Cameron: Alegre yo Jon cay ta puede kita man cuento pirmi acerca na Biblia. * Del last time, tiene tu pregunta acerca na Reino del Dios. Ya pregunta tu si porque el maga Testigo de Jehova ta creé que el Reino ya principia rula del año 1914.

Jon: Si, ya le yo el uno del de ustedes maga publicacion y ya habla alla que el Reino del Dios ya principia rula del 1914. Gendeh ba ya habla tu que el todo del de ustedes maga creencia base na Biblia?

Cameron: Si, justo tu.

Jon: Ya le ya yo mismo con el Biblia. Pero nuay yo puede mira que ta menciona el Biblia con el año 1914. Poreso, ya abri yo Biblia na internet y yan search “1914.” Pero, nuay yo siempre con ese puede incuntra.

Cameron: Quierre yo comenda contigo, Jon. Una, cay ya le ya tu con el entero Biblia. Asigurao, ta ama gayot tu con el Palabra del Dios.

Jon: Si. Para conmigo, nuay otro libro igual con este.

Cameron: Uyun yo contigo. El segundo, quierre yo comenda contigo cay ta usa tu con el Biblia si ta pricura busca con el contestacion na de tuyu pregunta. Ya hace tu el cosa ta anima kanaton el Biblia: ‘Continua busca’ para tene entendimiento. * Bonito cay ta hace tu ansina esfuerzo.

Jon: Gracias. Quierre pa yo mas aprende. Gane, yan research yo y ya puede yo incuntra cuanto informacion acerca na 1914 na este libro que ta estudia kita. Ta menciona este acerca na sueño del un rey​—dol tiene man quel grande pono que ya curta y ya crici otravez.

Cameron: Ah, si. Profecia quel que ya menciona na Daniel capitulo 4. Acerca quel na un sueño de Rey Nabucodonosor de Babilonia.

Jon: Si, amo quel. Bira-bira yo ya le con el profecia. Pero el deverasan, gendeh yo ta puede mira el coneccion de ese na Reino del Dios o na año 1914.

Cameron: Actualmente, Jon, maskin el profeta Daniel nuay entende si cosa gayot quierre decir del cosa le ya escribi!

Jon: Ansina?

Cameron: Si. Aqui na Daniel 12:8, ele ya habla: “Ya oi yo con ese pero nuay yo entende.”

Jon: Gendeh gale yo solo.

Cameron: El deverasan, nuay gayot entende si Daniel cay gendeh pa quel el tiempo para revela el Dios na maga gente si cosa gayot quierre decir del maga profecia na libro de Daniel. Pero na tiempo diaton ahora, puede kita mas entende con ese.

Jon: Porque tu se ya puede habla?

Cameron: Bueno, nota tu el sunod versiculo. El Daniel 12:9 ta habla: “Este maga palabra hay esta secreto y sellao hasta na tiempo del fin.” Poreso, puede lang entende con este maga profecia durante el “tiempo del fin.” Y como cosa kita hay discuti na diaton estudiada, el todo evidencia ta indica que ta vivi ya kita na ese tiempo. *

Jon: Quierre decir, puede tu explica conmigo el profecia na libro de Daniel?

Cameron: Sigui, pricura yo.

Cameron: Para principia, puede yo dale sumario acerca si cosa ya puede mira si Rey Nabucodonosor na de suyu sueño. Despues, puede kita discuti si cosa este quierre decir.

Jon: OK.

Cameron: Na sueño, si Nabucodonosor ya mira un bien grande pono que ya alcanza na cielo. Despues, ya puede le oi con el angel del Dios que ta manda curta con el pono. Pero, ya manda el Dios que deja con el tuud de este. Despues del “siete tiempo,” el pono hay crici otravez. * Ya cumpli una este profecia con Rey Nabucodonosor. Maskin prominente rey ele​—igual con aquel pono que ya alcanza na cielo—​ya curta con ele por “siete tiempo.” Ta acorda ba tu si cosa sunod ya sucede?

Jon: Gendeh yo ta puede acorda.

Cameron: OK lang se. El Biblia ta dale mira que ya perde el pensamiento de Nabucodonosor por siete año. Durante na ese tiempo, no puede le rula como un rey. Pero na fin del siete tiempo, ya queda entacto el pensamiento de Nabucodonosor y ya principia rula otravez. *

Jon: OK. Pero, cosa el coneccion de este na Reino del Dios y na año 1914?

