Michelle: Hi, Sophia. Bueno cay taqui lang tu na casa.

Sophia: Si.

Michelle: Del otro dia, ya discuti kita si cosa ta sinti el Dios acerca na sufrimiento. * Ya habla tu que ya tarda ya tu ta pensa acerca con ese, especialmente despues man accidente na coche el de tuyu nana. Quetal ya gale de tuyu nana?

Sophia: Tiene vez, enbuenamente le y tiene vez, gendeh. Pero ahora, OK le.

Michelle: Ah, bueno si ansina. Asigurao dificil gayot esta positivo si ansina el situacion.

Sophia: Si. Ta pensa gane yo si hasta cuando pa le sufri.

Michelle: Ta entende yo el cosa tu ta sinti. Posible ta acorda pa tu el cosa kita ya discuti del otro dia. Ya deja yo pregunta acerca si porque el Dios ta permiti que continua el sufrimiento si tiene le poder para termina con ese.

Sophia: Si, ta acorda yo.

Michelle: Antes kita considera con el contestacion del Biblia, man repaso anay kita con el cuanto punto que ya discuti kita del otro dia.

Sophia: OK.

Michelle: Por ejemplo, ya aprende kita que maskin el maga buen gente na tiempo del Biblia ya pensa si porque ta permiti el Dios con el sufrimiento. Pero, nuay con ele regaña el Dios cay ya pregunta le se, ni habla con ele el Dios que necesita lang le mas fe.

Sophia: Nuevo se conmigo.

Michelle: Ya aprende tambien kita que ta odia si Dios Jehova mira que ta sufri kita. Por ejemplo, el Biblia ta habla que si ta enfrenta problema el de suyu maga siervo, ta “sinti le duele.” * Gendeh ba ta dale se kanaton comforta cay sabe kita que ta sinti el Dios el cosa kita ta sinti?

Sophia: Si, amo.

Michelle: Despues, si considera kita si paquemodo de poderoso el diaton Creador, asigurao tiene le el abilidad que quita con el sufrimiento na maskin cosa hora.

Sophia: Ese el gendeh yo ta entende. Porque ya permiti el Dios que sucede este todo mal cosas ciendo tiene man gale le poder para hace descanza con ese?

Michelle: Puede kita incuntra el contestacion del de tuyu pregunta na primer libro del Biblia, na Genesis. Familiar ba tu na istoria de Adan y Eva y con el fruta que ya prohibi kanila que come?

Sophia: Si, ya aprende yo con ese na diamon Sunday school. Ya habla el Dios que no come con el fruta del un pono pero ya come siempre sila con aquel.

Michelle: Justo. Ahora, considera kita si cosa ya sucede antes sila desobedece con Dios. Aquel suceso hay ayuda kanaton contesta con el pregunta si porque kita ta sufri. Puede tu pabor le con el Genesis capitulo 3, versiculo 1 hasta 5?

Sophia: OK. “Na todo mailap animal que ya hace si Dios Jehova, el culebra amo el de con todo alisto. Poreso ya habla este con el mujer: ‘Ya habla ba gayot el Dios que gendeh ustedes debe come con el fruta del todo pono na jardin?’ El mujer ya contesta con el culebra: ‘Puede kame come con el fruta del maga pono na jardin. Pero si acerca con el fruta del pono que talli na medio del jardin, el Dios ya habla: “No ustedes come con ese, ni agarra con ese; cay si hace se ustedes, hay muri gayot ustedes.”’ El culebra ya habla con el mujer: ‘Gendeh gayot ustedes muri. Cay sabe el Dios que na mismo dia que hay come ustedes con ese, hay abri el de ustedes ojos y hay queda ustedes igual con Dios que sabe el bueno y malo.’”

Michelle: Gracias. Examina kita unrato con este maga versiculo. Una, nota que el culebra yan cuento con el mujer que si Eva. Na otro parte del Biblia, ta dale mira que si Satanas Diablo el quien yan cuento con Eva por medio na culebra. * Ya pregunta si Satanas con Eva si cosa ya habla el Dios acerca na un pono. Ya nota ba tu cosa ya habla el Dios que sucede con Adan y Eva si come sila con el fruta de aquel pono?

Sophia: Hay muri sila.

Michelle: Justo. Despues de ese, ya hace un grande acusacion si Satanas contra con Dios. Nota si cosa le ya habla: “Gendeh gayot ustedes muri.” Ya hace sale si Satanas que imbustero el Dios!

Sophia: Ahora lang yo ya oi con ese parte del istoria.

