“Ya engranda yo na simentera,” ya habla si Agostinho, quien ta queda na Brazil. “Bien pobre kame. Necesita yo descanza entra escuela para trabaja y ayuda con el de mio familia.” Ya aprende si Agostinho le y escribi cuando ya queda le 33 año. “Por causa sabe ya yo le y escribi, mas tiene ya yo confianza na de mio mismo cuerpo,” ele ya habla.

 Uno si Agostinho na mas de 250,000 maga gente con quien ya puede ayuda el maga Testigo de Jehova para le y escribi adentro na 70 año. Porque este ya hace el maga Testigo de Jehova? Paquemodo el maga gente ya beneficia na ese educacion?

 Del 1935, el maga Testigo de Jehova ta predica ya na 115 maga nacion. Para puede predica con el maga gente quien ta converza diferente maga lengguaje, yan translate con el talk y el maga misionario ta man play con ese maga recording. Y na cuanto situacion ta dale tambien sila maga literatura na local lengguaje. Maskin manada gente el quien ya dale mira interes na Biblia, manada tambien tan dificil aprende cay no sabe sila le y escribi.

 Por causa gendeh ta puede le Biblia, manada gente el ta man lisud si paquemodo aplica con el maga principio del Biblia. (Josue 1:8; Salmo 1:2, 3) Dificil tambien para kanila cumpli con el diila responsibilidad como Cristiano. Por ejemplo, si el maga mayores no sabe le, dificil para kanila que enseña con el diila maga anak si cosa ta habla el Biblia. (Deuteronomio 6:6, 7) Y el nuevo maga Testigo quien no sabe le, posible limitao lang puede usa con el Biblia si ta enseña sila con otro.

 Na maga año 1940 y 1950, si Nathan H. Knorr y Milton G. Henschel, quien ta guia con el maga Testigo de Jehova, ya viaja na diferente maga nacion para ayuda organiza con el trabajo predicacion. Na maga lugar donde manada el quien no sabe le y escribi, ya anima sila con el maga branch office que forma maga clase si paquemodo le y escribi na maga congregacion.

 El maga branch office ya dale instruccion na maga congregacion si paquemodo conduci con el maga clase. Na cuanto nacion, el local gobierno tiene maga programa que puede usa. Por ejemplo na Brazil, el branch office ya ricibi maga supply y maga libro estaba na gobierno y ya imbia se sila na maga congregacion. Na otro maga nacion, el maga Testigo necesita hace diila mismo programa de enseñada.

 Maskin quien puede entra na clase—hombre man o mujer, joven o de edad. El proposito de este amo que enseña kanila si paquemodo le na diila mismo lengguaje. Poreso tiene vez, manada lengguaje el ta enseña na un congregacion.

 Paquemodo ya beneficia el maga gente na este programa? Un Testigo de Mexico ya habla: “Ahora ta entende ya yo con el Biblia, poreso ta puede ya este alcanza na de mio corazon. Cay sabe ya yo le, gendeh ya yo tan dificil man cuento na de mio maga vecinos y mas manada ya yo con quien ta puede predica acerca na mensaje del Biblia.”

 Por causa con este programa, el maga gente nuay lang aprende el Biblia. Si Isaac quien estaba na Burundi ya habla: “Cay sabe ya yo le y escribi, ya ayuda este conmigo para aprende maga abilidad de construida. Este ya el de mio trabajo y ahora ta agarra ya yo maga grande proyecto de construccion.”

 Si Jesusa que de Peru, 49 año ya cuando ya principia le atende na este maga clase. “Como nana,” ele ya habla, “necesita yo mira el maga precio y nombre del maga producto na tiangue. De antes, dificil quel para conmigo. Pero por causa na este clase, tiene ya yo confianza que cumpra para na de mio familia.”

 Adentro na manada año, el maga oficial na diferente maga nacion ya comenda con el maga Testigo de Jehova na trabajo que ya hace sila para enseña con el maga gente si paquemodo le y escribi. Ahora, ta conduci siempre el maga Testigo de Jehova maga clase usando el mas bonito maga programa y tool. Ya hace y yan print tambien sila mas de 224 millon brosyur na 720 lengguaje para ayuda con el maga gente quien no sabe le o limitao el educacion. a