Ya engranda yo na un pobre comunidad na ciudad de Montreal. Cuando seis meses pa lang yo, ya muri de mio tata. Como resulta, el de mio nana el quien ya carga con el todo responsibilidad na casa. Iyo el de con todo menor na ocho man hermano y hermana.

Mientras ta engranda yo, ya queda parte del de mio vida el droga, juego de sen y violencia. Tan junto tambien yo na maga criminal. Ya queda yo bata-bata del maga prostitute y de aquellos quien ta dale presta sen que ta hace loco con otro. Tan imbusterias yo pirmi y alegre yo hace loco con otro na maskin cosa manera que posible. Dol droga ese para conmigo.

Cuando 14 año ya yo, ya queda yo experto hace loco con otro. Por ejemplo, ta cumpra yo manada gold-plated relo, pulseras y maga anillo, y ta marca yo con ese como 14-carat gold. Despues, ta vende yo con ese na maga camino y na maga parking area del maga grande tienda. Quierre-quierre yo aquel facil incuntra sen. Na un ocasion, ya puede yo hace $10,000 na un dia lang!

Despues conmigo manda sale na un reform school na edad de 15, ya queda yo na maga camino, parque y na casa del de mio maga amigo.

Por causa na de mio maga ilegal trabajo, pirmi conmigo ta investiga el maga polis. Ciendo gendeh yo ta vende maga rubao cosas, gendeh conmigo ta hace preso. Pero, manada beses ta paga yo multa cay ta hace yo loco con otro y ta vende sin permit. Nuay yo con quien ta tiene miedo y gane, ya queda yo colector de sen de aquellos quien ta dale presta sen que ta hace loco con otro. Peligroso quel trabajo y tiene vez, ta carga yo pusil. Tiene maga tiempo, ya puede tambien yo trabaja junto con el grupo del maga criminal.

Diez y siete año yo cuando por primer vez ya puede yo oi acerca con el Biblia. Ta queda yo junto con el de mio novia cuando ya principia le man Bible study na maga Testigo de Jehova. Pero, contra yo con el maga principio na Biblia acerca na moral poreso ya deja yo con ele y ya sigui yo na otro mujer con quien tan date ya yo daan.

Ya cambia el todo cuando el de mio segundo novia ya principia tambien man Bible study na maga Witness! Ya hace le maga cambio na de suyu vida y ya gusta yo cay ya queda le mas calmao y pacienciosa. Ya acepta yo con el invitacion que atende na un miting na Kingdom Hall del maga Testigo de Jehova. Yan welcome conmigo alla el maga gente que decente y bueno. Bien diferente sila compara con aquellos con quien yo tan junto de antes! Nunca yo ya sinti na de mio vida que quierre conmigo el de mio familia; cuando bata yo, nuay sila conmigo dale mira amor y trata enbuenamente. El amor que ya sinti yo junto con el maga Testigo de Jehova amo el cosa yo ta busca. Cuando ya ofrece conmigo el maga Witness que man Bible study, alegre yo ya conforma.

Posible que el de mio estudiada na Biblia amo el ya salva conmigo. Ya plaña yo ruba junto con el de mio dos uban para puede yo paga con el de mio maga debe na juego de sen que tiene cantidad de mas de $50,000. Bueno ya lang cay nuay yo porsigui hace con ese! Ya porsigui el de mio maga uban con el diila plano ruba. Ya arresta con el uno y el uno ya muri.

Mientras ta continua yo estudia con el Biblia, ya puede yo mira que necesita yo hace manada cambio na de mio vida. Por ejemplo, ya aprende yo si cosa el Biblia ta habla na 1 Corinto 6:10: “El maga ladron, el maga hambre, el maga borachon, el maga chismoso, y el maga engañador gendeh gayot ay hereda el Reino del Dios.” (El Nuevo Testamento na Chavacano) Cuando ya puede yo le con ese texto, ya llura yo cay sabe yo si paquemodo de manada mal cosas el ya puede yo hace. Ya realiza yo que necesita yo cambia completamente con el de mio manera de vida. (Roma 12:2) Violente yo, agresivo y lleno de imbusterias el de mio vida.

Pero, ya aprende yo que lastimoso y ta perdona si Jehova. (Isaias 1:18) Ya reza gayot yo con ele y ya apela que ayuda conmigo que deja con el de mio manera de vida de antes. Na ayuda de Jehova, hinay-hinay ya puede yo hace cambio na de mio personalidad. El un importante cosa que ya hace kame amo ya casa kame del de mio novia.

Veinte cuatro año yo quel, casao y tiene tres anak. Na ese tiempo, necesita yo busca un decente trabajo. Pero, nuay yo acaba entra escuela y nuay conmigo quien recomenda para na un trabajo. Otravez, ya reza gayot yo con Jehova. Despues, ya anda yo busca trabajo. Si tan apply yo, ta habla yo que quierre yo cambia con el de mio vida y quierre yo tene un decente trabajo. Tiene vez, ta habla yo que ta estudia yo con el Biblia y quierre yo queda mas buen gente na comunidad. Manada el no quierre conmigo saca na trabajo. Na uliji, despues yo habla el todo del de mio pasada na vida na un interview, el quien tan interview ya habla: “No sabe yo si porque pero dol tiene cosa ta manda move conmigo que saca contigo na trabajo.” Asigurao yo que este el contestacion del de mio maga rezo. Ya pasa el cuanto tiempo, iyo y el de mio mujer ya bautiza como maga Testigo de Jehova.

Vivo siempre yo ahora cay ya obedece yo con el cosa ta enseña el Biblia. Tiene yo un alegre familia. Ciendo convincido yo que ya perdona conmigo si Jehova, ya tiene yo un limpio conciencia.

Ta sirvi yo full-time na ministerio adentro de 14 año ya y durante ese tiempo, ya puede yo ayuda con otro aprende si cosa el Biblia ta enseña. Nuevo lang, el de mio mujer ya sirvi tambien full-time na ministerio junto conmigo. Adentro del ya pasa 30 año, ya tiene yo el privilegio que puede ayuda con el 22 uban de mio na trabajo que sirvi tambien con Jehova. Ta anda siempre yo na maga grande tienda pero gendeh para hace loco con el maga gente igual como cosa yo ta hace de antes. Ahora si ta anda yo na ese lugar, ta puede yo habla con otro el cosa yo ta creé. Tiene yo cosa quierre dale kanila: el esperanza que vivi na un nuevo mundo na futuro que donde nuay mas ya maga gente quien ta hace loco con otro.—Salmo 37:10, 11.