Ya engranda yo na Los Angeles, California, U.S.A., na maga lugar donde conocido el maga gang y droga. Seis kame man hermano y hermana y iyo el ika-dos.

Ya hace kanamon engranda el diamon nana como maga miembro del un evangelical religion. Pero como un teenager, tiene yo doble manera de vida. Si Domingo, ta canta yo como choir na iglesia. Na otro dia de semana, ta anda yo na party, ta usa droga y ta comete sexual imoralidad.

Pronto yo rabia y violente. Ta usa yo maskin cosa como armas para ganá. Nuay conmigo puede ayuda el cosa yo ya aprende na iglesia. Pirmi yo ta habla, “Del Señor el vengganza—y iyo el de suyu instrumento!” Del maga 1960 cuando high school yo, ya influencia conmigo el un grupo de politica que conocido como ta defende con el derecho del maga gente. Ya entra yo na un grupo de maga estudiante quien quierre protege con el derecho del maga gente. Na cuanto maga ocasion, tan protesta kame y como resulta, temporario ta cerra con el escuela.

Ciendo bien violente yo, gendeh bastante conmigo que man protesta lang. Poreso, ya participa yo na maga crimen que ta hace por causa na rabia. Por ejemplo, iyo y el de mio maga amigo ya mira un salida donde ta dale mira con el sufrimiento del maga Africano quien ya queda maga esclavo na United States de antes. Por causa na rabia na aquel injusticia, ya gulpia kame con el maga blanco jovenes quien talla na cine. Despues, ya anda kame na lugar del maga blanco para busca con quien gulpia.

Cuando cerca ya yo 20 año, iyo y el de mio maga hermano ya hace manada violente crimen. Ya tiene kame problema na maga autoridad. Uno del de mio maga menor hermano ya queda un miembro del un conocido gang y ya sigui yo kanila. El de mio vida ya queda mas umalin.

Maga Testigo de Jehova el mayores del de mio un amigo. Ya invita sila conmigo na diila maga miting na congregacion y ya acepta yo con ese. Desde el principio, ya mira yo si paquemodo de diferente el maga Testigo. El todo tiene un Biblia y ta usa con ese durante el miting. Maskin el maga jovenes ta dale talk durante el programa! Ya espanta yo cuando ya sabe yo que tiene nombre el Dios, Jehova, y ta usa sila con ese. (Salmo 83:18) Tiene diferente nacionalidad el congregacion pero claro puede mira que nuay division entre kanila.

Del primero, no quierre yo estudia con el Biblia junto con el maga Testigo pero quierre yo anda na diila maga miting. Un noche cuando talla yo na miting del maga Testigo, un grupo del de mio maga amigo el ya anda na un concert. Ya gulpia sila con el un teenager alla hasta ya muri este cay no quierre este dale con el de suyu leather jacket. Pagka-sunod dia, yan hambug sila acerca na crimen que ya hace sila. Gane, ya re pa sila con el diila crimen cuando talla sila na corte. Ya sentencia con el mayoria kanila que man preso na diila entero vida. Bueno ya lang, gendeh yo junto kanila na aquel noche. Ya decidi yo que cambia con el de mio manera de vida y ya principia estudia con el Biblia.

Por causa na manada discriminacion que ya puede yo mira, yan bilib yo na cosa yo ya puede mira na maga Testigo. Por ejemplo, cuando el un blanco Testigo necesita viaja na otro nacion, ya manda le cuida con el de suyu maga anak na un negro familia. Un blanco familia tambien el ya manda queda na diila casa con el un joven negro quien necesita onde queda. Convincido yo que aplicable con el maga Testigo de Jehova el maga palabra de Jesus na Juan 13:35: “Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.” Sabe yo que ya incuntra ya yo maga deverasan hermano y hermana.

Cuando ya estudia yo con el Biblia, ya principia yo realiza que necesita yo hace cambio na de mio pensamiento. Necesita yo hace cambio gendeh lang para tene yo paz con otro sino mira con ese como el de con todo buen manera de vida. (Roma 12:2) Hinay-hinay, ya progresa yo. Del Enero 1974, ya bautiza yo como uno del maga Testigo de Jehova.

Maskin despues yo bautiza, necesita yo siempre controla con el de mio rabia. Por ejemplo, un ocasion cuando ta predica kame na casa en casa, ya hace yo apas con el ladron quien ya ruba con el radio del de mio coche. Cuando cerca ya yo con ele, ya larga le con el radio y ya corre. Cuando ya habla yo con otro si paquemodo yo ya puede saca otravez con el radio, el un anciano ya pregunta conmigo, “Stephen, cosa tu hace si ya puede tu cuji con ele?” Ese pregunta ya manda conmigo pensa y ya motiva conmigo que continua hace cambio na de mio custumbre.

Del Octubre 1974, ya principia yo sirvi como un full-time ministro, donde ta dale 100 hora cada mes para enseña con otro el Biblia. Despues, ya tiene yo el privilegio que man voluntario na world headquarters del maga Testigo de Jehova na Brooklyn, New York. Del 1978, ya bira yo na Los Angeles para cuida con el de mio enfermo nana. Dos año despues, ya casa yo con el de mio amable mujer, si Aarhonda. Grande ayuda gayot le conmigo mientras ta cuida kame con el de mio nana hasta ya muri este. Na uliji, iyo y si Aarhonda ya atende na Watchtower Bible School of Gilead y yan assign kanamon na Panama, donde ya continua kame sirvi como maga misionario.

Desde el de mio bautismo, ya enfrenta yo manada situacion que posible conmigo causa para queda violente. Ya aprende yo que evita con el maga gente quien ta manda conmigo rabia o solva con el situacion na calma manera. Manada gente, incluido el de mio mujer, ya comenda conmigo si paquemodo yo ta puede controla con este maga situacion. Nuay tambien yo expecta que puede yo quel hace! Pero, sabe yo que gendeh yo quel puede hace maga cambio na de mio mismo cuerpo lang. Sino, ta creé yo que ya queda lang se posible por causa na poder del Biblia.—Maga Hebreo 4:12.

El Biblia ya dale proposito con el de mio vida y ya enseña conmigo si paquemodo tene paz con otro. Gendeh ya yo ta gulpia gente ahora; sino, ta ayuda ya yo kanila na espiritual manera. Gane, yan Bible study yo con el de mio enemigo de antes na high school! Despues le bautiza, ya queda kame roommate unrato. Hasta ahora, man amigo kame siempre. Ahora, iyo y el de mio mujer ya ayuda mas de 80 gente que estudia con el Biblia y queda maga Testigo de Jehova.

Ta rindi gayot yo gracias con Jehova cay ya dale le proposito con el de mio vida y alegria junto con el maga deverasan hermano y hermana.