EL PINAKA-TEMA | HACE LEJOS CON EL MAGA GENTE CON DIOS
El Imbusterias que el Dios Misterioso
SI COSA TA CREÉ EL MANADA
El tres de con todo grande Cristiano religion que “el Romano Catolicismo, Eastern Orthodoxy y Protestantismo ta creé que tiene un Dios na tres Persona: el Dios Tata, Dios Anak y Dios Espiritu Santo. Pero, ya habla sila que gendeh sila ta creé na tres dios sino este tres persona amo un Dios.”—The New Encyclopædia Britannica.
EL VERDAD ESTABA NA BIBLIA
Si Jesus, el Anak del Dios, nunca ya clama que igual le con el de suyu Tata o un persona sila. Sino, ya habla le: “Ta anda yo con el Tata, cay el Tata mas importante que conmigo.” (Juan 14:28) Ya habla tambien le con el uno del de suyu maga siguidores: “Ay subi ya yo con el dimio Tata y de ustedes Tata, el dimio Dios y de ustedes Dios.”—Juan 20:17.
El Espiritu Santo o sagrao espiritu gendeh un persona. El maga Cristiano del primer siglo “ya queda lleno del Espiritu Santo” y si Jehova ya habla: “Ay vacia yo mi Espiritu con todo el maga gente.” (Maga Actividad 2:1-4, 17) El sagrao espiritu gendeh parte del Trinidad. Este el activo fuerza del Dios.
SI PORQUE ESTE IMPORTANTE
El Trinidad, ya explica el dos Catholic scholar que si Karl Rahner y Herbert Vorgrimler, “gendeh posible entende si nuay el ayuda del Dios y maskin pa na de suyu ayuda, gendeh siempre posible que entende gayot con ese.” Puede ba gayot tu ama con el un persona con quien imposible tu conoce o entende? Entonces, el doctrina de Trinidad amo un sanggadura para conoce y ama con Dios.
Si Marco que ya menciona del ya pasa articulo ya mira con el Trinidad como un sanggadura. “Ya pensa yo que el Dios no quierre manda conoce si quien gayot le,” ya habla le, “y ta hace se con ele mas lejos, misterioso y tormento para atraca.” Pero, “el Dios gendeh un Dios de desorden.” (1 Corinto 14:33) Nuay le esconde kanaton si quien gayot le. Quierre le que conoce kita con ele. Si Jesus ya habla: “Came sabe si con quien came ta adora.”—Juan 4:22.
“Cuando ya aprende yo que el Dios gendeh parte del Trinidad,” ya habla si Marco, “ya puede ya yo tene un personal relacion con ele.” Si ta mira kita con Jehova como un real Persona en vez de un misterioso estranjero, mas facil kita ama con ele. “El quien gendeh ta ama no conoce con Dios,” el Biblia ta habla, “cay el Dios amor.”—1 San Juan 4:8.
