“Gendeh kame tan uyun que tiene nombre el Dios y si tiene, cosa posible ese nombre.”—Professor David Cunningham, Theological Studies.

El Dios ya habla: “Iyo si Jehova. Ese el de mio nombre.” (Isaias 42:8) El Jehova amo un Hebreo nombre que quierre decir “Ta Causa Le Para Queda.”—Genesis 2:4, footnote.

Quierre si Jehova que usa kita con el de suyu nombre. “Llama con el de suyu nombre,” ya habla el Biblia. “Manda sabe con el maga gente el de suyu maga trabajo! Declara que ya hace alto con el de suyu nombre.”—Isaias 12:4.

Ya usa si Jesus con el nombre del Dios. Na rezo, ya habla si Jesus con Jehova: “Ya manda yo canila [maga dicipulo de Jesus] conoce el de Uste Nombre y ay manda pa yo canila conoce.” Porque si Jesus ya manda conoce con el nombre del Dios na de suyu maga dicipulo? Ya continua le: “Para el amor, que Uste [el Dios] ya dale conmigo, ay esta canila y yo ay esta unido canila.”—Juan 17:26.

“El un gente quien no sabe el nombre del Dios gendeh deverasan conoce con ele como un persona,” ya escribi el un theologian, si Walter Lowrie, “y gendeh le puede ama con ele, si conoce lang le con ele como un fuerza y gendeh como un persona.”

El un hombre que si Victor ta anda na iglesia cada semana pero gendeh le ta sinti que deverasan le conoce con Dios. “Despues, ya sabe yo que el nombre del Dios amo Jehova y igual quel como ya conoce yo con ele por primer vez,” ya habla le. “Ya sinti yo que dol ya conoce yo con el un Persona con quien manada cosas ya yo sabe. Ya mira yo con ele como un real Persona y ya tene buen amistad con ele.”

Si Jehova ta atraca con el maga gente quien ta usa con el de suyu nombre. Acerca “con aquellos quien ta medita con el de suyu nombre,” el Dios ya promete: “Hay dale yo mira compasion kanila, igual con el un gente quien ta dale mira compasion con el de suyu anak quien ta sirvi con ele.” (Malaquias 3:16, 17) Ta bendici tambien el Dios con aquellos quien ta llama con el de suyu nombre. El Biblia ta habla: “Todo aquellos quien ta reza na Nombre del Señor [de Jehova] ay salva.”—Roma 10:13.