Si mas ta aprende kita acerca na maga calidad del un persona, mas ta conoce kita con ele. Y como resulta, mas ta queda kita cerca con ele. Na igual manera, si mas ta aprende kita acerca na maga calidad de Jehova, hay mas conoce kita con ele y mas queda hondo el diaton amistad con ele. Na todo maga calidad del Dios, este cuatro el de con todo importante: de suyu poder, sabeduria, justicia y amor.

“O Soberano Señor Jehova! Mira! Uste ya hace con el cielo y tierra por medio na de uste grande poder.”—JEREMIAS 32:17.

Puede mira na creacion con el evidencia del poder del Dios. Por ejemplo, si para tu apuera na tiempo de media dia, cosa tu sinti na de tuyu pellejo? El calor del sol. El deverasan, ta sinti tu el resulta del poder de Jehova. Paquemodo ba de poderoso el sol? Ta habla el otro que el entre medio de este tiene calor de maga 27,000,000 degrees Fahrenheit (15,000,000°C). Cada segundo, el sol ta produci energia que puede compara na rebentada del millones de maga nuclear bomb.

Maskin pa ansina, el diaton sol diutay lang si compara na maga trillones de estrellas na universo. Asegun na maga cientista, el uno del maga de con todo grande estrellas que ta llama UY Scuti maga 1,700 beses mas grande contra con el sol. Si el UY Scuti hay cambia con el sol, hay queda adentro de este el tierra y maskin el orbit del planeta Jupiter. Posible, puede se ayuda kanaton para mas entende cuando ya habla si Jeremias que si Dios Jehova ya hace con el cielo y con el tierra—el universo—por medio na de suyu grande poder.

Paquemodo kita ta beneficia na poder del Dios? El diaton vida ta depende na maga fisical creacion del Dios, igual con el sol y con el todo cosas na tierra. Mas pa, ta usa el Dios con el de suyu poder para ayuda con el cada individual. Paquemodo? Del primer siglo, ya dale poder el Dios con Jesus para hace maga milagro. Puede kita le: “El maga bulag ta puede mira, el maga piang ta puede camina, el maga leproso ta queda limpio, el maga bungul ta puede oi, el maga muerto ta levanta.” (Mateo 11:5) Quetal na diaton tiempo ahora? “Ta dale le fuerza con el cansao,” ya habla el Biblia y ya omenta: “Aquellos quien ta esperanza con Jehova hay tene otravez fuerza.” (Isaias 40:29, 31) El Dios puede kanaton dale “grande poder” para puede kita enfrenta o aguanta maga dificultad y probanza na vida. (2 Corinto 4:7) Gendeh ba se manda move contigo para queda cerca con el un amable Dios quien ta usa con el de suyu grande poder para ayuda kanaton?

“Que bien manada el cosa tu ya hace, O Jehova! Na de uste sabeduria ya crea tu con este todo.”—SALMO 104:24.

Si mas aprende kita acerca na maga cosas que ya hace el Dios, mas man bilib kita con el de suyu sabeduria. Gane, el cuanto cientista ta examina con el maga creacion de Jehova y ta copia maga idea estaba con ese para queda mas bale el diila diseño. Ya copia sila para diseña maga simple tape y maga complicao diseño de eroplano.

El de con todo maka-bilib ejemplo del sabeduria del Dios amo el cuerpo del gente. Considera, por ejemplo, si paquemodo ta forma el baby. El proceso ta principia na un fertilized cell que ta contene el todo genetic information que necesita. Este celula ta dividi na manada celula que igual-igual el forma. Pero na un especifico tiempo, este maga celula ta principia dividi na mas de cien maga especial clase de maga celula, igual na blood cell, nerve cell y bone cell. Gendeh tarda, hay forma el maga organ y principia man function. Adentro lang de nueve meses, ese original celula hay queda un baby que hacido de billones de maga celula. Por causa na sabeduria que puede mira na maga diseño igual con este, manada el tan uyun con el escritor del Biblia quien ya habla: “Ta alaba yo con uste por causa si paquemodo de bonito uste ya hace conmigo.”—Salmo 139:14.

Paquemodo kita ta beneficia na sabeduria del Dios? Sabe el Creador si cosa kita necesita para queda alegre. Ciendo bien grande el de suyu saber y entendimiento, ta dale le kanaton maga justo consejo na de suyu Palabra, el Biblia. Por ejemplo, ta anima este kanaton: “Perdona con uno y otro.” (Colosa 3:13) Buen consejo ba se? Si. Asegun na research, si el un persona ta perdona, mas enbuenamente le ta puede durmi y abajao el presion. Gendeh tambien le pronto man depress y tiene otro problema na salud. El Dios amo igual na un sabio y amable amigo quien gendeh ta descanza dale maga consejo que puede ayuda kanaton. (2 Timoteo 3:16, 17) No quierre ba tu ansina clase de amigo?

“Si Jehova ta ama con el justicia.”—SALMO 37:28.

