Ya nace yo na Acul, un lejos barrio na monte del Guatemala. Ixil el diamon familia, un tribo que descendiente del maga Maya. Puera na lengguaje Spanish, ya engranda tambien yo que ta converza con el diamon mismo lengguaje. Cuando bata yo, amo tambien el tiempo cuando tiene guerra na Guatemala que ya tarda por 36 año. Durante aquel tiempo, manada Ixil el ya muri.

Cuando cuatro año yo, el de mio hermano que siete año ta juga un granada. Despues, bigla este ya rebenta. Por causa con ese accidente, ya queda yo bulak y maka-triste cay ya muri el de mio hermano. Despues, ya queda yo na un center para na maga bulak bata na Guatemala City, donde ya aprende yo Braille. No sabe yo si cosa el razon pero el maga empleado ya prohibi conmigo que man cuento na otro maga bata y el de mio maga uban estudiante ta evita conmigo. Triste yo pirmi y ta espera gayot yo con el dos meses na un año donde puede yo bolbe kanamon para man junto con el de mio nana quien bueno y lastimosa. Maka-triste, ya muri le cuando diez año yo. Cay ya sinti yo que nuay mas ya el solamente persona quien ta ama conmigo, ya queda yo miserable.

Cuando 11 yo, ya bira yo na diamon lugar y ya queda junto na de mio hermano na tata y con el de suyu familia. Ya dale sila el de mio fisical necesidad pero nuay quien ta ayuda conmigo na emocional manera. Tiene vez, ta pregunta yo con Dios: “Porque ya muri el de mio nana? Porque yo ya queda bulak?” Ya habla conmigo el maga gente que este maga tragedia querrer del Dios. Poreso, ya pensa yo que nuay queber el Dios y tiene le con quien tan afavor. El solamente razon si porque yo nuay man suicide amo cay no sabe yo si paquemodo quel hace.

Cay bulak yo, gendeh yo ta puede protege con el de mio mismo cuerpo. Cuando bata yo, cuanto beses conmigo yan rape. Nuay yo reporta con ese maga crimen cay ya pensa yo nuay conmigo queber el maga gente. Ralo lang tan cuento conmigo el maga gente y gendeh tambien yo tan cuento con maskin quien. Pirmi yo solo, depress y nuay yo con quien ta confia.

Cuando nuevo yo yan teenager, dos Testigo de Jehova (man maridable) el ya atraca conmigo durante el recess na escuela. El uno del de mio maestra na escuela, quien ta tiene lastima conmigo, ya pidi kanila que visita conmigo. Ya habla sila conmigo acerca na promesa del Biblia que el maga muerto hay resucita y llega el tiempo hay puede otravez mira el maga bulak. (Isaias 35:5; Juan 5:28, 29) Ya gusta yo el cosa sila ya habla conmigo pero dificil conmigo para converza kanila cay nuay yo man anad man cuento. Pero maskin pa ansina, bien bueno sila y con paciencia ya continua visita conmigo para enseña conmigo acerca na Biblia. Este maridable ya camina mas de diez kilometro y ya subi monte para llega na diamon barrio.

El de mio hermano na tata ya habla conmigo que este maridable presentable el mudada pero gendeh rico. Maskin pa ansina, pirmi sila ta dale mira personal interes conmigo y ta lleva maga regalo. Ya sinti yo que el maga verdadero Cristiano lang el conforme hace ansina maga sacrificio.

Ya estudia con el Biblia na ayuda del maga publicacion na Braille. Maskin pa ta entende yo con el cosa yo ta aprende, tiene cuanto cosas que dificil conmigo para acepta. Por ejemplo, yan dificil yo creé que el Dios deverasan interesao conmigo como un persona y que el otro ta sinti tambien igual ansina acerca conmigo. Ya entende yo si porque si Jehova temporario ya permiti con el maldad. Pero, bien dificil para conmigo que mira con ele como un amable Tata. *

Hinay-hinay, el cosa yo ya aprende na Escritura ya ayuda conmigo para cambia con el de mio mirada. Por ejemplo, ya aprende yo que el Dios tiene grande empatia para con aquellos quien ta sufri. Acerca con el de suyu maga siervo con quien ya maltrata, el Dios ya habla: “Ya puede yo mira el sufrimiento del de mio maga siervo . . . Sabe gayot yo el dolor que ta sinti sila.” (Exodo 3:7) Cuando ya aprende yo aprecia con el maga bonito calidad de Jehova, ya manda este move conmigo para dedica el de mio vida con ele. Del 1998, ya bautiza conmigo como uno del maga Testigo de Jehova.

Maga un año despues yo bautiza, ya saca yo un curso para na maga bulak cerca na ciudad de Escuintla. El un anciano na un congregacion alla ya puede sabe acerca na maga dificultad que ta enfrenta yo para puede atende miting mientras ta queda na diamon barrio. Para puede anda na maga miting, necesita yo viaja na igual monte onde ya pasa el man maridable Testigo para estudia el Biblia conmigo. Para ayuda conmigo, el anciano ya puede incuntra un familia que maga Testigo de Jehova na Escuintla quien conforme manda queda conmigo na diila casa y ayuda conmigo para atende maga miting na congregacion. Hasta ahora, ta cuida sila conmigo que dol un miembro yo na diila familia.

Puede pa yo relata manada maga ejemplo del deverasan amor que ya dale mira el maga hermano y hermana na congregacion. Este maga experiencia ta convinci conmigo que como uno del maga Testigo de Jehova, incluido yo na maga deverasan Cristiano.—Juan 13:34, 35.

Gendeh mas yo ta sinti que nuay yo valor y nuay esperanza. Tiene ya proposito el de mio vida ahora. Como un full-time ministro del maga Testigo de Jehova, tan focus yo na de mio trabajo que enseña con otro el precioso verdad na Biblia en vez de man focus na de mio situacion. Tiene tambien yo el privilegio que sirvi como un anciano na congregacion y dale maga discurso base na Biblia na maga congregacion na diamon lugar. Tiene pa gane yo el privilegio que dale maga talk que base na Biblia na maga asemblea de region donde miles de maga gente el ta atende.

Del 2010, ya gradua yo na Ministerial Training School (ahora ta llama School for Kingdom Evangelizers) que ya hace na El Salvador. Ese escuela ya ayuda conmigo para mas puede cumpli el de mio maga responsibilidad na congregacion. Ese training ya manda conmigo sinti que ta aprecia y ta ama conmigo si Dios Jehova, quien puede hace cualificao con maskin quien para hace con el de suyu trabajo.

Si Jesus ya habla: “Mas grande el alegria de aquel quien ta dale contra con el quien ta recivi.” (Maga Actividad 20:35) Ahora, puede yo habla que deverasan yo alegre y maskin pa de antes nuay yo pensa que posible este, ta sinti yo que puede ya yo ayuda con otro.