Cosa puede ayuda contigo para man enjoy tu le con el Biblia y puede beneficia enbuenamente? Nota con el cinco sugestion que efectivo para na manada.

Iscuji justo tiempo y lugar. Iscuji tiempo que silencio. Para puede tu concentra na cosa tu ta le, evita maga cosas que puede contigo destorba. Puede tambien ayuda contigo para mas beneficia enbuenamente na de tuyu lehida si tiene bastante claridad y fresco aire.

Queda preparao para aprende. Ciendo el Biblia estaba na diaton Tata na cielo, hay beneficia gayot tu si queda tu igual na un bata quien preparao para aprende na de suyu amable mayores. Si tiene tu negativo idea acerca con el Biblia, pruba quita con ese na de tuyu pensamiento para puede contigo enseña el Dios.—Salmo 25:4.

Reza antes tu le. El Biblia ta contene el pensamiento del Dios poreso natural lang que necesita kita el de suyu ayuda para puede entende con ese. El Dios ya promete que “ay dale Le el Espiritu Santo [“sagrao espiritu,” NWT] con aquellos quien ta pidi con ele.” (Lucas 11:13, El Nuevo Testamento) El sagrao espiritu puede contigo ayuda para entende con el pensamiento del Dios. Llega el tiempo, hay abri se con el de tuyu pensamiento para entende “masquin pa el mas hondo secreto de Dios.”—1 Corinto 2:10, El Nuevo Testamento na Chavacano.

Le para entende. No le para hace lang acaba con el material. Pensa enbuenamente acerca na cosa tu ta le. Pregunta con el de tuyu mismo cuerpo igual con el siguiente: ‘Cosa calidad tiene el persona na istoria que ta le yo? Paquemodo yo este aplica na de mio vida?’

Tene maga especifico goal. Para puede tu mira el buen resulta del de tuyu lehida de Biblia, tene goal para aprende cosas que puede gayot tu beneficia. El siguiente amo ejemplo na maga goal que puede tu tene: ‘Quierre yo aprende mas acerca con Dios.’ ‘Quierre yo queda mas buen persona, un buen marido o mujer.’ Despues, iscuji maga porcion del Biblia que puede ayuda contigo para alcanza con ese maga goal. *

Este cinco sugestion puede ayuda contigo para principia le con el Biblia. Pero, cosa tu puede hace para mas man enjoy na de tuyu lehida? Tiene cuanto sugestion el sunod articulo.