EL PINAKA-TEMA | EL BIBLIA—UN ISTORIA SI PAQUEMODO YA PUEDE PRESERVA
Ya Preserva con el Biblia Maskin Pa Tiene Oposicion
EL PROBLEMA: Manada maga politico y lider del religion ta hace maga cosas que ta condena el Biblia. Ya usa sila con el diila autoridad para previni con el maga gente que tene, produci o man translate con el Biblia. Considera con el dos ejemplo:
Del maga 167 B.C.E.: El rey, si Antiochus Epiphanes, quien ya forza con el maga Judio que sigui con el religion del maga Griego, ya dale mandato que destroza con el todo copia del Hebreo Escritura. Asegun con el un historian, si Heinrich Graetz, el maga oficial del rey “ya hace rompe y ya quema con el maga rollo del Ley maskin onde sila con ese incuntra y ya mata con aquellos quien quierre le con ese.”
Del Middle Ages: Rabiao el cuanto maga lider del Catolico con el maga ordinario miembro del Iglesia quien ta enseña con el cosa ta habla el Biblia en vez con el doctrina del Iglesia Catolico. Si el un persona tiene el maskin cosa parte del Biblia puera con el Salmo na Latin, hay considera con ele como un traidor de Iglesia. Na un miting na Iglesia, el maga lider del religion ya manda con el diila maga gente que “hace buscada na todo casa y maga basement que donde posible ta esconde el maga gente con el maga parte de Biblia. . . . Hay destroza con el casa si puede incuntra alla un persona quien traidor.”
Si aquellos quien tan contra con el Biblia ya puede destroza con ese, hay perde tambien el mensaje de este.
Ya puede preserva con el translation de Biblia na Ingles de William Tyndale maskin pa ya prohibi con el Biblia, ya quema con el maga copia de este y ya mata con Tyndale del 1536
SI PAQUEMODO YA PRESERVA CON EL BIBLIA: Si Rey Antiochus ya concentra con el de suyu campaña na Israel pero el maga Judio ya forma maga comunidad na otro maga lugar. Gane, el maga scholar ya carcula que del primer siglo C.E., tiene mas de 60 por ciento de Judio quien ta queda apuera de Israel. El maga Judio tiene maga copia de Escritura na diila maga sinagoga y na uliji, ese mismo maga copia amo el ya usa el maga Cristiano.—Maga Actividad 15:21.
Durante del Middle Ages, aquellos quien ta ama con el Biblia con animo ya continua man translate y copia con el maga Escritura maskin pa tiene persecucion. Antes pa de principia man print con el Biblia, mas de 500 año ya el ya pasa, ya man translate ya con este y ya copia mano-mano na maga 33 lengguaje. Despues de aquel tiempo, mas pronto ya man translate y produci con el Biblia.
EL RESULTA: Maskin pa el maga poderoso rey y lider del religion ya pricura destroza con el Biblia, puede le con este ahora maskin onde parte del mundo y ya man translate con este na mas manada lengguaje contra na maskin cosa libro. Ya influencia se con el ley y lengguaje del cuanto maga nacion y con el vida del millones de maga gente.
