Del 1949, ya cambia el de mio tata estaba na Germany para na Australia. Ya busca le trabajo y ya esta na Victoria. Despues, ya casa le con el de mio nana y ya nace yo del 1953.

Despues lang del cuanto año, ya principia estudia el de mio nana con el Biblia junto na maga Testigo de Jehova. Poreso, ta acorda yo que ta aprende ya yo acerca na Biblia maskin cuando bien diutay pa yo. Pero, no quierre gayot si Papang con el maga religion. Ya queda le violente y ta tiene miedo el de mio nana con ele. Ya continua si Mamang pa-secreto estudia con el Biblia y ya gusta le con el cosa le ta aprende. Si nuay si Papang, ta habla el de mio nana el cosa ele ya aprende conmigo y con el de mio hermana. Ya habla le kanamon acerca el paraiso y si paquemodo kame puede queda alegre si sigui kame con el maga principio na Biblia.​—Salmo 37:10, 29; Isaias 48:17.

Cuando 18 año yo, ya sale yo na casa cay violente gayot el de mio tata. Maskin ta creé yo na cosa ya enseña si Mamang acerca na Biblia, gendeh yo ta sinti que importante se. Poreso, nuay yo aplica con ese. Ya principia yo trabaja como un electrician na minajan de carbon. Cuando 20 año yo, ya casa yo. Despues del tres año, ya nace el diamon primer anak mujer y ya considera yo otravez si cosa el importante na de mio vida. Sabe yo que puede ayuda el Biblia con el diamon familia poreso ya principia yo estudia con el Biblia junto na uno del maga Testigo de Jehova. Pero, contra gayot el de mio mujer na maga Testigo. Cuando ya atende yo con el uno del diila maga miting, ya manda le conmigo iscuji​—descanza con el de mio Bible study o deja con el de mio familia. Nuay yo cosa ya puede hace. Ya sigui yo con el cosa le quierre y nuay mas man junto con el maga Testigo. Na uliji, yan mahay yo cay nuay yo continua hace con el un cosa que sabe yo justo.

Un dia, el de mio maga uban na trabajo ya introduci conmigo na pornografia. Ya gusta yo con ese pero ta asquia tambien yo con ese y ta sinti bien culpable. Sabe yo que ta enseña el Biblia que mali este poreso ta creé yo que castiga conmigo el Dios. Pero cay pirmi yo ta mira maga gendeh bueno letrato, ya cambia el de mio mirada na pornografia. Na uliji, ya queda yo addict con ese.

Na sunod 20 año, mas ya queda umalin el de mio custumbre. Por causa se na maga cosa yo ta mira. Ta habla yo maga mal palabra y quierre-quierre yo maga broma que bastos. Ya tiene yo gendeh justo mirada na sex. Maskin ta queda yo junto na de mio mujer, ta tiene yo relacion na otro maga mujer. Un dia, ya mira yo na espejo y ya habla yo, ‘No quierre yo con bo.’ Ya principia yo odia con el de mio mismo cuerpo.

Yan divurcio kame del de mio mujer y bien trambulicao el de mio vida. Ya reza yo con Jehova con todo corazon. Yan Bible study yo otravez maskin 20 año ya el ya pasa desde na de mio ultimo Bible study. Aquel tiempo, muerto ya el de mio tata y bautizao ya el de mio nana como un Testigo de Jehova.

Bien diferente gayot el de mio manera de vida na cosa ta enseña el Biblia. Pero ahora, determinao ya yo tene el paz na pensamiento que ya promete el Biblia. Gendeh mas yo ta usa maga mal palabra, ta habla maga broma que bastos y ta controla ya yo con el de mio rabia. Nuay mas yo continua na de mio imoral manera de vida. Nuay mas yo juga maga juego de sen, sobra toma y ruba na de mio amo.

Gendeh ta puede entende el de mio maga uban na trabajo si porque yo quierre hace maga grande cambio. Por tres año, pirmi sila ta hace maga cosas para bira yo na de mio daan manera de vida. Si tan kamali yo, igual si ta rabia yo o ta puede habla mal palabra, alegre sila ta habla: “Ese! Amo se el deverasan Joe.” Ta sinti gayot yo duele si ta habla se sila! Ta sinti yo que dol nuay mas yo esperanza para cambia.

Tiene maga material de pornografia maskin onde na lugar onde kame ta trabaja. Pirmi ta imbia maga bastos letrato el de mio maga uban na trabajo por medio na diila maga computer, igual como cosa yo ta hace de antes. Ta pricura yo quita con el de mio adiccion pero dol determinao sila hace cosas para gendeh yo se puede hace. Ya pidi yo ayuda con el quien tan Bible study conmigo. Con paciencia le ya oi mientras ta habla yo con ele el de mio maga problema. Usando el cuanto maga texto na Biblia, ya dale le mira conmigo si paquemodo yo quita con el de mio adiccion y ya anima le conmigo que pirmi pidi el ayuda de Jehova por medio na rezo.​—Salmo 119:37.

Un dia, ya habla yo con el de mio maga uban na trabajo que man miting kame. Cuando junto ya kame, ya habla yo kanila que dale beer con el dos uban diamon na trabajo que addict na maga alcoholico tomada. Ya habla sila todo: “Gendeh kame se hace! Ta pricura gane se sila quita con el diila adiccion!” Ya contesta yo: “Ansina tambien yo.” Desde aquel, ya entende ya sila el de mio problema na pornografia y gendeh mas sila ta forza conmigo que bira na de mio manera de vida de antes.

Na uliji, na ayuda de Jehova, ya puede yo quita con el de mio adiccion na pornografia. Del 1999, ya bautiza yo como uno del maga Testigo de Jehova y alegre yo cay ya tiene yo el oportunidad para vivi un decente y alegre vida.

Ta entende ya yo ahora si porque ta odia si Jehova con el maga cosas que ta ama yo de antes. Como un amable Tata, quierre le protege conmigo na maga mal resulta del pornografia. Bien deverasan el cosa ta habla na Proverbio 3:5, 6! Este ta habla: “Confia con Jehova con todo de tuyu corazon y no confia con el de tuyu mismo entendimiento. Considera con ele pirmi na todo cosa tu hace, y hay hace le derecho el de tuyu camino.” El maga principio na Biblia gendeh lang un proteccion sino un garantia tambien para tene buen exito.​—Salmo 1:1-3.

De antes, ta asquia yo con el de mio mismo cuerpo pero ahora tiene ya yo respeto na cuerpo y paz na pensamiento. Limpio el de mio manera de vida y ta sinti yo el perdon y suporta de Jehova. Del 2000, ya casa yo con Karolin, un bonita Cristiano hermana quien ta ama tambien con Jehova. Tiene paz na diamon familia. Un grande privilegio gayot para kanamon que queda parte del un limpio y amable organizacion del maga hermano y hermana na entero mundo.