Cuando ya nace yo, el de mio mayores tiene un diutay hacienda na barrio de Galicia, Spain. Ika-cuatro yo na ocho man hermano y hermana. Tiene kame un alegre familia. Na aquel tiempo na Spain, normal lang na un familia que tiene anak quien entra na seminario o convento. Na diamon familia, tres kanamon el ya hace con ese.

Na edad de 13, yan junto yo con el de mio hermana na un convento na Madrid. Otro el vida na convento. No puede kame man amiga con otro sino necesita kame obedece con el maga ley, reza y bien istricto alla. Si temprano aga, tan junto-junto kame na capilla para medita pero manada beses blanco el de mio pensamiento. Despues, ta canta kame maga religioso cancion y ta atende misa pero todo na Latin. Nuay yo cosa ta entende y ta sinti que bien lejos conmigo el Dios. No puede kame man cuento. Maskin si man encuentro kame pati del de mio hermana, puede lang kame habla, “Ave Maria purisima.” Ya permiti lang kanamon el maga madre que man cuento por media hora despues kame come. Bien diferente este na de mio vida junto con el de mio familia! Ya sinti yo solo y pirmi yo ta llura.

Maskin pa nuay yo sinti que cerca yo con Dios, ya queda yo un madre na edad de 17. El deverasan, ya hace lang yo si cosa ta expecta conmigo. Pero nuay tarda, ya principia yo pensa si ya iscuji ba gayot conmigo el Dios para hace con ese. Ya habla el maga madre que aquellos quien tan duda hay guinda na infierno! Maskin pa ansina, tan duda siempre yo. Sabe yo que si Jesucristo nuay separta con el de suyu mismo cuerpo sino ya continua le enseña y ayuda con otro. (Mateo 4:23-25) Na edad de 20, sabe yo que nuay yo razon para esta un madre. Ya espanta yo cuando ya habla conmigo el madre superiora que si gendeh yo asigurao, mas bueno pa si sale dayun yo. Ya pensa yo que baka ta tiene le miedo que influencia yo con otro. Poreso, ya sale yo na convento.

Cuando ya bira yo na diamon casa, ya entende el de mio mayores con el de mio decision. Ciendo nuay trabajo na diamon barrio, ya anda yo na Germany donde ta queda el de mio uno hermano. Miembro le del un Comunista grupo del maga gente estaba na Spain. Comfortable yo man junto con el maga gente quien ta defende con el derecho del maga trabajador y del maga mujer. Poreso, ya queda yo un Comunista y nuay tarda ya casa con el un miembro de ese grupo. Ya pensa yo que tiene yo cosa bueno ta hace ciendo ta dale yo maga literatura de Comunista y ta participa na maga protesta.

Pero despues del cuanto tiempo, yan luya ya tambien yo. Manada beses yo ya sinti que el maga Comunista gendeh ta practica con el cosa sila ta enseña. Mas ya queda fuerte ese sentido del 1971 cuando el cuanto joven miembro del diamon grupo ya quema con el Spanish Consulate na Frankfurt. Ya hace quel sila para man protesta con el injusticia que ta hace el gobierno del Spain. Pero, ta creé yo que gendeh ese el justo manera para man protesta.

Cuando ya nace el de mio primer anak, ya habla yo con el de mio marido que gendeh mas yo atende na maga miting del maga Comunista. Bien triste yo cay nuay ni uno del de mio maga amiga y amigo de antes el ya visita conmigo y con el de mio baby. Ya pensa yo si cosa el proposito del vida. Gendeh ba gayot sayang el maga esfuerzo que ta hace el maga gente para hace mas enbuenamente con el mundo?

Del 1976, dos Español Testigo el yan tuktuk na diamon puerta y yan offer cuanto literatura que base na Biblia que ya acepta yo. Na diila segundo visitada, manada yo pregunta kanila acerca na sufrimiento, injusticia y si porque tiene discriminacion. Ya espanta yo cuando ya usa sila con el Biblia para contesta con el cada pregunta! Ya acepta yo un Bible study.

Del primero, quierre lang yo omenta el de mio saber. Pero, ya cambia se cuando iyo y el de mio marido ya principia atende na maga miting na Kingdom Hall del maga Testigo de Jehova. Na aquel tiempo, dos ya el diamon anak. Ta anda kanamon incuntra el maga Testigo y ta ayuda mira con el diamon maga anak durante na maga miting. Poreso, ya principia yo gusta con el maga Testigo.

Maskin pa ansina, tiene siempre yo cuanto duda acerca na religion. Ya decidi yo que visita con el de mio familia na Spain. El de mio tio que un padre ya pricura hace manera para descanza yo estudia con el Biblia. Pero, el maga Testigo alla ya puede gayot ayuda conmigo. Ya contesta sila por medio na Biblia con el de mio maga pregunta, igual na cosa ya hace el maga Testigo na Germany. Ya decidi yo que continua con el de mio Bible study si bira yo na Germany. Maskin pa ya decidi el de mio marido que descanza estudia con el Biblia, ya continua siempre yo. Del 1978, ya bautiza yo como uno del maga Testigo de Jehova.

El justo saber na Biblia ya dale conmigo un claro proposito y direccion na vida. Por ejemplo, el 1 Pedro 3:1-4 ta anima con el maga mujer que “somete” con el diila maga marido, queda “respetoso” y “tranquilo, y amo este el precioso adelante del Dios.” Ese maga principio ya ayuda conmigo para cumpli con el de mio papel como un mujer y nana.

Maga 35 año ya el ya pasa desde ya queda yo un Testigo. Alegre yo sirvi con Dios como parte del un deverasan espiritual familia y alegre yo que cuatro del de mio cinco anak el ya hace tambien igual ansina.