Ya puede preserva con el Biblia. Como resulta, puede tu obtene y le un copia de este ahora. Y si puede tu iscuji un buen translation del Escritura, puede tu confia que el cosa tu le amo gayot el original mensaje. * Pero porque ya puede preserva con el Biblia maskin pa posible queda malo el material onde este ya escribi, tiene grabe oposicion y ya pricura cambia con el mensaje de este? Cosa ta hace especial con este libro?

Manada quien ta estudia con el Biblia yan uyun con el cosa ya escribi si apostol Pablo: “Todo el maga Escritura inspirao de Dios.” (2 Timoteo 3:16) Ta creé sila que ya puede preserva con el Biblia cay palabra se del Dios y ya protege le con ese hasta ahora. Si Faizal, ya menciona na primer articulo de este serie, ya decidi que estudia con el Biblia para sabe si deverasan ba el cosa ta clama el otro. Ya espanta le con el cosa le ya discubri. Ya puede le aprende que manada na maga enseñanza de aquellos quien ta clama Cristiano nuay na Biblia. Alegre le sabe na Biblia si cosa el proposito del Dios para aqui na tierra.

“Convincido ya yo ahora que el Biblia que tiene yo amo un regalo estaba con Dios,” ya habla le. “Si ya puede el Dios crea con el universo, facil lang para con ele que dale kanaton un libro y protege con ese. Cay si pensa yo que gendeh se puede hace el Dios, igual lang como ta habla yo que limitao el de suyu poder. Pero, quien man yo para pensa ansina?”—Isaias 40:8.