Cameron: Alegre yo contigo mira otravez, Jon. Tan enjoy gayot yo con el diaton Bible study cada semana. * Quetal ya tu?

Jon: OK lang man, gracias.

Cameron: Bueno cay OK lang tu. Del last time cuando taqui yo, ya discuti kita si porque el maga Testigo de Jehova ta habla que el Reino del Dios ya principia rula del 1914. * Como cosa kita ya discuti, ya puede kita incuntra maga evidencia na un profecia na capitulo 4 na libro de Daniel. Ta acorda pa ba tu si cosa quel?

Jon: Si, acerca quel na un grande pono na sueño de Rey Nabucodonosor.

Cameron: Si, justo. Na de suyu sueño, si Nabucodonosor ya puede mira un bien grande pono que ya alcanza na cielo. Ya puede le oi con el angel del Dios que ta manda curta con el pono. Pero, ya manda el Dios que deja con el tuud y reiz de este. Despues del “siete tiempo,” el pono hay crici otravez. * Ya puede tambien kita discuti si porque este profecia tiene dos cumplimiento. Ta acorda pa ba tu el primer cumplimiento?

Jon: Acerca quel na cosa ya sucede con Nabucodonosor, gendeh ba? Ya perde el de suyu pensamiento por siete año.

Cameron: Exacto. Temporario ya perde el pensamiento de Nabucodonosor poreso ya descanza el de suyu rulanza. Pero na segundo cumplimiento del profecia, el rulanza del Dios hay descanza por siete tiempo. Como cosa kita ya discuti, el siete tiempo ya principia cuando ya destroza con el Jerusalem del 607 B.C.E. Desde aquel tiempo, nuay mas ya maga rey na tierra quien ta representa con el rulanza de Dios Jehova. Pero na fin del siete tiempo, hay principia rula el nuevo Rey con quien ya iscuji el Dios y ese Rey un persona na cielo. Quierre decir, na fin del siete tiempo, alli ya hay principia rula el Reino del Dios na cielo. Ahora, ya puede ya kita discuti si cuando ya principia el siete tiempo. Si puede kita determina si paquemodo de largo el siete tiempo, hay puede kita sabe si cuando ya principia rula el Reino del Dios. Ya puede lang ba tu entende?

Jon: Si, el repaso que ya hace kita ya ayuda conmigo para acorda con el cosa kita ya puede discuti.

Cameron: Bueno. Ahora, principia kita discuti si paquemodo de largo el siete tiempo. Amo pa lang yo ya acaba le con este topico para ayuda conmigo acorda el maga importante punto. Pricura yo explica enbuenamente este contigo.

Jon: OK.

Cameron: Na primer cumplimiento del profecia donde envuelto si Nabucodonosor, el siete tiempo claro ta refiri na siete maga literal año. Pero na segundo cumplimiento donde envuelto el Reino del Dios, el siete tiempo mas largo compara na siete literal año.

Jon: Porque tu se ya puede habla?

Cameron: Acorda que el siete tiempo ya principia cuando ya destroza con el Jerusalem del 607 B.C.E. Si principia kita cunta siete literal año estaba na ese año, hay guinda kita na año 600 B.C.E. Pero, nuay cosa importante ya sucede na aquel año que tiene coneccion na rulanza del Dios. Y como cosa kita ya discuti del primero, despues del cuanto siglo, cuando taqui si Jesus na tierra, ya indica le que el siete tiempo nuay pa acaba.

Jon: Ah, si. Ta acorda ya yo ahora.

Cameron: Entonces, el siete tiempo gendeh siete maga literal año, sino mas largo pa.

Jon: Paquemodo se de largo?

Cameron: El libro de Revelacion que tiene coneccion na libro de Daniel, puede kanaton ayuda para sabe si paquemodo de largo el siete tiempo. Ya menciona este que el tres y media tiempo tiene largor de 1,260 dia. * Poreso, el siete tiempo que doble del tres y media tiempo, tiene largor de 2,520 dia. Ya puede ba tu entende?

Jon: Si, ya entende yo. Pero, gendeh siempre yo ta puede mira con el coneccion de este na 1914 cuando ya principia rula el Reino del Dios.

Cameron: OK, mira kita si cosa el coneccion. Tiene vez na Biblia, el un dia ta representa un año. * Si sigui kita con ese manera que un dia por un año, el siete tiempo tiene largor de 2,520 año. Si cunta kita 2,520 año sale 607 B.C.E., hay llega kita na año 1914. * Ansina kita ya puede sabe que ya acaba el siete tiempo del 1914 y ya principia rula si Jesus como Rey na Reino del Dios. Y omento pa, desde 1914, manada maga grande suceso el ya sucede​—maga suceso que el Biblia ya predicta que hay sucede na ultimo maga dia.

Jon: Cosa maga suceso?

Cameron: Considera si cosa ya habla si Jesus aqui na Mateo 24:7. Este el cosa ya habla si Jesus que hay sucede si principia ya le rula na cielo: “Maga nacion ay man guerra contra otro maga nacion, y maga reino ay man guerra contra otro maga reino. Ay tene donde-donde maga calamidad de hambre y maga temblor.” Nota tu que si Jesus ya predicta que durante na aquel tiempo, hay tene escasez de comida y maga temblor. Gendeh ba manada el ya experiencia ansina del ya pasa cien año?

Jon: Si.

Cameron: Na este texto, ya predicta tambien si Jesus que hay tene maga guerra si principia ya le rula como Rey na Reino del Dios. Y el libro de Revelacion ya predicta, gendeh lang maga diutay guerra, sino maga guerra que hay afecta con el entero mundo durante el tiempo del fin. * Ya acorda ba tu si cuando ya sucede el primer guerra mundial?

Jon: Del 1914 quel, igual na año que ta habla tu ya principia rula si Jesus! Ahora lang yo se ya puede pensa.

Cameron: Si, amo se ta dale mira na profecia acerca na siete tiempo y otro maga profecia acerca na tiempo del fin. Convincido el maga Testigo de Jehova que ya principia rula si Jesus como Rey na Reino del Dios del 1914 y na ese mismo año, ya principia el ultimo maga dia. *

Jon: Ta pricura siempre yo entende con este todo.

Cameron: OK lang se. Como cosa yo ya menciona del primero, nuay tambien yo dayun-dayun puede entende con este. Pero ojala, el cosa kita ya discuti ya puede ayuda contigo para mira que maskin nuay especifico ya menciona el Biblia con el año 1914, el maga Testigo de Jehova tan base con el cosa sila ta creé acerca con ese año na Biblia.

Jon: Si, amo se el cosa yo tan bilib con ustedes​—maskin cosa ustedes ta habla, ta usa ustedes con el Biblia para suporta con ese y gendeh lang base na de ustedes opinion. Pero ta pensa lang ba yo, porque man este bien complicao? Porque nuay ya lang habla kanaton el Dios na Biblia que el año 1914 amo el año que ya principia rula si Jesus na cielo?

Cameron: Bonito se pregunta, Jon. Actualmente, manada cosas que nuay especifico ya menciona el Biblia. Entonces, porque ya escribi con el Biblia na manera que necesita hace esfuerzo el maga gente para entende con este? Alegre yo se discuti contigo na sunod visitada de mio.

Jon: Sigui.