Como cosa kita ya sabe del ya pasa articulo, ya hace centro si Jesus con el de suyu vida para ‘predica y anuncia el buen noticia del Reino del Dios.’ (Lucas 8:1) Ya hace le esfuerzo y ya camina le por largo distancia na entero lugar del Israel para enseña con el maga gente acerca el Reino del Dios. Escribido na cuatro Evangelio el ministerio de Jesus que ta contene mas de 100 situacion que ya menciona acerca na Reino. Mayoria de ese puede incuntra na maga palabra de Jesus. Pero, diutay porcion lang se na todo cosa le ya habla acerca na Reino del Dios.—Juan 21:25.

Porque bien importante el Reino para con Jesus cuando taqui le na tierra? El un razon amo sabe si Jesus que ya iscuji con ele el Dios para queda el Rey de este. (Isaias 9:6; Lucas 22:28-30) Pero, no quierre si Jesus el poder y el gloria para na de suyu mismo cuerpo. (Mateo 11:29; Marcos 10:17, 18) Nuay le suporta con el Reino para lang na de suyu mismo interes. Interesao si Jesus na Reino del Dios por causa na cosa este hay hace para con aquellos con quien ele ta ama—el de suyu Tata na cielo y el de suyu maga fiel siguidores.

Ta ama gayot si Jesus con el de suyu Tata na cielo. (Proverbio 8:30; Juan 14:31) Ta gusta gayot le con el maga bonito calidad del suyu Tata, igual como el De Suyu amor, compasion y justicia. (Deuteronomio 32:4; Isaias 49:15; 1 San Juan 4:8) Asigurao, ta odia gayot si Jesus con el maga imbusterias acerca con el de suyu Tata—maga imbusterias igual como nuay queber el Dios na sufrimiento del maga gente y quierre el Dios que sufri kita. Este el un razon si porque si Jesus bien quierre gayot declara “el Buen Noticia del Reino”—sabe le que llega el tiempo, el Reino hay limpia con el reputacion del de suyu Tata. (Mateo 4:23; 6:9, 10) Paquemodo?

Por medio na Reino, hay hace grande cambio si Jehova para na bien del maga gente. “Ay limpia Le el lagrimas” na ojos del maga fiel gente. Hay quita si Jehova con el causa de ese maga luha y asigura que “nunca mas ay tene muerte, ni dolor, ni tristeza.” (Revelacion 21:3, 4) Por medio na Reino, hay quita el Dios con el todo sufrimiento del maga gente. *

Poreso, gendeh maka-estraña si porque bien quierre si Jesus habla con el maga gente acerca na Reino. Sabe le que hay revela este si paquemodo de poderoso y lastimoso el de suyu Tata. (Santiago 5:11) Sabe tambien si Jesus que por medio na Reino, hay beneficia el otro con quien ele ta ama—el maga fiel gente.

Antes le vene aqui na tierra, ya queda si Jesus na cielo junto con el de suyu Tata. Ya usa el Tata con el de suyu Anak para crea con el todo las cosas—principia con el marvelloso cielo, el bien manada estrellas y galaxy hasta con el diaton bonito tierra y el maga creatura aqui. (Colosa 1:15, 16) Pero, “mas alegre” si Jesus con el maga gente.—Proverbio 8:31.

Puede mira el amor de Jesus na maga gente por medio na de suyu ministerio. Desde una, ya hace le claro que ya vene le na tierra para “anuncia el Buen Noticia.” (Lucas 4:18) Pero, nuay lang habla si Jesus que ayuda le con el maga gente. Manada beses, ya demonstra le con el de suyu amor para na maga gente. Por ejemplo, cuando yan junto-junto el un grande grupo para oi con ele “ya tene [si Jesus] lastima canila y ya cura Le con el diila maga emfermo.” (Mateo 14:14) Cuando el un hombre que tiene bien duele enfermedad ya dale mira el de suyu fe que si Jesus puede cura con ele si quierre gayot le, amor el ya manda move con Jesus para actua. Ya cura le con el hombre y con compasion ya habla con ele: “Siempre!, quiere Yo! Queda tu bueno!” (Lucas 5:12, 13) Cuando ya mira si Jesus con el de suyu amiga, si Maria, que dolorido na muerte del de suyu hermano, si Lazaro, “ya sinti gayot [si Jesus] na su corazon,” “ya queda Le bien triste” y “ya llora.” (Juan 11:32-36) Despues, tiene le cosa ya hace que dol imposible—ya hace le vivi otravez con Lazaro maskin cuatro dia ya este muerto!—Juan 11:38-44.

