EL PROBLEMA: Ya puede preserva con el Biblia maskin pa na oposicion y na posibilidad que queda malo el material onde con este ya escribi. Pero, el cuanto del maga quien ya copia con este y maga translator ya pricura cambia con el mensaje del Biblia. Ya hace sila se para el Biblia man uyun na diila doctrina en vez de cambia con el diila doctrina para man uyun na Biblia. Considera con el cuanto ejemplo:

• Lugar de adoranza: Entre del ika-cuatro y ika-dos siglo B.C.E., el maga escritor del Samaritan Pentateuch ya omenta con el maga palabra “na Aargaareezem. Y alla hay construi tu un altar” despues del Exodo 20:17. Ya hace quel el maga Samaritano para hace sale que el Escritura ta suporta con el diila construida de templo na “Aargaareezem” o na Monte de Gerizim.

• Doctrina de Trinidad: Nuay pa llega 300 año despues completa el Biblia, el un escritor quien ta creé na Trinidad ya omenta con el maga palabra “na cielo, el Tata, el Palabra y el Espiritu Santo: y este tres uno lang” na 1 San Juan 5:7. Este maga palabra nuay na original manuscrito. “Desde ika-seis siglo,” ya habla el un scholar de Biblia que si Bruce Metzger, ese maga palabra “manada beses ya aparece na maga manuscrito de Old Latin y de [Latin] Vulgate.”

• Nombre del Dios: Por causa cay el cuanto Judio ya habla que gendeh debe usa con el nombre del Dios cay bien sagrao este, manada translator del Biblia el ya quita con ese na Escritura. Ya cambia sila con este maga palabra igual na “Dios” o “Señor” pero este maga titulo ya usa tambien na Biblia para refiri con el maga gente, maga falso dios y maskin con el Diablo.—Juan 10:34, 35; 1 Corinto 8:5, 6; 2 Corinto 4:4.

SI PAQUEMODO YA PRESERVA CON EL BIBLIA: Una, maskin pa el cuanto del quien ya copia con el Biblia nuay hace enbuenamente con el diila trabajo y ya pricura pa gane cambia con el mensaje de este, manada el con cuidao y ya copia con este enbuenamente. Entre el ika-seis y ika-diez siglo C.E., el maga Masorete ya copia con el Hebreo Escritura y ya produci con el cosa ta llama Masoretic text. Asegun pa que ya cunta sila con el maga palabra y con el maga letra para asigura que nuay kamali na cosa sila ya copia. Si ta sinti sila que tiene maga kamali onde sila ya copia, ta escribi este sila na margin. Nuay sila hace maskin cosa cambio na mensaje del Biblia. Si Professor Moshe Goshen-Gottstein ya escribi: “Si el un persona intencional cambia con el mensaje del Biblia, amo este el de con todo grabe crimen para na maga Masorete.”

Ika-dos, por causa cay bien manada manuscrito el tiene ahora, ya puede este ayuda con el maga scholar del Biblia para puede mira si onde tiene kamali. Por ejemplo, el maga religioso lider ta enseña por cuanto siglo que el translation de Biblia na Latin amo ta contene el justo mensaje. Pero na diila translation del 1 San Juan 5:7, ya omenta sila con el maga palabra que ya menciona del primero na este articulo. Este maga gendeh justo palabra ya puede tambien incuntra maskin na King James Version na Ingles—el version que manada gente ta confia. Pero cuando ya incuntra con el otro maga manuscrito, cosa sila ya discubri? Si Bruce Metzger ya escribi: “El maga palabra [na 1 San Juan 5:7] gendeh puede incuntra na maga manuscrito de todo version del Biblia de antes (Syriac, Coptic, Armenian, Ethiopic, Arabic, Slavonic), puera lang na Latin.” Como resulta, ya quita con este gendeh justo frase na maga revisao King James Version y na otro Biblia.

El maga mas daan manuscrito ba ya dale prueba que ya puede preserva con el mensaje del Biblia? Cuando ya incuntra con el Dead Sea Scrolls del 1947, el maga scholar ya puede compara con el Hebrew Masoretic text na cosa ta contene el maga rollo del Biblia que ya escribi mas de un mil año compara con ese manuscrito. El un experto ya habla que el un rollo de Dead Sea Scrolls “ta dale claro prueba que con cuidao y nuay cosa ya cambia el maga Judio quien ya copia con el Biblia adentro de mas de un mil año.”

Puede incuntra na Chester Beatty Library na Dublin, Ireland, con el un coleccion del maga parte del cerca todo libro del Cristiano Griego Escritura que ya escribi na papiro, incluido el maga manuscrito que ya escribi del ika-dos siglo C.E.—maga 100 año lang despues completa el Biblia. “Maskin pa este coleccion ta dale maga nuevo informacion acerca na cosa ta contene el Biblia,” el The Anchor Bible Dictionary ya habla, “ta dale tambien este prueba que nuay cambia el mensaje del Biblia maskin cuanto beses con este ya copia.”

EL RESULTA: Por causa cay tiene kita maga bien daan manuscrito y manada copia de este, ya puede este ayuda para gendeh cambia con el mensaje del Biblia. “Nuay otro libro de antes el igual na Biblia que tiene ansina de daan y bien manada copia que ta suporta con el mensaje de este,” ya escribi si Sir Frederic Kenyon acerca na Cristiano Griego Escritura, “y nuay scholar quien nega que el cosa kita tiene ahora amo ta contene el original mensaje del Biblia.” Y acerca na Hebreo Escritura, el un scholar que si William Henry Green ya habla: “Puede kita habla que nuay otro manuscrito de antes que bien exacto ya puede copia.”