Ya nace yo na Székesfehérvár, un bien daan ciudad na Hungary. Maka-triste cay ta puede pa yo acorda con el maga mal resulta del segundo guerra mundial na diamon lugar.

Cuando bata yo, ya hace conmigo engranda el de mio maga aguelo y aguela. Ta puede pa gayot yo acorda kanila​—especialmente con el de mio aguela que si Elisabeth. Ya ayuda le conmigo para tiene fuerte fe con Dios. Desde cuando tres año yo, junto yo con ele ta repiti cada de noche con el cosa ta llama Rezo del Señor. Pero, ya puede lang yo entende si cosa quierre decir de ese rezo cuando cerca yo 30 año.

Cuando bata yo, el de mio maga aguelo y aguela el quien ta cuida conmigo cay el de mio mayores ta trabaja aga y denoche para puede tene sen para cumpra casa. Pero cada segundo Sabado, tan junto come el diamon entero familia. Quierre-quierre gayot yo si tan junto kame.

Del 1958, ya sucede el plano del de mio mayores; ya puede sila cumpra casa onde kame puede queda tres. Bien alegre gayot yo cay puede ya yo queda junto con el de mio mayores! Pero nuay esta este alegria cay despues del seis meses, ya muri el de mio tata na cancer.

Bien triste gayot yo. Ya acorda yo que ya reza yo: “Señor, ya pidi yo contigo que salva con el de mio tata. Necesita yo con ele. Porque tu nuay contesta con el de mio maga rezo?” Quierre gayot yo sabe si onde ya guinda el de mio tata. Ya pensa yo: ‘Ya anda ba le na cielo? O gendeh ya ba gayot le existi?’ Ya envidia yo con el maga bata quien tiene pa tata.

Por cuanto año, ta anda yo na cementerio halos todo’l dia. Ta hinca yo na nicho del de mio tata y ta reza: “Señor, pabor, quierre yo sabe si onde ya el de mio tata.” Ya reza tambien yo que ayuda conmigo entende si cosa el proposito del vida.

Na edad de 13, ya decidi yo que aprende con el lengguaje German. Ya pensa yo que baka na manada libro de German, puede yo incuntra con el maga contestacion del de mio maga pregunta. Del 1967, ya principia yo estudia na ciudad de Jena que parte del East Germany de aquel tiempo. Quierre-quierre yo le con el maga libro del maga German philosopher, especialmente aquellos quien ta explica acerca na proposito del vida. Maskin pa ya puede yo incuntra maga bonito idea, gendeh gayot yo deverasan satisfechao con ese. Ya continua yo reza que incuntra yo con el maga contestacion.

Del 1970, ya bira yo na Hungary donde ya conoce yo con Rose, el quien ya queda de mio mujer. Na aquel tiempo, el Hungary bajo na rulanza del maga Comunista. Corto tiempo despues kame casa de Rose, ya escapa kame para na Austria. Plano diamon que anda na Sydney, Australia, onde ta queda el de mio angkol.

Despues, ya tiene yo trabajo na Austria. Un dia, ya habla conmigo el de mio uban na trabajo que puede yo incuntra con el maga contestacion na todo del de mio maga pregunta na Biblia. Ya dale le conmigo cuanto libro que ta discuti acerca na Biblia. Paspas yo ya le con ese maga libro y quierre pa sabe mas. Poreso, ya escribi yo con el maga Testigo de Jehova, el publisher de ese maga libro y ya pidi pa mas literatura.

Na dia del primer aniversario del diamon casamiento, ya visita kanamon de Rose el un joven Austrian Testigo. Ya lleva le conmigo literatura que ya pidi yo y ya ofrece conmigo un Bible study, y ya acepta yo con ese. Ciendo bien quierre yo aprende, ta estudia kame dos beses na un semana y el cada estudiada ta alcanza maga cuatro hora!

Bien alegre gayot yo na cosa conmigo ya enseña el maga Testigo estaba na Biblia. Cuando ya dale sila mira conmigo el nombre del Dios, Jehova, na de mio Hungarian Bible, nuay gayot yo expecta con ese. Na 27 año que ta anda yo na iglesia, nuay gayot yo oi que ya menciona maskin una vez con el nombre del Dios. Ya gusta yo con el claro y razonable contestacion del Biblia. Por ejemplo, ya aprende yo que nuay cosa sabe el maga muerto que dol bien durmido sila. (Eclesiastes 9:5, 10; Juan 11:11-15) Ya aprende tambien yo con el promesa del Biblia acerca na un nuevo mundo donde “nunca mas ay tene muerte.” (Revelacion 21:3, 4, El Nuevo Testamento na Chavacano) Ta esperanza yo que mira otravez con el de mio tata cay na ese nuevo mundo, “el maga gente . . . ay resucita.”​—Maga Actividad 24:15.

Ya estudia tambien si Rose con el Biblia junto conmigo. Paspas kame ya progresa y ya acaba kame estudia con el libro adentro lang del dos meses! Ya atende kame con el todo miting del maga Testigo que ta hace na Kingdom Hall. Bilib gayot kame cay el maga Testigo de Jehova tiene amor, unidad y tan ayudajan.​—Juan 13:34, 35.

Del 1976, ya cambia kame de Rose na Australia. Ya incuntra dayun kame con el maga Testigo de Jehova alla. Ya sinti dayun kame comfortable por causa na maga Testigo alla. Del 1978, ya queda tambien kame maga Testigo.

Ya incuntra ya yo con el maga contestacion na de mio maga pregunta que bien tarda ya yo ta busca. Cay ya queda yo cerca con Dios Jehova, ya puede tambien yo incuntra con el de con todo buen Tata. (Santiago 4:8) Y ya dale gayot conmigo comforta cay puede yo otravez mira con el de mio tata na nuevo mundo.​—Juan 5:28, 29.

Del 1989, ya decidi kame de Rose que bira na Hungary para puede habla con el cosa kame ya aprende na diamon maga amigo y familia y con otro tambien. Ya tene kame el privilegio que enseña con el Biblia na manada maga gente. Mas de 70 kanila el ya sigui kanamon para sirvi con Jehova, incluido ya el de mio nana.

Ya reza yo por 17 año para incuntra el contestacion na de mio maga pregunta. Ya pasa ya el 39 año y ta reza siempre yo pero ahora ta habla yo, “Gracias contigo, de mio amable Tata na cielo, cay ya contesta tu con el de mio maga rezo cuando bata yo.”