Ya nace yo y ya engranda na un pobre comunidad na Rome. Bien tormento el de mio vida. Nuay yo conoce con el de mio deverasan nana y nuay yo buen relacion con el de mio tata. Ya aprende yo el vida na calle mientras ta engranda yo.

Cuando diez año yo, ya principia ya yo ruba. Na edad de 12, ya sale yo na casa por primer vez. Na manada ocasion, ya saca conmigo el de mio tata na precinto y ya lleva bolbe na casa. Pirmi yo tan purpiajan na maga gente—violente yo y rabiao na mundo. Cuando 14 yo, ya sale ya gayot yo na casa. Ya principia yo man droga y queda na calle. Cay nuay yo lugar onde para durmi, ta abri yo con el coche del maga gente y ta esta alla hasta ala-mañana. Despues, ta busca yo un fountain para puede yo laba cara.

Ya queda gayot yo bueno na rubada—man snatch bag y ruba na maga apartment y grande casa durante el noche. Ya queda yo conocido y nuay tarda, ya invita conmigo para queda miembro na un gang que ya dale conmigo “oportunidad” para puede ruba na maga banco. Por causa cay bien valiente yo, ya tiene conmigo miedo el otro miembro na gang. Maskin donde, ta lleva yo con el de mio pusil. Gane, talli se abajo del de mio almuhada si ta durmi yo. El violencia, droga, rubada, mal palabra y imoralidad amo el ya queda manera del de mio vida. Pirmi conmigo ta busca el maga polis. Mucho beses ya arresta conmigo y cuanto año yo entra’y sale na preso.

Na un ocasion cuando ya sale yo na preso, ya decidi yo que anda y visita con el uno del de mio maga tia. No sabe yo que el de mio tia, primo y prima ya queda maga Testigo de Jehova. Ya invita sila conmigo que atende na un miting del maga Testigo. Cay curioso yo, ya decidi yo sigui kanila. Cuando ya llega kame na Kingdom Hall, ya habla yo que sinta yo cerca na puerta para puede yo mira con el maga quien ta entra y ta sale. Siempre, armao yo.

Aquel miting ya cambia con el de mio vida. Ta acorda yo que ya pensa yo que dol na diferente planeta yo. Tan smile el maga gente cuando tan greet sila conmigo. Ta acorda siempre yo si paquemodo sila de bueno y bien sincero. Bien diferente gayot este na cosa yo yan anad!

Ya principia yo estudia con el Biblia junto na maga Testigo. Mas manada yo ta aprende, mas ta queda claro que necesita yo cambia con el de mio vida. Ya sigui yo con el consejo que escribido na Proverbio 13:20: “El quien ta sigui junto con el sabio hay queda sabio, pero el quien tan junto con el estupido hay resulta na mal.” Ya realiza yo que necesita yo deja con el gang. Gendeh quel facil pero na ayuda de Jehova, ya puede yo quel hace.

Ya arregla tambien yo con el de mio ichura. Ya hace yo grande esfuerzo para descanza puma y usa droga. Ya curta yo con el de mio largo pelo, ya quita con el de mio aretes y ya descanza habla maga mal palabra. Por primer vez na de mio vida, ya puede yo controla con el de mio maga accion.

No quierre yo le y estudia poreso dificil gayot conmigo para concentra na de mio Bible study. Pero mientras ta hace yo esfuerzo, hinay-hinay yo ta aprende ama con Jehova y tiene cambio que ta sucede adentro conmigo—ta principia ya yo sinti conciencia. Pirmi yo tiene negativo sentido acerca na de mio mismo cuerpo y tan duda yo si perdona ba gayot conmigo si Jehova na todo mal cosas que ya hace yo. Na aquel maga tiempo, ya tiene yo comforta cuando ya le yo acerca na perdon de Jehova con Rey David despues este comete serioso culpa.—2 Samuel 11:1–12:13.

El otro pa yan dificil yo amo predica casa en casa acerca na cosa yo ta creé. (Mateo 28:19, 20) Ta tiene yo miedo cay baka man encuentro yo con el un persona con quien yo ya hace sinti duele o ya hace kamali de antes. Pero hinay-hinay, ya puede yo ganá con el de mio miedo. Ya principia yo sinti el deverasan alegria que ayuda con otro aprende acerca con el diaton Tata na cielo, quien ta perdona.

El saber acerca con Jehova ya salva con el de mio vida! Mayoria del de mio maga uban de antes ya muri ya o na preso pero iyo bien alegre y tiene cosa ta esperanza na futuro. Ya aprende yo queda humilde, obediente y controla con el de mio rabia. Como resulta, ya tene yo buen relacion na maga gente alrededor conmigo. Alegre el de mio vida casao na de mio mujer, si Carmen. Ya incuntra kame el deverasan alegria que ayuda con otro aprende acerca na Biblia.

Ahora, ta hace yo honesto trabajo—tiene vez, envuelto siempre na banco pero en vez ruba ta limpia yo con ese!