografia na Internet, ya habla: “Nuay cosa ta puede sangga conmigo. Dol aquel yo yan droga. Ta tembla yo y ta duele gayot el de mio cabeza. Ya pricura yo descanza hace con este pero maskin cuanto año ya el ya pasa, addict siempre yo.”

Mas mucho del maga gente quien ta mira pornografia ta esconde con este vicio. Poreso, gendeh maka-estraña que el manada kanila ta sinti que solo sila, ta sinti huya, lingasa, depression y rabia. Gane, el cuanto quierre pa man suicide. “Ta pensa lang yo con el de mio mismo cuerpo y ya queda desperao,” ya habla si Serge, quien tan download pornografia na de suyu cellphone halos todo el dia. “Ya sinti yo nuay valor, culpable, solo y dol nuay mas yo cosa puede hace. Nuay yo pidi ayuda cay ya tiene gayot yo huya y ya tiene miedo.”

Puede tiene negativo efecto na un persona si ya puede le mira pornografia maskin unrato lang y gendeh intencional. Si Dr. Judith Reisman, un researcher acerca na pornografia, ya habla adelante del un U.S. Senate committee: “El maga letrato de pornografia ta esta na utuk del un persona, y dificil o imposible pa gane con este ulvida.” Si Susan, 19, quien ya puede mira pornografia na maga website, ya habla: “Gendeh yo ta puede ulvida con este maga letrato. Y tiene vez, bigla lang yo ta puede acorda con ese. Dol imposible yo con este puede quita.”

ACORDA: El maga gente quien ta mira pornografia ta queda esclavo de este y peligroso este para kanila.​—2 Pedro 2:19.

SI COSA TA HABLA EL MAGA EXPERTO: “Tan separtajan el man maridable y ta bungca el familia por causa na pornografia.”​—The Porn Trap, de Wendy y Larry Maltz.

El pornografia peligroso na matrimonio y familia cay

• Ta hace este perde con el confianza, cerca relacion y amor entre na man maridable.​—Proverbio 2:12-17.

• Ta causa este con el un persona para pensa lang con el de suyu mismo cuerpo y ta queda le lejos y gendeh mas alegre na de suyu marido o mujer.​—Efeso 5:28, 29.

• Ta hace este fuerte con el maga peligroso sexual deseo.​—2 Pedro 2:14.

• Ta causa este con el un persona para forza con el de suyu marido o mujer que man sex na gendeh justo manera.​—Efeso 5:3, 4.

• Ta causa este con el un persona para traiciona con el de suyu marido o mujer na pensamiento man o accion.​—Mateo 5:28.

El Biblia ta habla con el maga man maridable que gendeh sila “debe traiciona” con uno y otro. (Malaquias 2:16) El adulterio puede destroza con el matrimonio y resulta na separacion y divurcio. Tiene tambien este mal efecto na maga anak.

El pornografia tiene tambien directa mal efecto na maga anak. Si Brian que ya menciona enante, ya habla: “Cuando maga diez año yo, mientras ta juga kame, gendeh intencional ya puede yo mira con el maga magasin de pornografia del de mio tata. Ya principia yo mira con este pa-secreto maskin pa gendeh yo ta entende si porque yo quierre mira con ese maga letrato. Ya continua yo con ese vicio hasta ya queda yo adulto.” Asegun na maga research, el maga pornografia puede influencia con el maga jovenes que man sex maskin bien joven pa, man sex na diferente maga gente, queda brutal si tan sex y tene maga problema na pensamiento y na emocion.

ACORDA: El pornografia amo igual na veneno que ta destroza con el familia y ta resulta na tristeza y dolor.​—Proverbio 6:27.

EL PALABRA DEL DIOS TA HABLA: “Mata na de ustedes cuerpo . . . el maga immoralidad, maga cuchinadas, maga deseo y maga sentimiento malo y maga ambrentada, cay esos igual como ta adora con el maga dios-dios.”​—Colosa 3:5.

Si Dios Jehova * ta odia con el pornografia. Gendeh este cay contra le na sex. Ya dale le kanaton este abilidad y quierre le que el maga man maridable usa con este para queda cerca y hace alegre con uno y otro, y para tene maga anak.​—Santiago 1:17.

Si ansina, porque kita puede habla que ta odia gayot si Jehova con el pornografia? Considera con este cuanto razon.

• Sabe le que el pornografia puede destroza con el diaton vida.​—Efeso 4:17-19.

• Ta ama le kanaton y quierre le que protege kanaton na peligro.​—Isaias 48:17, 18.

• Si Jehova quierre preserva con el maga matrimonio y familia.​—Mateo 19:4-6.

• Quierre le que queda kita limpio na moral y respeta con el derecho del otro.​—1 Tesalonica 4:3-6.

• Quierre le que usa kita con el diaton abilidad para tene anak na limpio y decente manera.​—Maga Hebreo 13:4.

• Sabe si Jehova que el pornografia ta causa con el un persona para pensa lang con el de suyu mismo cuerpo y ta reflecta con el mirada de Satanas na sex.​—Genesis 6:2; San Judas 6, 7.

ACORDA: El pornografia ta destroza con el relacion del un gente con Dios.​—Roma 1:24.

Pero, bien grande el compasion de Jehova para con aquellos quien ta pricura descanza mira pornografia. El Biblia ta habla: “Si Jehova lastimoso y tiene compasion, gendeh pronto rabia y abundancia de amor leal. Cay sabe le si paquemodo kanaton ya forma y ta acorda que polvos kita.” (Salmo 103:8, 14) Ta invita le con el maga humilde que pidi con ele ayuda para puede sila “recivi el lastima y encontra el gracia cuando necesita [sila] el ayuda.”​—Maga Hebreo 4:16; mira con el cajon “ Si Paquemodo Puede Quita con el Vicio de Pornografia.”

Bien manada individual el ya acepta con el ayuda del Dios. Efectivo ba el de suyu ayuda? Nota si cosa ya habla el Biblia acerca con el cuanto quien ya puede quita con el diila mal vicio: “Ya queda ustedes limpio, . . . y noay culpa por medio del Nombre del Señor Jesucristo y del Espiritu del diaton Dios.” (1 Corinto 6:11) Igual con apostol Pablo, ese maga persona puede habla: “Tiene yo fuerza para enfrenta todo cosas por causa con ele quien ta dale conmigo poder.”​—Filipo 4:13, NWT.

Si Susan quien ya puede quita con el de suyu adiccion na pornografia, ya habla: “Si Jehova el solamente quien puede ayuda contigo para quita con este vicio. Si pidi tu con el de suyu ayuda y guia, puede tu tene buen amistad con ele. Gendeh gayot le contigo falla.”