El maga suceso na entero mundo del 2023 ta dale claro evidencia que ta vivi ya kita na tiempo que ta llama el Biblia el “ultimo maga dia.” (2 Timoteo 3:1, El Nuevo Testamento na Chavacano) Nota si paquemodo el siguiente maga profecia na Biblia ta cumpli na diaton tiempo ahora.

Maga profecia y suceso na mundo

 “Maga guerra y maga noticia de guerra.”—Mateo 24:6.

•   “Mas ta queda manada el maga incidente de gulu na manada parte del mundo.” a

 “Tene donde-donde maga temblor.”—Marcos 13:8.

•   “Desde Enero 2023, tiene ya ya sucede 13 temblor na entero mundo que mas de 7 magnitude de fuerte. Ese amo el de con todo manada temblor que ya sucede na un año lang.” b

 “Tene maga cosa-cosa bien maca-miedo gayot.”—Lucas 21:11.

•   Asegun con el UN secretary-general, si António Guterres, mientras ta pasa el tiempo, mas ta queda grabe el calor na entero mundo. c

 “Maga calamidad de hambre.”—Mateo 24:7.

•   “2023: Manada ya tambien de aquellos quien tan dificil mantene con el diila familia el quien ya queda bien malingasa na este año.” d

 “Ay tene maga dificultad.”—2 Timoteo 3:1.

•   “Uno na ocho maga gente na entero mundo el quien tiene problema na diila mental salud.” e

Cosa hay sucede na 2024?

 Nuay ni uno kanaton quien puede habla si cosa hay sucede na 2024. Pero el maga suceso na entero mundo ta dale mira que gendeh dura el Reino del Dios, o gobierno na cielo, hay cambia con el maga gobierno del gente aqui na tierra. Hay quita tambien este con el todo cosas que ta causa sufrimiento y lingasa.—Daniel 2:44; Revelacion 21:4.

 Mientras tanto, si ta man lingasa kita, puede kita pidi ayuda con el Dios. El Biblia ta habla:

 “Si ta tene yo miedo, contigo yo ta confia.”—Salmo 56:3.

 Paquemodo kita puede dale mira que ta confia kita con Dios? Ya promete el Dios que llega el tiempo, nuay mas sufrimiento. Para sabe si paquemodo tu y el de tuyu familia puede beneficia na maga promesa del Biblia, ta invita kame que pruba tu con el diamon libre estudiada del Biblia.