Nuay otro libro acerca na religion igual na Biblia. Este el libro que ya tiene grande influencia na manada gente adentro de largo tiempo. Pero, este tambien el libro que ya examina enbuenamente el maga critico para busca kamali.

Por ejemplo, tan duda el cuanto scholar si el maga Biblia ba ahora igual na original maga copia. “Gendeh kita puede asigura que exacto kita ya puede copia con el mensaje del original manuscrito,” ya habla el un professor quien ta estudia acerca na religion. “El cosa lang kita tiene amo maga copia que manada kamali y el mayoria de este ya hace cuanto siglo despues escribi con el original maga copia y claro que bien diferente este na manada manera si compara con el original manuscrito.”

El cuanto gente de otro religion ta creé que cambiao el cosa escribido na Biblia. Por ejemplo, el familia de Faizal que gendeh maga Cristiano ya enseña con ele que el Biblia amo un sagrao libro pero cambiao ya el mensaje de este. “Como resulta, gendeh yo ta confia con el maga gente quien quierre man cuento conmigo acerca na Biblia,” ya habla le. “Cambiao ya el mensaje de ese! Poreso, porque man yo kanila creé ciendo nuay man sila el original Biblia?”

Importante ba sabe si ya cambia o nuay el cosa escribido na Biblia? Considera con este maga pregunta: Puede ba tu confia con el maga bonito promesa del Biblia para na futuro si gendeh tu asigurao que escribido ese na original manuscrito? (Roma 15:4) Hay aplica ba tu con el maga principio na Biblia para hace maga importante decision acerca na trabajo, familia o adoranza si manada kamali na maga copia del moderno Biblia que ya hace el maga gente?

Maskin pa nuay mas ya el maga original libro del Biblia, puede kita consulta na maga copia de este de antes—incluido aqui el miles de maga manuscrito del Biblia. Paquemodo ya puede preserva con el maga manuscrito maskin pa posible queda malo el material onde con este ya escribi, tiene maga oposicion y ya pricura cambia con el mensaje de este? Paquemodo este puede ayuda contigo para confia con el cosa tu ta le na Biblia? Considera con el contestacion de ese maga pregunta na siguiente istoria acerca si paquemodo ya puede preserva con el Biblia.