“Despues del muerte, el maga alma de aquellos quien ya culpa que nuay perdona el Dios ta guinda na infierno, donde ta experiencia sila con el castigo de infierno, ‘el fuego eterno.’ ” (Catechism of the Catholic Church) El cuanto maga religioso lider ta habla que aquellos na infierno bien separtao con Dios.

“El alma que ta comete pecado hay muri.” (Ezequiel 18:4) El maga muerto “no sabe ni nada.” (Eclesiastes 9:5) Si el alma ta muri y no sabe ni nada, paquemodo este sufri na “fuego eterno” o sabe que ya separta este con Dios?

Na Biblia, el Hebreo y Griego maga palabra que yan translate “infierno” ta refiri con el sepultura del maga gente. Por ejemplo, cuando ya sufri si Job un duele enfermedad, ya reza le: “Ojala hay esconde tu conmigo na Sepultura [“na infierno,” Douay-Rheims Version].” (Job 14:13) Quierre si Job descanza, gendeh na un lugar de sufrimiento o separtao con Dios sino na sepultura.

Si el Dios brutal, gendeh gayot kita quierre queda de suyu amigo y gendeh gayot kita con ele ama. “Desde diutay iyo, ya enseña ya conmigo el doctrina de infierno,” ya habla el un mujer que si Rocío, quien ta queda na Mexico. “Tiene gayot yo miedo y gendeh yo ta pensa que el Dios tiene maga buen calidad. Ya pensa yo que rabiao le y bien istricto.”

El maga claro enseñanza na Biblia acerca na maga juzgamiento del Dios y el condicion del maga muerto ya cambia con el mirada de Rocío con Dios. “Ya sinti yo que ya libra conmigo y ya dale gayot se conmigo alivio,” ya habla le. “Ya principia yo confia que el Dios quierre si cosa el de con todo bueno para kanaton, que ta ama le kanaton y puede yo ama con ele. Igual le na un tata quien ta agarra el mano del de suyu maga anak y quierre el de con todo bueno para kanila.”—Isaias 41:13.

Manada el ta pricura queda religioso por causa na miedo na infierno. Pero, el Dios no quierre que sirvi tu con ele por causa cay ta tiene tu miedo con ele. Sino, si Jesus ya habla: “Ama con el Señor, el dituyo Dios.” (Marcos 12:29, 30) Mas pa, si ya realiza kita que el Dios gendeh ta actua brutal ahora, puede tambien kita confia con el de suyu maga juzgamiento na futuro. Igual na amigo de Job que si Elihu, con confianza kita puede habla: “Imposible que el verdadero Dios hay hace cosa malo, ni el Todopoderoso hay hace cosa gendeh justo!”—Job 34:10.