Tormento para na cuanto gente que ama con Dios. Para kanila, el Dios dol lejos, imposible para entende o malo pa gane. Considera si cosa ya habla el cuanto:

• “Ya reza yo con Dios que ayuda conmigo pero ya sinti tambien yo que lejos le y tormento para atraca. Para conmigo, el Dios amo un persona que nuay sentido.”—Marco, Italy.

• “Maskin pa bien quierre yo sirvi con Dios, dol bien lejos le. Pensaba yo, un malo Dios le quien ta castiga lang kanaton. Gendeh yo ta creé que lastimoso le.”—Rosa, Guatemala.

• “Cuando bata yo, ta creé yo que el Dios ta mira con el diaton maga kamali y preparao castiga kanaton. Despues, ya sinti yo que nuay le queber kanaton. El Dios igual na un prime minister quien ta rula con el maga gente pero gendeh deverasan interesao kanila.”—Raymonde, Canada.

Para contigo? Dificil ba ama con Dios? Manada Cristiano el ya pregunta con ese por cuanto siglo. Gane del Middle Ages, mayoria del maga quien ta clama Cristiano gendeh ta reza con el Todopoderoso Dios. Porque gendeh? El maga gente ta tiene gayot miedo con ele. El un historian que si Will Durant ya habla: “Paquemodo puede reza el un pecador con el un maka-miedo y lejos Dios?”

Porque el maga gente ta sinti que “maka-miedo y lejos” el Dios? Cosa deverasan ta enseña el Biblia acerca con Dios? Puede ba ayuda contigo que ama con Dios si sabe tu el verdad acerca con ele?