Cuando ya acaba el Guerra Mundial II del 1945, bien grande parte del Germany el ya queda destrozao. Ya queda destrozao el maga ciudad, nuay laman el maga escuela, gendeh ta puede usa con el maga hospital y calayat onde-onde el maga bomba que nuay rebenta. Mas pa, tiene escasez de comida poreso bien caro el precio de este. Por ejemplo, na black market, el precio del 500 gramo butter ya alcanza valor de seis semana sueldo.

 Ya queda tambien afectao el mas de dos mil maga Testigo de Jehova quien ya esta na preso y concentration camp por causa na diila fe. Del 1945, ya libra kanila pero ropa de preso lang sila ta lleva. Ya perde el propiedad del cuanto maga Testigo. El otro nuay que come poreso ya desma sila durante el maga miting.

 El maga Testigo de Jehova na otro parte del mundo ya imbia dayun maga comida y ropa. El maga hermano na world headquarters na United States ya pidi con el branch office na Bern, Switzerland, que ayuda con el maga hermano na Germany. Si Nathan H. Knorr, un representante estaba na headquarters, ya visita na Europe para organiza y para hace mas pronto el dalida de ayuda.

 El maga Testigo na Switzerland ya dona bien manada comida, ropa y sen. Ya imbia una con este na Bern donde ya arregla con este para imbia na Germany. Ya ayuda tambien el maga Testigo de otro lugar, incluido ya el Sweden, Canada y United States que ya puede ayuda con el maga siervo de Jehova gendeh lang na Germany sino na manada nacion na Europe y Asia que ya queda afectao del guerra.

 Adentro lang de cuanto meses, el Switzerland branch ya imbia cafe, leche, azucar, cereal, seco fruta, gulay y de lata carne y pescao. Ya dona tambien sila sen.

 Mas pa, el maga Testigo na Switzerland ya imbia cinco tonelada de ropa, incluido ya maga overcoat, camisa de maga mujer y americana. El Enero 15, 1946, issue del The Watchtower ya habla: “Ya dale el maga hermano gendeh el de con todo umalin sino el de con todo bonito. Ya hace gayot sila grande sacrificio para ayuda con el diila maga hermano na Germany.”

 El maga Testigo na Switzerland ya dona tambien cerca 1,000 sapatos que ya chequia enbuenamente antes con este imbia. Bilib gayot el maga hermano y hermana na Wiesbaden, Germany, quien ya abri con este cay de calidad este y diferente clase. “Asigurao yo que nuay tienda na Germany el ta vende ansina clase de ropa y sapatos,” ya escribi el un Testigo.

 Ya continua imbia ayuda hasta Agosto 1948. El maga Testigo na Switzerland ya imbia 444 cajon de ayuda que ya alcanza 25 tonelada, na diila maga hermano na Germany. Como ya menciona, gendeh lang el maga Testigo na Switzerland el ya ayuda. Pero, entrao sila na maga de con todo diutay grupo que ya participa. Na aquel tiempo, 1,600 Testigo lang el tiene na Switzerland.

 Si Jesucristo ya habla: “Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.” (Juan 13:34, 35) El amor ya manda move con el maga siervo de Jehova para dale gendeh lang el cosa sila puede sino el diila de con todo bueno. (2 Corinto 8:1-4) El un carta estaba na Zurich ya menciona que “manada maga hermano el bien pobre pero maskin pa ansina, quierre sila ayuda poreso ya dale sila el diila card de racion y sen.”

 El maga siervo de Jehova na Germany ya puede dayun bira na diila normal vida maskin pa na persecucion y efecto del guerra. El un razon amo cay bien organizao y bondadoso el diila maga hermano y hermana quien ya dale mira amor y ya sacrificia para ayuda kanila.