Del Octubre 9, 2024, el World Wildlife Fund yan release un report acerca na efecto na maga animal del cosa ta hace el maga gente. Ya menciona este que “del ya pasa 50 año (1970-2020), ya abaja 73% el populacion del maga animal.” Despues, ya menciona tambien este: “Puede kita habla que el cosa hace el maga gente na sunod cinco año amo el determina si cosa sucede na planeta Tierra.”

 Asigurao, manada gente el ya queda espantao por causa na este maga report. Ta ama kita con el diaton bonito planeta y no quierre kita mira que ta menggua el maga animal. Ta sinti kita ansina cay ya diseña kanaton el Dios para cuida con el maga animal.—Genesis 1:27, 28; Proverbio 12:10.

 Poreso baka puede tu pensa, ‘Puede ba gaha kita protege con el maga animal aqui na tierra? Cosa el Biblia ta habla?’

 Maskin cosa pa kita hace, gendeh kita puede protege con el maga animal sino el Dios lang. El Biblia ta habla, asegun na Revelacion 11:18, que el Dios hay “destroza . . . con el maga destrozador del mundo.” (El Nuevo Testamento na Chavacano) Ese versiculo ta enseña kanaton dos cosas:

1.  1. Gendeh permiti el Dios que completamente destroza el maga gente con el tierra.

2.  2. Cerca ya actua el Dios. Porque se kita puede habla? Cay ahora, mas grande el posibilidad que destroza el maga gente con el maga animal contra de antes.

 Cosa hace el Dios para solva con este problema? Hay usa le con el de suyu gobierno na cielo o Reino para rula na entero mundo. (Mateo 6:10) Ese gobierno hay enseña y man train con el maga obediente gente para puede sila cuida y protege con el maga animal.—Isaias 11:9.