Ya nace yo na Paddington, un lugar que manada gente na London, England. Ta queda yo junto con el de mio nana y tres hermana mayor. Gendeh pirmi ta queda junto kanamon el diamon tata cay por demas le ta toma.

Cuando bata yo, ya enseña conmigo el de mio nana reza todo el noche. Tiene yo un diutay Biblia que ta contene el Salmo y ta pone yo tono con ese para puede yo canta. Ta acorda yo un frase que ya le yo na uno del de mio maga libro que ya esta na de mio pensamiento: “Llega el tiempo, nuay mas ya mañana.” Gendeh yo ta puede durmi por causa con aquel maga palabra cay ta pensa yo acerca na futuro. ‘Asigurao, gendeh lang ansina el vida,’ ya pensa yo. ‘Porque man yo taqui?’ No quierre yo muri!

Ya queda yo bien curioso acerca na maga espiritu y maga buruju. Ya pruba yo man cuento na maga muerto, visita na cementerio junto na de mio maga uban na escuela y mira maga salida de horror junto kanila. Ta pensa kame que maskin maka-miedo pero bonito quel.

Ya principia yo man rebelde cuando maga diez año pa lang yo. Ya aprende yo puma y pronto lang yo ya queda addict con ese. Despues, ya principia yo puma marijuana. Na edad de 11, ta toma ya yo maga alcoholico tomada. Maskin pa no quierre yo el sabor de ese, quierre-quierre yo el efecto si burracho yo. Quierre-quierre tambien yo maga musica y bailada. Ta anda yo na maga party y nightclub. Ta escapa yo denoche y ta bira otravez antes man aga. Cay cansao yo pagka-alamañana, pirmi yo tan labuyo na escuela. Si ta atende yo na clase, ta toma yo antes y despues de ese.

Ya sabe de mio nana acerca na de mio conducta cuando ya ricibi yo bien bajo grado na de mio ultimo año na escuela. Bien desmayao y rabiao gayot le. Yan peleajan kame y ya sale yo na casa. Ya esta yo junto na de mio novio, si Tony. Ta ruba le y ta vende maga droga y conoce con ele como un bien violente persona. Nuay dura, yan priñada yo y na edad lang de 16, ya pari yo con el diamon anak hombre.

Ya conoce yo con el maga Testigo de Jehova por primer vez cuando temporario yo ta queda na un lugar para na maga gendeh casao nana y diila baby. Ya dale conmigo alla un cuarto el maga local autoridad. Dos mujer Testigo el regular ta visita con el cuanto otro maga joven nana. Un dia, yan junto yo kanila mientras ta discuti sila. Intencion de mio que dale prueba que mali el maga Testigo. Pero, ya contesta sila con el cada uno del de mio maga pregunta na calmao y claro manera estaba na Biblia. Ya gusta gayot yo si paquemodo sila de bueno y ya trata conmigo enbuenamente. Poreso, ya conforma yo estudia con el Biblia junto kanila.

Nuay tarda, tiene yo cosa ya aprende estaba na Biblia que ya cambia con el de mio vida. Desde bata yo, ta tiene yo miedo muri. Pero ahora, ya sabe yo acerca na cosa ya enseña si Jesus acerca na resureccion. (Juan 5:28, 29) Ya aprende tambien yo que el Dios tiene personal interes conmigo. (1 Pedro 5:7) Ya penetra gayot na de mio corazon el maga palabra na Jeremias 29:11 que ta habla: “‘Cay sabe yo el maga pensamiento que ta pensa yo para con ustedes,’ si Jehova ya habla, ‘pensamiento de paz, y gendeh de calamidad, para dale con ustedes futuro y esperanza.’” Ya principia ya yo creé que puede yo tene esperanza que vivi hasta para cuando na Paraiso tierra.—Salmo 37:29.

Bien sincero el amor que ya dale mira conmigo el maga Testigo de Jehova. Cuando ya atende yo por primer vez na uno del diila maga miting, bien friendly sila todo! (Juan 13:34, 35) Diferente gayot se na tratamiento que ya ricibi yo na diamon iglesia. Yan welcome conmigo el maga Testigo maskin pa na de mio circumstancia. Ya dale sila conmigo el tiempo, amor, atencion y manada practical ayuda. Ya sinti yo que dol parte yo na un grande y amable familia.

Na de mio estudiada del Biblia, ya realiza yo que necesita yo hace maga cambio na de mio vida para sigui con el maga alto principio del Dios na moral. Yan dificil yo descanza puma cigarillo. Ya observa tambien yo que el cuanto cancion ta hace fuerte con el de mio deseo que puma marijuana poreso ya cambia yo con el cancion que ta oi yo. Para gendeh yo por demas toma, ya descanza ya yo anda na maga party y nightclub. Y ya busca yo maga nuevo amigo y amiga quien tiene positivo influencia que puede ayuda conmigo hace maga cambio na de mio vida.—Proverbio 13:20.

Ya estudia tambien si Tony junto con el maga Testigo de Jehova. Cay ya puede contesta el maga Testigo estaba na Biblia con el de suyu maga pregunta, ya queda tambien le convincido que verdad el cosa le ta aprende. Ya hace le maga grande cambio na de suyu vida: nuay ya le man junto na de suyu maga violente uban, ya descanza ruba y nuay mas ya puma marijuana. Para puede hace alegre con Jehova, ya mira kame que necesita cambia con el diamon imoral manera de vida y dale seguridad con el diamon anak. Ya casa kame del 1982.

Ta acorda yo que ta busca yo maga articulo na maga magasin El Torre de Guardia y Awake! * acerca na maga istoria del maga gente quien ya puede hace maga cambio que quierre yo hace. Ya puede gayot anima conmigo el diila maga buen ejemplo! Ya hace este conmigo fuerte que continua hace esfuerzo y gendeh descanza. Ya continua yo reza con Jehova que ayuda conmigo. Ya bautiza kame de Tony como maga Testigo de Jehova del Julio 1982.

Ya puede salva el de mio vida cay ya tiene yo cerca relacion con Dios Jehova. Ya experiencia kame de Tony con el suporta de Jehova durante el maga dificil tiempo. Ya aprende kame confia con Dios durante na maga dificultad y ta sinti kame que pirmi le ta ayuda y ta sustene con el diamon familia.—Salmo 55:22.

Alegre yo ayuda con el diamon anak hombre y mujer que conoce con Jehova igual conmigo. Ahora, ta sinti yo el semejante alegria mientras ta mira yo con el diila maga anak que ta engranda tambien que tiene saber acerca con Dios.

Ta puede ya yo ahora durmi que gendeh tan lingasa acerca na futuro o muerte. Iyo y si Tony ocupao man viaje na diferente maga congregacion del maga Testigo de Jehova cada semana para anima kanila. Tan junto kame kanila para enseña con otro que si demonstra sila fe con Jesus, puede tambien sila tene vida hasta para cuando.