Cuando bata yo, ta queda el diamon familia cerca na Leipzig, East Germany, cerca na boundary del Czechoslovakia y Poland. Cuando seis año yo, onde-onde kame ta guinda por causa na trabajo del de mio tata—una na Brazil y despues na Ecuador.

Cuando 14 año yo, ya entra yo na un boarding school na Germany. Cay talla na South America el de mio mayores, necesita yo cuida con el de mio mismo cuerpo. Ya queda yo bien independiente. Nuay yo queber si cosa el efecto del de mio maga accion con otro.

Cuando ya queda yo 17 año, ya bira el de mio mayores na Germany. Del una, junto yo ta esta kanila. Pero por causa del de mio pagka-independiente, tan dificil yo creé con el de mio mayores. Na edad de 18, ya sale yo na casa.

No sabe yo si cosa yo quierre hace na de mio vida. Despues mira con el diferente vida del otro y maga organizacion, ya queda yo convincido que el de con todo buen cosa que puede yo hace na de mio vida amo que pasea con este bonito planeta antes destroza con este el maga gente.

Ya sale yo na Germany, ya cumpra un motorsiclo y ya anda na Africa. Pero nuay dura, necesita yo bira na Europe para compone con el de mio motor. Nuay dura despues, ya guinda yo na aplaya del Portugal. Ya decidi yo deja con el de mio motor y viaja por medio de barco.

Yan junto yo con el un grupo de jovenes quien ta prepara para viaja na Atlantic Ocean. Uno kanila amo ya queda el de mio mujer, si Laurie. Una, ya viaja kame na maga isla de Caribbean. Despues kame esta por corto tiempo na Puerto Rico, ya bira kame na Europe. Ta busca era kame un diutay barco donde kame puede esta. Pero despues kame busca por tres meses, nuay kame porsigui con el diamon plano. Ya llama conmigo na Germany para queda soldao.

Quince meses yo ya sirvi como navy na Germany. Durante na ese tiempo, ya casa kame de Laurie y ya prepara kame para continua el diamon viaje na mar. Corto tiempo antes yo sirvi na militar, ya cumpra kame un diutay barco. Mientras ta sirvi yo na militar, hinay-hinay kame ya hace con este para na un barco que tiene vela. Ta plaña kame queda aqui y continua pasea con este bonito planeta. Este quel el tiempo—despues del de mio servicio na militar pero antes acaba el barco—que ya puede kanamon man cuento el maga Testigo de Jehova y ya principia kame man Bible study.

Del una, gendeh yo ta mira que tiene cosa necesita cambia na de mio vida. Casao kame del de mio mujer y ya descanza ya yo puma. (Efeso 5:5) Acerca con el diamon plano que viaja con el entero mundo, ya pensa yo que gendeh malo goal que mira con el maga bonito creacion del Dios.

Pero el deverasan, necesita yo hace maga cambio—especialmente na de mio personalidad. Cay bien orgulloso yo y independiente, bilib gayot yo na de mio mismo abilidad y acomplisimiento. El de mio bien lang yo ta pensa.

Un dia, ya le yo con el Sermon na Monte de Jesus. (Mateo, capitulo 5-7) Del primero, gendeh yo ta entende con el maga alegria que ya menciona si Jesus. Por ejemplo, ya habla le que alegre daw aquellos con hambre y con sequia. (Mateo 5:6) Ta estraña yo si porque alegre el un persona ciendo tiene le necesidad. Mientras ta continua yo estudia, ya puede yo realiza que todo kita tiene espiritual necesidad pero para puede con ese satisfecha, debe kita humilde admiti que tiene kita ese necesidad. Igual como cosa ya habla si Jesus: “Alegre aquellos quien ta pensa el diila espiritual necesidad.”—Mateo 5:3, NWT.

Despues kame principia man Bible study na Germany, ya cambia kame de Laurie na France y despues, na Italy. Maskin onde kame anda, talla el maga Testigo de Jehova. Bilib gayot yo na diila sincero amor para na uno y otro y na diila unidad. Ya puede yo mira que el maga Testigo deverasan man hermano y hermana na entero mundo. (Juan 13:34, 35) Nuay dura, ya bautiza kame de Laurie como maga Testigo de Jehova.

Despues del bautismo, ya continua yo hace maga cambio na de mio custumbre. Ya decidi kame de Laurie viaja na Africa y despues para na Atlantic Ocean para na United States. Durante quel na ese tiempo—cuando kame lang dos na un diutay barco que palibut el bien ancho mar—que ya realiza yo si paquemodo yo de bien diutay compara con el diaton glorioso Creador. Cay manada yo tiempo (ciendo nuay man cosa hace entre medio del mar), ya usa yo con el de mio tiempo para le con el Biblia. Ya alcanza gayot na de mio corazon el istoria de Jesus cuando taqui le na tierra. Perfecto le y tiene el maga abilidad que mas pa na cosa yo puede imagina pero nuay le saca el atencion del otro. El de suyu vida gendeh centro na de suyu mismo cuerpo sino con el de suyu Tata na cielo.

Mientras ta medita yo con el ejemplo de Jesus, ya puede yo mira que necesita yo hace una con el Reino del Dios na de mio vida en vez de hace lang con ese sigui na maga cosas que quierre yo hace. (Mateo 6:33) Cuando ya llega ya kame de Laurie na United States, ya decidi kame que esta alla y man focus na diamon adoranza.

De antes, cuando ta confia lang yo na de mio mismo cuerpo, mas manada gendeh yo asigurao na de mio maga decision. Pero ahora, ya incuntra ya yo el justo sabeduria para guia conmigo. (Isaias 48:17, 18) Ya tene tambien yo proposito na vida que nunca yo ya tiene de antes—adora con Dios y ayuda con otro que aprende acerca con ele.

Cay ya aplica kame con el maga consejo na Biblia, mas ya queda fuerte el diamon matrimonio de Laurie. Ya bendici tambien kanamon si Jehova un anak mujer, quien conoce y ta ama con Jehova.

Gendeh pirmi facil el diamon vida. Pero na ayuda de Jehova, determinao kame que nunca descanza y confia con ele.—Proverbio 3:5, 6.