Del Octubre 21, 1940, el New Zealand ya llama con el maga Testigo de Jehova como un rebelloso organizacion y un peligro na seguridad del publico. Maskin pa na maga dificultad que ya resulta por causa na cosa ya declara el gobierno, el maga Testigo de Jehova nuay man luya. Por ejemplo, ya continua sila man junto-junto para na adoranza maskin pa posible kanila man raid o arresta el maga autoridad.

 Si Andy Clarke, el marido del un Testigo que si Mary, ya nota con el de suyu determinacion que atende na maga miting maskin pa na amenazo. Ya tiene le miedo que baka arresta con el de suyu mujer mientras ta atende este miting. Maskin pa gendeh le este ta hace de antes, si Andy ya principia sigui con Mary y ya habla con ele, “Si arresta sila contigo, arresta tambien sila conmigo!” Principia aquel tiempo, ya atende si Andy con el todo miting junto con el de suyu mujer. Ya llega el tiempo, ya queda tambien le un bautizao Testigo. Manada maga Testigo na New Zealand durante el Guerra Mundial II el igual con Mary quien fiel maskin pa na maga persecucion.

 Un dia, ya arresta el maga polis con John Murray que 78 año mientras tan cuento este acerca na Biblia na casa en casa. Ya sentencia con ele el corte que ta participa na maga actividad del un rebelloso organizacion. Ya lleva tambien na corte con el manada maga Testigo. Ya multa con el cuanto mientras con el otro ya hace preso hasta maga tres meses.

 El maga Testigo nuay conforma sirvi como maga soldao cay tan contra este con el diila conciencia que base na Biblia. (Isaias 2:4) Como resulta, ya experiencia sila grabe dificultad durante el guerra cuando ya manda kanila sirvi como maga soldao. Cay nuay sila conforma, ya pone na detention camp con el maga 80 Testigo durante el guerra. Maskin pa na grabe maltratamiento y sobra frieldad, ese maga hermano con alegria ya continua adora con Jehova.

 El maga Testigo na detention camp ya principia dayun organiza con el diila maga espiritual actividad. Ya continua sila como un congregacion que tiene maga regular miting y arreglamiento para predica con el otro preso. Ya permiti pa gane con el maga Testigo que hace maga asemblea na cuanto maga campo mientras ta vicia kanila el guardia. El cuanto maga preso ya aprende el maga verdad na Biblia na campo y ya bautiza alla.

 Si Bruce, el de con todo menor anak hombre de Mary y Andy que ya menciona enante, ya mira con el de suyu tiempo na detention camp como un oportunidad para aprende mas acerca na Biblia. Ya acorda le, “Para conmigo, dol aquel ta anda yo na escuela cay ta puede yo man cuento con el maga mas experienciao hermano na campo y aprende estaba kanila todo.”

 Del 1944, ya puede pensa el gobierno que larga con el cuanto de aquellos na detention camp. Pero, nuay conforma el maga soldao oficial cay convincido sila que si larga con el maga Testigo, hay continua sila man cuento con otro acerca na diila creencia. El report ya habla: “Maskin pa el tiempo na campo puede controla con el pagka-fanatico de este clase de maga gente, gendeh gayot este puede cambia kanila.”

 Cay ya sabe el maga gente que ya prohibi con el maga Testigo de Jehova, el cuanto ya queda curioso acerca kanila. Ya llega el tiempo, manada gente el ya realiza que el maga Testigo de Jehova gendeh un peligro na seguridad del publico. Ya aprende sila que el maga Testigo amo maga bueno y calmao Cristiano. Como resulta, el numero del maga Testigo na New Zealand ya omenta desde 320 del 1939 ya queda 536 del 1945!

 Tiene vez, tiene maga razonable oficial el ya realiza que gendeh justo que prohibi con el maga Testigo de Jehova. El un juez ya termina con el caso despues le oi con el evidencia contra con el un hermano quien ta predica. Ele ya habla: “Asegun na cosa yo ta creé y na de mio entendimiento na ley, gendeh gayot justo considera que un criminal el un persona quien ta dale maga copia de Biblia.”

 Cuando nuay mas prohibi con el maga Testigo de Jehova despues del guerra, mas determinao sila que ayuda con el diila maga vecinos aprende acerca na Reino del Dios. Del 1945, el carta estaba na branch office para na todo congregacion na New Zealand ya habla: “Queda ustedes respetoso y bueno con todo. Evita con el maga controversia y peleajan. Acorda que el maga gente que ta conoce kita sincero na cosa sila ta creé y ta pricura sigui con ese. . . . Manada kanila amo maga ‘carnero’ del Señor con quien kita debe guia con Jehova y na de suyu reino.”

 Ahora, el maga Testigo de Jehova na New Zealand ta continua predica con el mensaje del Biblia na maga residente y na maga turista. Un dia, adentro lang de cuanto hora, el un grupo de 4 Testigo na Turangi yan cuento con el 67 visita estaba na 17 nacion!

 Claro que el maga gente na New Zealand ta mira con el maga Testigo de Jehova como maga calmao y dedicao Cristiano quien ta aprecia gayot con el maga verdad na Biblia. Bien manada maga gente el ta bautiza como maga Testigo de Jehova cada año. Del 2019, mas de 14,000 Testigo el alegre ta sirvi con Jehova na este nacion.