Ciendo mas ta queda caro el maga cosas na manada nacion, mas ta queda dificil el vida del maga gente, incluido el maga Testigo de Jehova. Pero en vez de sobra man lingasa, ta confia el maga Testigo que si Jehova “gendeh . . . abandona” kanila. (Maga Hebreo 13:5, El Nuevo Testamento na Chavacano) Manada beses le ya dale mira que ta cumpli le con ese promesa. Ansina el cosa le ya hace na Pilipinas, un lugar que donde manada siempre maga pobre. Pero, mas dificil el vida del maga gente na ese lugar durante el decada 1970 y 1980.

 “Tiene vez ta llura yo cay nuay kame comida,” ya acorda el un hermana que si Vicky a. “Tiene maga tiempo que canon, sal y agua lang kame tiene.” Gendeh tambien ta puede incuntra trabajo el un hermano que si Florencio. Ya habla le: “Tiene lang yo tres camisa y tres pantalon que bira-bira yo ta usa si ta atende yo maga miting y asemblea.” Cosa ya puede ayuda con el maga Testigo de Jehova na ese maga situacion? Paquemodo sila ya esta fuerte na espiritual? Y paquemodo el diila ejemplo puede ayuda kanaton ahora especialmente cay no sabe kita si cosa sucede na futuro?

 El maga Testigo na Pilipinas ya confia que si Jehova hay dale el diila necesidad durante aquel dificil tiempo. (Maga Hebreo 13:6) Ya hace le se y mas mucho, na maga manera que nuay sila expecta. Por ejemplo, el un hermana que si Cecille ya relata: “Despues kame cuci con el diamon ultimo chupa de arroz para na almuerzo diamon cuatro na familia, nuay mas ya kame cosa para come. Poreso ya reza kame con Jehova que dale el diamon necesidad na aquel dia. Mientras ta come pa kame con el diamon almuerzo, tiene un hermano ya llega que ta lleva cinco kilo de arroz. Ya llura gayot kame na alegria por causa na aquel bendicion estaba con Jehova. Manada pa kame experiencia igual ansina.”

 Puera con ese, ya aplica tambien el maga siervo del Dios con el maga practical consejo na Biblia. (Proverbio 2:6, 7) Por ejemplo, el un hermana que si Arcelita quien nuevo lang bautizao y single pa aquel tiempo yan dificil tambien na financial. Poreso ya habla le con Jehova na rezo acerca na cosa le tan lingasa. Despues, ya medita le con el Proverbio 10:4 donde ta habla: “El mano que nuay cosa ta hace ta causa pobreza pero el mano del maga trabajador ta lleva riqueza.” Ya aplica le con ese maga palabra. Poreso ya siembra le para tiene le cosa que come. “Ya bendici gayot si Jehova con el de mio esfuerzo,” ya habla le. “Gane, ya puede yo tiene bastante comida y el otro ya puede yo vende para tiene yo pasaje.”

 Nuay tambien bastante sen el maga hermano para cumpra tierra y planta Kingdom Hall. Pero nuay se sangga kanila para obedece con el mandato que man junto para anima con uno y otro. (Maga Hebreo 10:24, 25) Ya hace lang sila si cosa el posible na diila circumstancia. Por ejemplo, el un hermana que si Deborah ya habla: “Seis lang kame ta atende na diamon miting na un diutay payak que ya planta kame del de mio uban pioneer. De nipa lang el techo. Acabar, el dindin maga ojas de coco y maga tronco de coco el maga bangco.”

 Pero mas mucho, tan miting sila na maga casa lang. “De cogon lang y caña el diamon diutay casa,” ya habla el un hermana que si Virginia. “Cada Sabado, necesita kame hace move con el diamon maga gamit para ancho el lugar adentro casa para na miting alamañana.” Na otro casa donde tan miting el maga hermano, roto el techo. “Si ta cae ulan,” ya habla el un hermano que si Noel, “ta usa kame maga balde para hace salut con el maga agua que tan tulu. Maskin malisud el situacion, nuay lang quel para kanamon cay alegre kame man junto na diamon maga hermano y hermana para adora con Jehova.”

 Maskin gendeh sila rico na material, ya esta activo el maga hermano na ministerio. Si Lindina quien ta queda na Negros ya habla: “Ciendo un grande familia kame y el de mio tata lang el ta trabaja, tiene maga tiempo nuay kame sen para na pasaje diamon. Poreso mas mucho, ta camina kame para anda na teritorio. Pero alegre kame cay manada kame ta camina. Sabe tambien kame que alegre si Jehova na diamon maga esfuerzo.”

 Ciendo ralo lang o tiene vez nuay gayot vehiculo para onde munta, gendeh facil anda na diamon maga teritorio cay lejos y na maga monte kame ta anda predica. Si Esther quien ta queda na Luzon ya relata: “Na diamon grupo, tiene 6 para 12 maga hermano y hermana quien ta sale na predicacion. Temprano kame ta sale cay necesita kame camina cuanto kilometro. Acabar, entero dia kame ta predica. Ta lleva lang kame baun y ta come kame se abajo’y pono. Maskin pa el cuanto maga hermano y hermana nuay cosa para come, ta sale siempre sila na predicacion. Ta habla lang kame kanila, ‘No man lingasa, manada kita comida.’”

 Ya bendici gayot si Jehova con el sacrificio del maga hermano y hermana. Por ejemplo, del 1970, tiene lang 54,789 publisher na Pilipinas. Pero del 1989, ya dobla el numero de ese y ya alcanza 102,487. Del 2023, el numero del maga publisher na Pilipinas ya llega 253,876.

 Maskin pa na grabe problema na economia, el maga Testigo de Jehova ya puede mentena con el diila buen espiritualidad. “Maskin pobre kame, ta ama kame con Jehova,” ya habla el un hermano que si Antonio. Si Hermana Fe Abad ya habla: “Cuando ya enfrenta kame del de mio marido problema na financial, ya esta kame cerca con Jehova y ya esta kame alegre maskin simple el diamon vida. Por causa con ese, el diamon maga anak ya aprende tambien confia con Jehova.”

 “Gendeh problema si pobre tu basta ta sirvi tu con Jehova,” ya habla si Lucila quien ta queda na Samar. Mas pa, ya habla le: “Si hace kita prioridad con Dios, puede kita queda contento y esta positivo. Alegre tambien yo que el de mio maga Bible study ya conoce con Jehova y na uliji ya sirvi tambien como maga pioneer.”

 Ciendo todo kita hay experiencia maga dificultad na futuro, necesita kita acorda con el cosa ya habla el un anciano que si Rodolfo quien ya escribi: “Na aquel maga dificil tiempo durante el decada 1970 y 1980, ya puede yo mira si paquemodo conmigo ya ayuda si Jehova. Maskin pa pobre yo, nuay yo sinti que ya abandona conmigo. Ya cuida gayot conmigo si Jehova. Bien alegre gayot yo na de mio vida ahora y ta esperanza yo con el ‘deverasan Vida’ na Paraiso na futuro.”—1 Timoteo 6:19.