Cosa Ta Habla el Biblia Acerca na Crisis na Agua na Entero Mundo?
Todo kita necesita limpio agua para vivi. Pero “cay ta continua queda grande el necesidad de agua, ta experiencia kita un grabe crisis na agua,” ya habla el UN Secretary-General que si António Guterres. Por causa con ese, billones de maga gente na entero mundo el ta tormenta ya tene limpio agua para toma.
Strdel/AFP via Getty Images
Tene pa ba kita bastante agua para na todo o continua kita siempre experiencia crisis na agua? Cosa el Biblia ta habla?
Si cosa el Biblia ta promete acerca na agua
El Biblia ta habla que algun dia, gendeh ya kita experiencia crisis na agua. Gane, hay tene ya abundancia de limpio agua.
“Hay sale agua na desierto y tene maga rio na seco patag lugar. El tierra que ya seca por causa na calor hay queda un pantano que tiene zacate y el tierra que bien seco hay tene tuburan de agua.”—Isaias 35:6, 7.
Porque kita puede creé con ese promesa na Biblia? Considera si cosa ya habla el Biblia acerca na un cosa que ya hace el Dios cuando ya crea le con el diaton planeta.
Si cosa ta habla el Biblia acerca na tierra y water cycle
“[El Dios] nuay crea con [el tierra] por nuay nada sino ya forma con este para onde puede queda.”—Isaias 45:18.
Ya crea el Dios con el tierra para queda un lugar donde hay continua existi el maga vivo creatura. Ya queda este posible cay ya pone le maga natural cycle para tene abundancia de limpio agua.
“Ta hace [el Dios] subi con el maga tulu de agua pa-arriba y ta queda se celaje y ulan. Despues, el maga celaje ta hace cae y ta rega con ese como ulan na maga gente.”—Job 36:27, 28.
Este texto ta menciona acerca el diseño del Dios si paquemodo hay continua tene supply de agua na tierra. Tan evaporate el agua estaba na tierra y mar, tan condense y ta cae como ulan. Como resulta, ta puede este continua dale limpio agua para na maga gente y animal.—Eclesiastes 1:7; Amos 5:8.
“Hay dale yo ulan na justo tiempo y el tierra hay tene cosecha y el maga pono hay tene fruta.”—Levitico 26:4.
Ya promete el Dios con el maga Israelita de antes, que maga siembrador, que hay tene sila manada cosecha cay dale le kanila regular supply de agua. Sabe le que necesita bastante ulan na justo tiempo para tene buen cosecha.
El cosa ya hace el Dios na Israel de antes cerca ya le hay hace na entero tierra. (Isaias 30:23) Pero mientras tanto, na manada parte del mundo, mas ta queda grabe el crisis na agua y problema tambien diila si gendeh tanto tan ulan. Cosa pa ta habla el Biblia acerca na solucion na problema de agua ahora?
Si paquemodo hay termina el crisis na agua
El Biblia ya revela que por medio na Reino del Dios, hay solva el Dios con el maga problema del diaton planeta, incluido el crisis na agua ahora. (Mateo 6:9, 10) El Reino del Dios amo un gobierno na cielo que hay rula na entero mundo. (Daniel 2:44; Revelacion 11:15) Mas pa, el Reino del Dios hay quita con el maga causa del diaton problema na agua—un cosa que gendeh ta puede hace el maga gobierno del gente.
Problema: Gendeh ta queda balance el water cycle por causa na climate change. Como resulta, ta tene grabe secas y ta tene tambien maga grabe avenida por causa na bien fuerte ulan o ta subi el level del agua na mar.
Solucion: El Reino del Dios hay compone con el todo problema del diaton planeta. El Dios ya promete: “Mira tu, ta hace yo nuevo todo el maga cosa-cosa.” (Revelacion 21:5, El Nuevo Testamento na Chavacano) El maga seco lugar hay tene abundancia de limpio agua donde hay crici el maga siembra maskin pa talli se na maga lugar donde imposible sila crici ahora. (Isaias 41:17-20) Bajo na rulanza de Jesucristo, el Reino del Dios hay controla tambien con el maga natural fuerza del tierra.
Cuando taqui si Jesus na tierra, ya puede le hace calma con el un bien fuerte tifun y por medio con este, ya dale le ejemplo si cosa le puede hace por medio na poder del Dios que ya dale con ele. (Marcos 4:39, 41) Bajo na rulanza del Cristo como Rey del Reino del Dios, gendeh mas sucede el maga natural calamidad. El maga gente hay experiencia deverasan paz y seguridad, y gendeh mas man lingasa acerca na maskin cosa calamidad.
Problema: Ta tiene crisis na limpio agua por causa na maga gente y corporacion quien ta hace mabuling con el maga rio, lago o lake y underground reservoir.
Solucion: El Dios hay compone con el mundo y limpia con el maga rio, lago, mar y tierra. El tierra hay queda un paraiso. El Biblia ta habla: “El desierto y el seco tierra hay tene alegria y el patag lugar hay queda alegre y florea igual na safron.”—Isaias 35:1.
Cosa sucede con aquellos quien nuay queber na otro maga gente y na tierra? El Dios ya promete que “destroza [le] . . . con el maga destrozador del mundo.”—Revelacion 11:18; Proverbio 2:21, 22.
Problema: El maga gente ta usa con el agua na gendeh justo manera y como resulta, ta hace sila usik mas manada agua compara na cosa ta puede produci el tierra.
Solucion: Por causa na Reino, hay “hace . . . aqui na mundo” el voluntad del Dios y gendeh si cosa quierre el maga gente. (Mateo 6:9, 10) El maga gente quien bajo na rulanza del Reino del Dios hay ricibi el de con todo buen educacion. “El tierra hay llena na saber de Jehova,” ya habla el Isaias 11:9. a Por causa con ese saber y hondo amor con Dios y na de suyu maga creacion, el maga gente hay cuida enbuenamente con el diaton planeta y el maga cosas que tiene este.
Para sabe pa mas si cosa hace el Reino del Dios, mira con el articulo “What Will God’s Kingdom Accomplish?”
Na Biblia, le con el Isaias capitulo 35 para puede tu sabe si paquemodo el tierra hay queda un paraiso.
Para aprende pa mas acerca na proposito del Dios para na tierra y na maga gente, mira con el video Porque el Dios Ya Crea con el Tierra?
a Jehova el personal nombre del Dios. (Salmo 83:18) Mira con el articulo “Quien si Jehova?”