El maga lider na mundo, maga cientista y maga experto na tecnologia ta discuti ahora acerca na cosa puede hace el artificial intelligence (AI). Ta admiti sila que manada este cosa puede hace. Pero tan lingasa tambien sila que posible con este usa na gendeh justo manera.

•   “El AI amo uno na maga de con todo mafuerza tecnologia ahora y tiene este el potencial para hace mas bonito con el vida del maga gente . . . Maskin pa ansina, el AI puede causa grande peligro na seguridad, puede afecta con el maga derecho y privacia del maga gente, y hace perde con el diila confianza na democracia.”—Kamala Harris, vice president del United States, Mayo 4, 2023.

•   “El artificial intelligence (AI) puede dale grande ayuda para cuida con el salud del maga gente pero puede tambien este causa peligro na diaton fisical y emocional salud na cuanto manera,” ya escribi el un grupo de maga doctor y experto na entero mundo que ta encabeza si Dr. Frederik Federspiel, na un articulo que yan publish del Mayo 9, 2023, na BMJ Global Health. a

•   “Ta puede ya usa el maga gente con el AI para hace calayat maga falso informacion. Gendeh tarda, posible tambien perde trabajo el maga gente por causa na AI. Bien malingasa el cuanto quien ta trabaja na industria de tecnologia cay puede causa grande peligro el AI na maga gente na futuro.”—The New York Times, Mayo 1, 2023.

 Mientras ta pasa el tiempo, hay puede kita mira si hay usa ba con el AI na buen manera o causa este peligro. Cosa el Biblia ta habla?

 El Biblia ta dale mira si porque gendeh puede asigura el maga gente que na buen manera lang hay usa con el maga tecnologia que nuevo lang ya inventa.

1.  1. Maskin pa bueno el intencion del maga gente, posible gendeh sila puede mira adelantao con el maga negativo efecto del diila accion.

   •   “Tiene un camino que dol justo para na un gente, pero muerte el punta de este.”—Proverbio 14:12.

2.  2. El un persona gendeh puede controla si paquemodo el otro hay usa con el cosa le ya hace.

   •   “Necesita yo deja con [el cosa yo ya hace] na gente quien hay man sunod conmigo. Y quien man el sabe si hay queda ba le sabio o man de locuras? Maskin pa ansina, ele el quien hay controla con el todo cosas que ya hace yo con grande esfuerzo y sabeduria abajo na sol.”—Eclesiastes 2:18, 19.

 Este maga cosas claro ta dale mira si porque necesita kita el guia del diaton Creador.

 El diaton Creador ya promete que nunca le hay permiti con el maga gente o con el tecnologia que destroza con el tierra o con el todo maga gente.

•   “El tierra hay esta hasta para cuando.”—Eclesiastes 1:4.

•   “El maga recto hay hereda con el tierra y hay esta sila alli hasta para cuando.”—Salmo 37:29.

 Por medio na Biblia, el diaton Creador ta dale kanaton guia para puede kita experiencia con el un futuro que tiene paz y seguridad. Para sabe mas acerca si cosa ta habla el Biblia, le con el articulo “Is There a Reliable Guide to a Secure Future?” y “A Real Hope for a Better Tomorrow.”