IMAGINA ESTE: Tan tour tu na museo que lleno de maga estatua de antes. Mayoria de este matipik, quebrao y tan putput ya. El otro falta ya el cuanto parte de este. Pero tiene uno que bien entacto pa; bien claro el cada detalle de este diseño. “Este ba el de con todo nuevo?” ya pregunta tu na tour guide. “Gendeh,” ele ya contesta, “mas daan se y nuay pa gayot compone con ese maskin una vez.” “Ya cuida ba gayot con este?” ya pregunta tu. “Gendeh,” ya habla el tour guide, “ya tupa ya con este grabe viento y ulan. Y manada ya el ya pricura destroza con este.” Siguro man bilib tu y pensa, ‘Hacido de cosa gaha este?’

Puede kita habla que el Biblia igual con ese estatua. De antes pa gayot este y gane mas daan este contra na mayoria del maga libro. Siempre, tiene tambien maga otro daan libro. Pero igual con el maga daan estatua que yan putput ya, destrozao ya el mayoria del maga escribida de antes cay ya pasa ya el largo tiempo. Por ejemplo, el cosa este ta habla acerca na ciencia gendeh ya uyun na justo informacion que sabe kita ahora. Mas mucho de este consejo acerca na curada ta puede causa peligro en vez de puede ayuda. Y cuanto pedazo ya lang el ya queda na manada del maga escribida de antes cay el otro ya perde o destrozao ya.

Pero bien diferente el Biblia. Ya principia escribi con este mas de 35 siglo ya el ya pasa pero entacto siempre el Biblia. Y maskin manada beses con este ya pricura destroza adentro na manada siglo​—ya quema, ya prohibi y ya hace de menos​—pero el cosa este ta habla nuay cambia. Maskin pa manada ya kita cosa sabe ahora, justo siempre el cosa ta habla el Biblia. Gane, manada de ese maga informacion escribido ya daan na Biblia.

Pero posible pensa tu, ‘Practical pa ba el maga enseñanza del Biblia na diaton tiempo ahora?’ Para contesta con ese, pregunta na de tuyu mismo cuerpo: ‘Cosa maga grabe problema el ta enfrenta el maga gente ahora? Onde alli el bien maka-miedo?’ Posible pensa tu con el guerra, polucion, crimen o corapcion. Ahora, considera kita con el cuanto principio que ta enseña el Biblia. Mientras ta considera con ese, pregunta na de tuyu mismo cuerpo, ‘Si el maga gente ta vivi asegun na este maga principio, mas queda gaha enbuenamente el diaton mundo?’

PAZ

“Alegre aquellos quien ta trabaja por causa del paz, cay ay llama canila maga anak del Dios.” (Mateo 5:9) “Hace todo el que puede para vivi con paz con uno y otro.”​—Roma 12:18.

LASTIMA, PERDON

“Alegre el maga lastimoso, cay (el Dios) ay tene lastima canila.” (Mateo 5:7) “Aguanta y perdona con uno y otro si uno tiene reclamo con otro. Igual como ya perdona el Señor con ustedes, ansina tamen perdona ustedes.”​—Colosa 3:13.

UNIDAD ENTRE NA DIFERENTE RAZA

“Con uno solo gente lang [el Dios] ya hace con todo el maga raza humano para ocupa sila el entero mundo.” (Maga Actividad 17:26) “El Dios noay favorito, pero ta acepta le con todo aquellos quien ta adora con Ele y ta hace cosa bueno, maskin de donde nacion sila.”​—Maga Actividad 10:34, 35.

RESPETO PARA NA TIERRA

“Si Dios Jehova ya pone con el gente na jardin de Eden para cultiva y cuida con este.” (Genesis 2:15) El Dios ‘hay destroza con el maga destrozador del mundo.’​—Revelacion 11:18.

MIRADA NA CANALLADA Y IMORALIDAD

“Tene cuidao con todo clase de ambrentadas, cay el maga bienes del persona no puede asegura el disuyo vida maskin quemodo le de rico.” (Lucas 12:15) “Por causa del maga immoralidad, o maskin cosa clase de pendejadas o cabit, no ustedes permiti maskin nombra lang con esos entre con ustedes.”​—Efeso 5:3.

PAGKA-HONESTO, PAGKA-BUEN TRABAJADOR

“Quierre kame queda honesto na todo cosas.” (Maga Hebreo 13:18, NWT) “Si tiene de ustedes estaba un ladron, no mas ya roba, sino precura trabaja.”​—Efeso 4:28.

EL IMPORTANCIA QUE AYUDA CON OTRO

“Ayuda con el maga huyain; dale animo con el maga maluya na fe, y dale mira el de ustedes paciencia con todo el maga gente.” (1 Tesalonica 5:14) “Ayuda con el maga iluh [o maga nuay mayores] y maga viuda na diila maga necesidad.”​—Santiago 1:27.

El Biblia nuay lang basta lista con ese maga principio. Sino, ta enseña tambien este kanaton que dale importancia con ese maga principio y aplica con ese na diaton vida. Si mas manada gente el aplica con este maga enseñanza que ya lista kita, gendeh ba puede este ayuda para solva con el maga grabe problema del gente ahora? Poreso puede kita habla que el maga principio na Biblia mas aplicable y justo gayot na diaton tiempo ahora. Pero, paquemodo contigo puede ayuda el maga enseñanza del Biblia ahora?

El de con todo sabio gente ya habla: “El sabiduria de Dios bien verdadero gayot, cay puede kita mira el resulta de ese.” (Mateo 11:19, El Nuevo Testamento) Gendeh ba tu man uyun con ese? Puede tu sabe si efectivo el un consejo si aplica tu con ese. Poreso, posible habla tu: ‘Si deverasan practical el Biblia, gendeh ba debe tiene este buen resulta na de mio vida? Paquemodo este puede ayuda na maga problema que ta enfrenta yo ahora?’ Considera con el un ejemplo.

Alegre el vida de Delphine. * Pero, derepente lang le ya enfrenta maga dificultad. Ya muri el de suyu teenager anak mujer. Yan separtajan sila pati de suyu marido. Yan dificil tambien le na financial. Ele ya habla: “No sabe ya yo si quien yo​—nuay anak, nuay marido, nuay casa. Ya sinti yo que nuay mas proposito el de mio vida.”

Ya puede mira si Delphine que deverasan gayot este maga palabra: “El largor del diaton vida amo 70 año o 80 si el un gente bien mafuerza. Pero lleno este de problema y tristeza; pronto lang este pasa y ta perde ya kame.”​—Salmo 90:10.

Grande ayuda gayot con Delphine el Biblia durante este dificil tiempo. Manada tambien con quien ya puede ayuda el Biblia cuando ya aplica sila con el consejo de este para enfrenta con el diila maga problema. Para kanila, el Biblia igual na aquel estatua que ya menciona na principio de este articulo. Bien diferente este compara na manada libro que ta queda daan y gendeh mas usable. Por causa gaha se cay el Biblia ta contene el pensamiento del Dios y gendeh del gente?​—1 Tesalonica 2:13.

Posible, ya puede tambien tu realiza que bien corto lang el vida y lleno de maga problema. Si gendeh ya tu puede aguanta con el de tuyu maga problema, onde tu ta busca comforta, ayuda y consejo que puede confia?

Discuti kita con el tres manera donde ta dale mira que practical el Biblia na de tuyu vida. Puede este ayuda contigo si paquemodo

1. evita maga problema si posible.

2. solva con el maga problema.

3. enfrenta con el maga situacion que gendeh tu puede cambia.