Ya pensa ba tu le con Biblia pero yan alang-alang por causa cay ya sinti tambien tu el cosa ya menciona arriba? Manada ta sinti que gendeh facil le con Biblia. Pero, quetal si ya sabe tu que el Biblia puede ayuda contigo para vivi con alegria? Y paquemodo si ya sabe tu que tiene maga manera para queda tu mas interesao le con ese? Quierre ba tu mira si cosa el Biblia puede ayuda contigo?

Considera con el cuanto comento estaba con aquellos quien ya puede beneficia cuando ya principia sila le con el Biblia.

El un jovencito, si Ezekiel, ya habla: “De antes, dol aquel yo un persona quien ta maneja coche pero nuay destinacion. Pero por medio na lehida de Biblia, ya tiene proposito el de mio vida. Ta contene se maga practical consejo que puede yo aplica cada dia.”

El un jovencita, si Frieda, ya explica: “Rabiona yo del primero. Pero por causa na lehida de Biblia, ya acerta yo controla de mio mismo cuerpo. Como resulta, ya queda mas facil para con otro que ledia conmigo y ya tiene yo mas manada amiga ahora.”

Si Eunice que mas de 50 año ya el edad, ya habla: “Ta ayuda se conmigo para queda mas buen persona y quita con el de mio maga umalin custumbre.”

Igual como cosa ya puede discubri el maga individual arriba y el millones de maga gente, el lehida de Biblia puede ayuda contigo para tene mas alegre vida. (Isaias 48:17, 18) El Biblia puede ayuda contigo (1) hace maga justo decision, (2) tene maga deverasan amigo y amiga, (3) enfrenta con el stress y (4) el de con todo importante, aprende el verdad acerca con Dios, y na otro pa maga manera. El consejo na Biblia estaba con Dios, poreso hay beneficia gayot tu pirmi si aplica con ese. El Dios nunca dale mal consejo.

El importante amo que puede tu principia. Cosa el maga practical cosas que puede ayuda para queda mas facil principia y mas man enjoy tu le con Biblia?