Cosa el lehida de Biblia para contigo, boring o maka-enjoy? Ta depende se na manera del de tuyu lehida. Mira kita si cosa tu puede hace para mas man enjoy tu de tuyu lehida.

Iscuji translation que puede tu confia y ta usa el moderno lengguaje. Si ta le tu un material que ta contene maga dificil y de antes palabra que gendeh tu familiar, posible gendeh tu man enjoy na de tuyu lehida. Poreso, iscuji un Biblia que ta usa maga palabra que facil para entende y ta alcanza na de tuyu corazon. Pero, debe exacto tambien el translation de ese. *

Usa con el moderno tecnologia. El Biblia puede obtene ahora gendeh lang na hard copy sino na electronic format tambien. El cuanto Biblia puede le online o puede tu man download con ese na de tuyu computer, tablet o cell phone. El cuanto version del Biblia tiene omento maga tool que puede tu usa para mira con el otro maga texto acerca na un topico o compara con el un texto na otro maga translation. Si quierre tu oi contra le, el Biblia tiene tambien na audio format. Manada tan enjoy oi con este mientras tan viaje sila, tan labada o ta hace otro maga actividad que donde posible kanila para hace se. Puede tu pruba usa maskin cosa format del Biblia que comfortable tu.

Usa maga tool para na estudiada del Biblia. Puede este ayuda contigo para mas beneficia na de tuyu lehida. Tiene maga mapa que puede ayuda contigo para mira si onde parte el maga lugar que ya puede tu le na Biblia y sabe si onde ya sucede el un suceso. El maga articulo igual na cosa tu puede mira na este magasin o na seccion “Enseñanza del Biblia” na jw.org website puede ayuda contigo para entende si cosa quierre decir del manada texto na Biblia.

Cambia-cambia con el de tuyu manera. Si ta sinti tu dol dificil le con el entero Biblia, puede tu principia le con el un porcion que interesao tu. Si quierre tu sabe pa mas acerca na maga conocido persona na Biblia, puede tu le asegun na ese maga caracter. Puede tu mira un sampol de ese manera na cajon “ Estudia Pa Mas—Conoce con el maga Caracter na Biblia” que incluido na este articulo. O puede tambien tu le con el Biblia asegun na topico o asegun na maga suceso que ya sucede. Puede tu pruba con el uno na este maga manera.