Gendeh un ordinario libro el Biblia. Ta contene este consejo estaba na diaton Creador. (2 Timoteo 3:16) El mensaje de este puede tiene grande influencia kanaton. Gane, el Biblia ta habla: “El Palabra del Dios vivo y efectivo.” (Maga Hebreo 4:12) Tiene este poder para queda mas enbuenamente el diaton vida na dos importante manera—ta dale este guia na diaton cada dia vida ahora y ta ayuda este kanaton para conoce con Dios y aprende acerca na de suyu maga promesa.—1 Timoteo 4:8; Santiago 4:8.

Queda mas enbuenamente de tuyu vida ahora. El Biblia puede ayuda na maga personal cosas na vida. Ta dale este maga practical consejo acerca na siguiente.

• Relacion con otro.—Efeso 4:31, 32; 5:22, 25, 28, 33.

• Emocion y fisical salud.—Salmo 37:8; Proverbio 17:22.

• Maga principio na moral.—1 Corinto 6:9, 10.

• Financial.—Proverbio 10:4; 28:19; Efeso 4:28. *

El un joven man maridable na Asia ya aprecia gayot con el valor del consejo na Biblia. Igual con el maga nuevo casao, tan dificil sila man adjust na personalidad y tene buen comunicacion na uno y otro. Pero, ya principia sila aplica con el cosa sila ya puede le na Biblia. Cosa el resulta? El marido, si Vicent, ya habla: “El cosa yo ya le na Biblia ya puede ayuda conmigo enfrenta con el maga dificultad na diamon matrimonio na amable manera. Alegre kame tan junto cay ya vivi kame harmonia na Biblia.” Yan uyun el de suyu mujer, si Annalou: “El maga ejemplo que ya le kame na Biblia ya puede ayuda kanamon. Alegre ya yo ahora y contento na diamon matrimonio y maga goal na vida.”

Conoce con Dios. Puera na de suyu comento acerca na matrimonio, ya habla tambien si Vicent: “Ya sinti yo mas cerca con Jehova contra de antes cay ta le yo con el Biblia.” El cosa ya observa si Vicent tan focus na un importante punto—el Biblia puede ayuda contigo conoce con Dios. Si hace tu se, puera que beneficia tu na de suyu consejo, hay conoce tambien tu con ele como un amigo. Puede tu aprende el maga detalle que ya revela le acerca na un buen futuro—un tiempo que donde puede tu tene un “deverasan Vida” que hay esta hasta para cuando. (1 Timoteo 6:19) Un cosa este que gendeh puede dale el maskin cosa libro.

Si principia tu le con el Biblia y continua hace se, puede tambien tu experiencia ese maga beneficio—queda mas enbuenamente el de tuyu vida ahora y puede tu conoce con Dios. Pero mientras ta le tu con el Biblia, posible hay tene tu manada pregunta. Si ansina, acorda con el buen ejemplo del un oficial de Etiopia quien ya vivi 2,000 año ya el ya pasa. Manada le pregunta acerca na Biblia. Cuando ya pregunta con ele si ta entende ba le con el cosa le ta le, ele ya contesta: “Paquemodo man ay puede yo entende si noay quien ta guia conmigo?” * Alegre dayun le ya acepta con el ayuda estaba na un cualificao maestro del Biblia, si Felipe, un dicipulo de Jesus. (Maga Actividad 8:30, 31, 34) Na igual manera, si quierre tu aprende pa mas acerca na Biblia, ta anima kame contigo que man submit un request online na www.pr418.com o escribi na de con todo cerca adres que puede mira na este magasin. Puede tambien tu man contact con el maga Testigo de Jehova que cerca con ustedes o anda na Kingdom Hall na de ustedes lugar. Porque gendeh tu pruba le con el Biblia y permiti que guia se contigo para tene mas buen vida?