El Dios pirmi ta hace si cosa el justo. Gane, “imposible que el verdadero Dios hay hace cosa malo, ni el Todopoderoso hay hace cosa gendeh justo!” (Job 34:10) Justo el de suyu maga juzgamiento, igual como cosa ya habla el salmista acerca con Jehova: “Hay juzga tu con el maga gente con justicia.” (Salmo 67:4) Ciendo “si Jehova ta mira con el corazon,” gendeh con ele puede engaña el maga hipocrito. Sino, ta puede le mira si cosa el verdad y ta puede hace maga justo juzgamiento. (1 Samuel 16:7) Mas pa, ta mira el Dios con el todo injusticia y corapcion na tierra. Y ya promete le que gendeh mas tarda “el maga malo, hay quita . . . na tierra.”—Proverbio 2:22.

Pero, el Dios gendeh un mal juez quien quierre lang castiga con el maga gente. Ta dale le mira lastima si tiene valido razon. El Biblia ta habla: “Si Jehova lastimoso y tiene compasion,” maskin con el maga malo si sincero sila ta arripinti. Gendeh ba deverasan justicia este?—Salmo 103:8; 2 Pedro 3:9.

Paquemodo kita ta beneficia na justicia del Dios? Si apostol Pedro ya habla: “El Dios noay favorito, pero ta acepta le con todo aquellos quien ta adora con Ele y ta hace cosa bueno, maskin de donde nacion sila.” (Maga Actividad 10:34, 35) Ta beneficia kita na justicia del Dios cay nuay le con quien tan afavor. Puede le kanaton acepta y iscuji como de suyu maga siervo, maskin cosa pa el diaton raza, nacionalidad, educacion o estado na vida.

Cay quierre el Dios que entende y beneficia kita na de suyu justicia, ya dale le kanaton conciencia. El Escritura ya habla que el conciencia amo un ley que ‘escribido na diaton maga corazon’ que tan “testigo” si justo ba o gendeh el cosa kita ya hace. (Roma 2:15) Paquemodo kita ta beneficia? Si yan train enbuenamente con el diaton conciencia, puede este motiva kanaton para evita na maga peligroso o gendeh bueno accion. Y si ya puede kita hace kamali, puede este manda move kanaton para arripinti y corecta con el cosa kita ya hace. Deverasan gayot que si entende kita con el justicia del Dios, puede este ayuda y manda move kanaton para queda cerca con ele!

“El Dios amor.”—1 SAN JUAN 4:8.

El Dios ta demonstra poder, sabeduria y justicia. Pero, el Biblia gendeh ta habla que el Dios poder, sabeduria o justicia. Este ta habla que ele amor. Porque? Cay justo gayot para habla que el poder del Dios ta causa con ele para actua y el de suyu justicia y sabeduria ta guia si paquemodo le ta actua. Pero, el amor de Jehova amo el ta motiva con ele para actua. Amor el ta influencia con el todo cosa le ta hace.

Maskin pa nuay cosa falta con Jehova, el de suyu amor ya manda move con ele para hace maga inteligente creatura, na cielo y na tierra, quien puede beneficia na de suyu amor y cuidada. Ya prepara le con el tierra para queda el permanente lugar del maga gente. Y ta continua le dale mira amor con todo maga gente. Gane, “Ele ta hace sale el disuyo sol con el maga gente malo y con el maga bueno y ta dale el ulan con el maga gente noay culpa y con el maga culpable.”—Mateo 5:45.

Mas pa, “lastimoso y misericordioso el Señor.” (Santiago 5:11) Ta dale le mira amor con todo aquellos sincero y ta hace esfuerzo para conoce y queda cerca con ele. Ta mira el Dios con ese maga gente como maga individual. “Cay el deverasan, gendeh le lejos con el cada uno kanaton.”—Maga Actividad 17:27, NWT.

Paquemodo kita ta beneficia na amor del Dios? Quierre-quierre kita mira con el abajada del sol. Alegre kita oi si ta re el baby. Ta aprecia kita con el amor del diaton familia. Posible, gendeh bien importante este maga cosas. Pero, ta dale este grande alegria na diaton vida.

Ta beneficia tambien kita con el otro expresion del amor del Dios: el rezo. El Biblia ta anima kanaton: “No ustedes man lingasa. Pero si tiene ustedes necesidad, manda sabe con ese con el Dios por medio del de ustedes maga rezo y peticion junto con maga dalida de gracias.” Igual na un amable tata, quierre le que pidi kita ayuda con ele si tan lingasa kita. Y por causa na de suyu grande amor, si Jehova ya promete que hay dale le kanaton el “paz que noay quien ta puede entende.”—Filipo 4:6, 7.

El cosa kita corto ya discuti acerca na maga de con todo importante calidad del Dios—el de suyu poder, sabeduria, justicia y amor—ya puede ba ayuda contigo para mas conoce si cosa le clase de Dios? Para queda mas hondo el de tuyu apresacion con Dios, ta invita kame contigo que aprende si cosa le ya hace y hay hace pa para na de tuyu beneficio.