Cameron: Bueno, este profecia tiene dos cumplimiento. El primero ya sucede cuando ya curta el rulanza de Rey Nabucodonosor y el segundo amo cuando ya curta el rulanza del Dios. Y ese cumplimiento el tiene coneccion na Reino del Dios.

Jon: Paquemodo tu ya puede sabe que el profecia tiene segundo cumplimiento na Reino del Dios?

Cameron: Una, puede kita mira un indicacion mismo na profecia. Asegun na Daniel 4:17, ya dale con el profecia “para el todo gente vivo hay sabe que el Bien Alto Dios amo el Quien Rula na reino del maga gente y dale le el rulanza con maskin quien le quierre.” Ya puede ba tu nota el expresion “reino del maga gente”?

Jon: Si, ya habla que “el Bien Alto Dios amo el Quien Rula na reino del maga gente.”

Cameron: Justo. Poreso, este profecia gendeh lang acerca con Nabucodonosor. Acerca tambien este na “reino del maga gente”​—que ta refiri, na rulanza del Dios para na gente. Y claro se kita puede mira si le pa kita otro maga texto na libro de Daniel.

Jon: Cosa tu quierre decir?

Cameron: Tiene un tema que manada beses ya discuti na libro de Daniel. Acerca este na Reino del Dios bajo na rulanza del de suyu Anak, si Jesus. Por ejemplo, puede tu le con el Daniel 2:44?

Jon: OK. Este ta habla: “Na tiempo de aquellos maga rey, el Dios na cielo hay forma un reino que nunca hay destroza. Y gendeh hace pasa con este reino na maskin quien gente. Este hay machaca y termina con este todo maga reino, y este solamente hay esta hasta para cuando.”

Cameron: Gracias. Para contigo, este ba texto ta refiri na Reino del Dios?

Jon: Hmm. Gendeh yo asigurao.

Cameron: Bueno, nota tu que ya habla el texto que este Reino “hay esta hasta para cuando.” Posible gayot se na Reino del Dios pero imposible se para na maga gobierno del gente, gendeh ba?

Jon: Si, imposible gayot.

Cameron: Tiene pa otro profecia na libro de Daniel que ta refiri na Reino del Dios. Puede se kita incuntra na Daniel 7:13, 14. Tiene cosa ta menciona aqui acerca na un rey que hay llega: “Ya dale con ele el autoridad para rula, el honor y reino para el todo maga gente de diferente maga nacion y lengguaje hay sirvi con ele. El de suyu rulanza hasta para cuando​—gendeh este hay termina y gendeh destroza con el de suyu reino.” Ya puede ba tu nota si na cosa este ta refiri?

Jon: Ta menciona este acerca na un reino.

Cameron: Si, justo. Y gendeh lang basta ordinario reino. Nota que el texto ya menciona que ese Reino hay tene autoridad na “todo maga gente de diferente maga nacion y lengguaje.” Quierre decir, este Reino hay rula con el entero mundo.

Jon: Nuay yo se puede pensa pero justo tu. Amo se ta habla el texto.

Cameron: Nota tambien si cosa pa ya habla el profecia: “El de suyu rulanza hasta para cuando​—gendeh este hay termina y gendeh destroza con el de suyu reino.” Gendeh ba semejante se na profecia que ya menciona na Daniel 2:44?

Jon: Si.

Cameron: Man repaso kita unrato con el cosa kita ya puede discuti. Ya dale con el profecia na Daniel capitulo 4 para el maga gente hay sabe que “el Bien Alto Dios amo el Quien Rula na reino del maga gente.” Este claro ta indica que este profecia gendeh lang acerca con Nabucodonosor, sino tiene pa este mas grande cumplimiento. Na entero libro de Daniel, puede kita incuntra maga profecia acerca na Reino del Dios bajo na rulanza del de suyu Anak. Entonces, ta mira tu, justo ba que pensa que este profecia na Daniel capitulo 4 tiene coneccion na Reino del Dios?

Jon: Si. Pero gendeh siempre yo ta puede mira el coneccion de ese na 1914.