Michelle: Cuando ya habla si Satanas que el Dios imbustero, ya hace le un serioso acusacion que necesita tiempo para solva. Para contigo, porque gaha?

Sophia: Hmm. No sabe yo.

Michelle: Usa kita un ejemplo. Pone kita que un dia, ya atraca yo contigo y ya habla que mas mafuerza yo que contigo. Paquemodo tu dale prueba que mali yo?

Sophia: Siguro si man contest kita.

Michelle: Si, justo. Posible, puede kita iscuji un pesao cosas y despues mira si quien diaton el puede ganá alza con ese. El deverasan, facil lang sabe si quien el mas mafuerza.

Sophia: Si, justo.

Michelle: Pero quetal, en vez de habla yo que mas mafuerza yo, ya habla yo que mas honesto yo que contigo? Mas dificil se, gendeh ba?

Sophia: Si, amo gayot.

Michelle: El deverasan, el pagka-honesto gendeh igual na fuerza que pronto lang dale prueba.

Sophia: Amo man.

Michelle: Poreso, necesita largo tiempo para dale prueba si quien diaton el mas honesto.

Sophia: Justo tu.

Michelle: Ahora, bira kita con el istoria na Genesis. Ya habla ba si Satanas que mas mafuerza le que con Dios?

Sophia: Nuay.

Michelle: Pronto lang dale prueba el Dios que mali le. Poreso, ya clama si Satanas que mas honesto le que con Dios. Dol ya habla le con Eva, ‘Tan imbusterias contigo el Dios pero iyo, ta habla yo contigo el verdad.’

Sophia: Ansina gale?

Michelle: Cay sabio el Dios, sabe le que el de con todo buen manera para solva con aquel problema amo permiti que pasa el tiempo. Na uliji, ya queda claro si quien ta habla el verdad y si quien el tan imbusterias.

Sophia: Pero cuando ya muri si Eva, gendeh ba ya dale ya quel prueba si quien ta habla el deverasan?

Michelle: Si, na cuanto manera. Pero, manada el cosa envuelto na acusacion de Satanas. Mira kita otravez con el versiculo 5. Ya nota ba tu si cosa pa otro ya habla si Satanas con Eva?

Sophia: Ya habla le que si come si Eva con el fruta, hay abri el de suyu ojos.

Michelle: Si y hay queda le “igual con Dios que sabe el bueno y malo.” Poreso, dol ta habla si Satanas que tiene cosa bueno ta esconde el Dios na maga gente.

Sophia: Si.

Michelle: Y un grande problema se.

Sophia: Porque man?

Michelle: Na cosa le ya habla, ya dale mira si Satanas con Eva—y entrao ya el todo maga gente—que mas queda alegre el maga gente si gendeh el Dios el ta rula kanila. Sabe si Jehova que el de con todo buen manera para dale prueba que mali si Satanas amo que permiti con ele rula con este mundo por cuanto tiempo. Ese el razon si porque manada el ta sufri ahora—por causa cay si Satanas el quien ta rula con el mundo y gendeh el Dios. * Pero tiene buen noticia.

Sophia: Cosa se?

Michelle: El Biblia ta enseña dos bonito verdad acerca con Dios. Una, preparao si Jehova ayuda kanaton si ta sufri kita. Por ejemplo, considera con el palabra de Rey David que escribido na Salmo 31:7. Si David ya experiencia manada sufrimiento na de suyu vida pero nota si cosa le ya habla na de suyu rezo con Dios. Puede ba tu pabor le con ese versiculo?

Sophia: OK. Este ta habla: “Hay queda gayot yo alegre na de uste amor leal, cay ya mira uste con el de mio sufrimiento; sabe uste el de mio grabe lingasa.”

Michelle: Poreso, maskin pa ya experiencia sufrimiento si David, ya tiene le comforta cay sabe le que ta mira si Jehova con el todo cosas que ta enfrenta le. Ta dale ba tambien contigo comforta cay sabe tu que ta puede mira si Jehova con el todo cosas ta sucede, incluido ya el dolor que ta sinti tu que gendeh ta puede entende el otro gente?

Sophia: Si.

Michelle: El ika-dos verdad amo que gendeh permiti el Dios que continua el diaton sufrimiento hasta para cuando. El Biblia ta enseña que cerca ya le termina con el mal rulanza de Satanas. Y hay quita le completamente con el todo mal cosas que ya sucede, incluido ya el sufrimiento que ya enfrenta tu y el de tuyu nana. Puede ba yo bira na sunod semana y discuti si porque kita puede asigura que cerca ya quita el Dios con el todo sufrimiento? *

Sophia: Si, bira lang.