Siempre, sabe si Jesus que temporario lang el solucion que ya dale le. Ya realiza le que llega el tiempo, todo aquellos con quien le ya cura hay enferma lang otravez y todo aquellos con quien ele ya resucita hay muri lang otravez. Pero, sabe tambien si Jesus que el Reino del Dios hay quita permanente con ese maga problema. Poreso, nuay lang si Jesus hace maga milagro sino activo le ya declara “el Buen Noticia del Reino.” (Mateo 9:35) El de suyu maga milagro ya demonstra si cosa cerca ya hace el Reino del Dios aqui na tierra. Considera si cosa el promesa del Biblia si llega ya ese tiempo.

• Nuay mas problema na salud.

  “Na ese tiempo, el ojos del maga bulak hay abri y hay abri el orejas del maga bungul. Na ese tiempo, el maga piang hay salta igual con el venao y el lenggua del maga apa hay grita na alegria.” Mas pa, “nuay residente quien hay habla: ‘Enfermo yo.’”—Isaias 33:24; 35:5, 6.

• Nuay mas muerte.

  “El maga recto hay hereda con el tierra y hay esta sila alli hasta para cuando.”—Salmo 37:29.

  “Hay traga le con el muerte hasta para cuando y el Soberano Señor Jehova hay limpia con el luha na todo cara.”—Isaias 25:8.

• Aquellos quien ya muri hay vivi otravez.

  “Todo el maga muerto ay oi el disuyo voz, y todo sila ay sale na diila maga sepultura.”—Juan 5:28, 29.

  “El maga gente . . . ay resucita.”—Maga Actividad 24:15.

• Todo hay tene casa y trabajo.

  “Hay planta sila maga casa y queda sila alla y hay siembra sila maga uvas y come con el fruta de ese. Gendeh sila planta casa y otro el queda ni siembra sila y otro el come. . . . Hay provecha gayot sila con el resulta del diila maga trabajo.”—Isaias 65:21, 22.

• Nuay mas guerra.

  “Hay termina le con el maga guerra na entero mundo.”—Salmo 46:9.

  “El maga nacion gendeh mas alza espada contra otro nacion, ni aprende pa sila man guerra.”—Isaias 2:4.

• Nuay mas escasez de comida.

  “El tierra hay dale el producto de este; el Dios, el diaton Dios, hay bendici kanaton.”—Salmo 67:6

  “Hay tene abundancia de grano na tierra; na arriba del monte este hay sobra.”—Salmo 72:16.

• Nuay mas pobreza.

  “Gendeh gayot ulvida con el maga pobre.”—Salmo 9:18.

  “Cay hay salva le con el pobre quien ta pidi ayuda, y con el maka-lastima y con el maskin quien que nuay ta ayuda. Ele hay tene lastima con el maka-lastima y pobre,y el vida del maga pobre hay salva le.”—Salmo 72:12, 13.

Si ta considera tu con ese maga promesa acerca na Reino del Dios, ta puede ba tu mira si porque bien importante el Reino para con Jesus? Cuando taqui na tierra, bien quierre le man cuento acerca con el Reino del Dios con maskin quien hay oi, cay sabe le que el Reino hay quita con el todo problema que ta experiencia kita ahora.

Ya gusta ba tu con el cosa tu ya le na Biblia acerca na Reino? Si ansina, cosa tu hace para aprende pa mas acerca na Reino? Y paquemodo tu puede asigura que hay beneficia tu con el maga bendicion de este? El ultimo articulo na este serie hay contesta con ese maga pregunta.