Cameron: Bueno, bira kita otravez con Rey Nabucodonosor. Con ele ta refiri el pono na primer cumplimiento del profecia. Ya descanza el de suyu rulanza cuando ya curta con el pono y ya deja con este por siete tiempo. Ya cumpli se cuando ya perde el de suyu pensamiento por cuanto tiempo. Ya acaba el siete tiempo cuando ya queda entacto el pensamiento de Nabucodonosor y ya rula le otravez. Na segundo cumplimiento del profecia, ya descanza el rulanza del Dios por cuanto tiempo​—pero gendeh por causa cay ya falla el Dios.

Jon: Cosa tu quierre decir?

Cameron: Na tiempo del Biblia, ya menciona que el maga rey de Israel quien ya rula na Jerusalem ta sinta na “trono de Jehova.” * Entonces, el diila rulanza ta representa con el rulanza del Dios. Pero ya llega el tiempo, mas mucho de aquellos maga rey ya queda desobediente con Dios y mayoria del maga gente quien bajo kanila, ya sigui con el mal ejemplo diila. Por causa na desobediencia del maga Israelita, ya permiti el Dios que cae sila na mano del maga de Babilonia del 607 B.C.E. Desde aquel tiempo, nuay mas ya maga rey quien ta representa con Jehova na Jerusalem. Como resulta, ya descanza el rulanza del Dios. Claro ba quel contigo?

Jon: Si, claro ya.

Cameron: Entonces del 607 B.C.E., ya principia el siete tiempo o el tiempo cuando ya descanza el rulanza del Dios. Na fin del siete tiempo, hay principia rula el rey con quien ya iscuji el Dios para representa con Ele​—pero ese rey un persona na cielo. Amo se el tiempo que hay cumpli el otro maga profecia que ya le kita na libro de Daniel. Ahora, el pregunta: Cuando ya acaba el siete tiempo? El contestacion na ese pregunta amo tambien el año cuando ya principia rula el Reino del Dios.

Jon: Ansina gale? Quierre decir ya acaba el siete tiempo del 1914?

Cameron: Si! Justo tu.

Jon: Pero paquemodo se kita puede sabe?

Cameron: Durante el de suyu ministerio aqui na tierra, ya indica si Jesus que el siete tiempo nuay pa acaba. * Poreso asigurao que bien largo tiempo este. Ya principia el siete tiempo manada año antes vene si Jesus aqui na tierra y ya continua este por cuanto tiempo despues le bira na cielo. Y omento pa, si acorda tu, queda lang claro el maga profecia na libro de Daniel na “tiempo del fin.” * Acabar, del maga 1870, tiene maga sincero estudiante del Biblia quien ya queda interesao con este maga profecia y ya examina con este. Ya puede sila entende que hay termina el siete tiempo na año 1914. Y el maga grande suceso na mundo desde aquel tiempo ta confirma que el 1914 amo gayot el año que ya principia rula el Reino del Dios na cielo. Ese el año que ya principia el ultimo maga dia o el tiempo del fin. Sabe yo medio hondo el cosa kita ta discuti ahora . . .

Jon: Amo gayot. Ta mira yo necesita yo le con este otravez para puede yo mas entende.

Cameron: No tu man lingasa. Nuay tambien yo dayun-dayun puede entende con este. Pero, ojala el cosa kita ya discuti ahora ya puede ayuda contigo para mira que el maga Testigo de Jehova tan base na Biblia el diila creencia acerca na Reino.

Jon: Si, bilib ga’t yo cay pirmi ustedes tan base na Biblia el de ustedes creencia.

Cameron: Y ta mira yo, ansina tambien el cosa tu quierre. Como cosa yo ya habla, gendeh con este facil entende. Posible, tiene pa tu cuanto pregunta. Por ejemplo, ya puede kita entende que el siete tiempo tiene coneccion na Reino del Dios y que ya principia este del 607 B.C.E. Pero, porque kita asigurao que el siete tiempo ya termina del 1914? *

Jon: Si, ta pensa tambien yo acerca con ese.

Cameron: El Biblia mismo el puede ayuda kanaton para determina si cosa exacto el largor del siete tiempo. Quierre ba tu que discuti kita con ese topico na de mio birada? *

Jon: Si.