Imagina con el un tata quien tan cuento con el de suyu siete año anak. Ya habla le, “De antes pa gayot, el Dios ya hace con el tierra y con el todo cosas taqui. Ya hace tambien con el sol, luna y con el maga estrellas.” Ya pensa unrato el bata con este y despues, ya pregunta, “Pang, quien ya hace con el Dios?”

“Nuay quien ya hace con Dios,” ya contesta el tata. “Talli ya le daan.” Ese simple contestacion bastante ya con el bata na de suyu edad. Pero mientras ta engranda le, ese pregunta gendeh ta perde na de suyu pensamiento. Dificil para con ele entende si paquemodo nuay quien ya crea con el un persona. Cay maskin gane el universo tiene principio. Ta pensa le, ‘Quien ya hace con el Dios?’

Cosa el contestacion del Biblia con ese? Actualmente, igual lang na manera si paquemodo el tata ya contesta con ese. Si Moises ya escribi: “O Jehova, . . . nuay pa nace el maga monte o antes tu hace con el mundo y con el tierra, maskin pa na tiempo nuay principio hasta tiempo nuay fin, etu el Dios.” (Salmo 90:1, 2) Na igual manera, el profeta Isaias ya habla: “No sabe ba tu? Nuay ba tu oi? Si Jehova, el Creador del todo las cosas na tierra, amo un Dios hasta para cuando.” (Isaias 40:28) El carta tambien de Judas ya refiri con Dios como el quien ta existi “ahora y hasta para cuando.”—San Judas 25.

Este maga texto ta dale mira que el Dios amo “el Rey eterno,” como cosa ya menciona si apostol Pablo. (1 Timoteo 1:17) Este quierre decir que el Dios ta existi ya desde antes pa gayot. Y nuay fin el de suyu existencia. (Revelacion 1:8) Poreso, el de suyu nuay fin existencia amo uno na maga calidad que ta hace con ele el con Todopoderoso.

Porque dificil kanaton entende este idea? Cay compara con Jehova bien corto lang el diaton vida y por causa con ese, diferente el diaton mirada na largor del tiempo compara con ele. Ciendo el Dios ta existi hasta para cuando, para con ele el un mil año igual lang como un dia. (2 Pedro 3:8) Para ilustra: El un langgostas ba que ta vivi por 50 dia lang, puede entende con el largor del vida diaton que 70 o 80 año? Imposible! Pero, el Biblia ta dale mira que igual kita na langgostas si compara na diaton Creador. Maskin el diaton pensamiento bien lejos si compara con el pensamiento del Dios. (Isaias 40:22; 55:8, 9) Poreso, por causa na diaton limitacion, manada maga cosas acerca con Jehova gendeh completamente ta puede entende el maga gente.

Maskin pa dificil entende que nuay quien ya crea con Dios pero puede kita habla que posible se. Si tiene quien ya crea con Dios, ese persona amo el Creador. Pero como cosa ya explica el Biblia, si Jehova lang el quien “ya hace con el todo maga cosa-cosa.” (Revelacion 4:11) Mas pa, sabe kita que del una gendeh ta existi el universo. (Genesis 1:1, 2) Paquemodo se ya existi? El quien ya crea con ese necesita existi una. Ya existi ya tambien el Dios antes pa tiene otro maga inteligente creatura, igual como el de suyu unico Anak y el maga angel. (Job 38:4, 7; Colosa 1:15) Entonces, claro que ta existi ya el Dios antes le crea con el todo cosas. Nuay con ele crea; nuay quien ya existi una para crea con ele.

El diaton mismo existencia y del entero universo ta dale prueba que tiene Dios eterno quien ta existi. Ele lang solamente el quien puede establicia ley para controla con el universo y dale vida con el todo cosas.​—Job 33:4.