Cosa el Biblia Ta Habla Acerca na Escasez de Comida que Ta Sucede Ahora?
“Nuay ni uno quien man hambre.” Amo este el cosa quierre cumpli el maga lider de este mundo para solva con el uno na maga de con todo grande problema del maga gente—si paquemodo dale come con el todo gente na mundo. a Pero llega ba el tiempo que nuay mas quien man hambre? Cosa el Biblia ta habla?
Ya predicta el Biblia con el escasez de comida que ta sucede ahora
Ya predicta el Biblia que hay sucede el escasez de comida na diaton tiempo ahora, el tiempo que ta llama el “ultimo maga dia.” (2 Timoteo 3:1, El Nuevo Testamento na Chavacano) Gendeh el Dios el causa de este maga escasez de comida pero ya dale le aviso kanaton acerca con ese. (Santiago 1:13) Nota con el dos profecia na Biblia.
“Ay tene donde-donde maga calamidad de hambre.” (Mateo 24:7) Este profecia na Biblia ya predicta que hay tene escasez de comida na manada lugar. Gane, asegun na report de aquellos quien ta mira na maga supply de comida: “Mas ta queda grabe el problema acerca na escasez de comida y malnutricion.” b Millones del maga gente na manada nacion el gendeh ta puede tene el comida que necesita sila. Como resulta, manada kanila el ta muri.
“Entonces ya mira yo ta abuya un caballo negro. El quien ta monta ta agarra un pesador.” (Revelacion 6:5) Na este profecia, el simbolico caballo y el quien ta munta con ese ta representa con el hambre na ultimo maga dia. c El pesador na de suyu mano amo para pesa con el racion de comida. Mientras ta corre el caballo, tiene un voz ta anuncia que el maga precio de comida hay queda bien carro y ta dale aviso con el maga gente que no hace usik comida. (Revelacion 6:6) Amo gayot este el cosa ta sucede ahora, donde billones de maga gente el gendeh ta puede incuntra o cumpra maga sustancioso comida.
Si paquemodo termina el escasez de comida
El maga experto ta habla que el diaton planeta ta produci maga comida que sobra pa na cosa necesita el maga gente. Entonces, cosa el maga problema que ta causa para tene escasez de comida? Y cosa el Biblia ta habla acerca si cosa hace el diaton Creador que si Jehova d para solva con este maga problema?
Problema: El gobierno gendeh puede quita con el pobreza y injusticia que ta causa con el maga gente para man hambre.
Solucion: El Reino del Dios, un gobierno na cielo, hay cambia con el todo gobierno del gente aqui na tierra. (Daniel 2:44; Mateo 6:10) Ahora, manada pobre gente el ta tormenta cumpra maga comida pero hay cambia este bajo na Reino del Dios. El Biblia ta habla acerca con Jesucristo, el Rey del Reino del Dios: “Hay salva le con el pobre quien ta pidi ayuda, y con el maka-lastima y con el maskin quien que nuay ta ayuda. . . . Hay tene abundancia de grano na tierra; na arriba del monte este hay sobra.”—Salmo 72:12, 16.
Problema: El guerra ta causa destrozo y ta afecta se con el economia. Como resulta, tan dificil el maga gente que obtene el comida que necesita sila.
Solucion: “Hay termina [si Jehova] con el maga guerra na entero mundo. Ta hace le quebra con el pana y ta machaca con el lanza; ta quema le con el maga carro de militar.” (Salmo 46:9) Hay destroza el Dios con el maga armas de guerra y con aquellos quien ta causa con el guerra. Como resulta, facil lang para na todo que obtene comida. El Biblia ya promete: “Hay florea el maga recto, y el paz queda abundancia.”—Salmo 72:7.
Problema: El por demas clima y maga natural calamidad ta destroza con el maga siembra y ta mata con el maga animal.
Solucion: Hay controla el Dios con el natural fuerza del tierra y como resulta, el tierra gendeh mas dificil produci comida. El Biblia ta habla: “Ta hace [si Jehova] descanza con el tifun; ta queda calma el maga marijada del mar. . . . Ta hace le con el desierto un pantano que tiene maga zacate y tuburan de agua con el seco tierra. Ta manda le queda alla con el maga con hambre . . . Ta hace sila sabut similla y ta siembra maga uvas que ta fruta bien manada.”—Salmo 107:29, 35-37.
Problema: El maga hambriento y corrupt individual ta produci maga comida que peligroso na salud o ta esconde maga comida para gendeh se puede obtene aquellos quien ta necesita con ese.
Solucion: El Reino del Dios hay quita con el todo deshonesto y corrupt gente. (Salmo 37:10, 11; Isaias 61:8) Ya menciona el Biblia con Dios Jehova como “el quien ta dale justicia con aquellos con quien ya hace loco, el quien ta dale pan con el maga con hambre.”—Salmo 146:7.
Problema: Maga 33 por ciento del supply de comida na entero mundo el tan usik cada año.
Solucion: Bajo na Reino del Dios, aquellos quien ta mira con el supply de comida hay puede hace enbuenamente con ese. Cuando taqui na tierra, ya evita si Jesus que hace usik comida. Por ejemplo na un ocasion, ya dale le come con el grupo de maga gente que mas de 5,000. Na uliji, ya habla le con el de suyu maga dicipulo: “Recuji ustedes el maga pedazo ya sobra, para noay cosa ay man usik.”—Juan 6:5-13.
Cay hay termina el Reino del Dios con el maga causa del hambre, el todo maga gente hay tene abundancia y sustancioso comida. (Isaias 25:6) Para sabe si cuando el Reino del Dios hay cumpli con ese, mira con el articulo “When Will God’s Kingdom Rule the Earth?”
a El 2030 Agenda for Sustainable Development que ya pricura hace el todo United Nations Member States del 2015.
b El report que ya hace el Food and Agriculture Organization of the United Nations, el International Fund for Agricultural Development, United Nations Children’s Fund, United Nations World Food Programme y el World Health Organization.
c Para sabe pa mas acerca con el cuatro caballero na Revelacion, mira con el articulo “The Four Horsemen—Who Are They?”
d Jehova el personal nombre del Dios. (Salmo 83:18) Mira con el articulo “Quien si Jehova?”
Baka Gusta Tambien Tu
CONTESTACION NA MAGA PREGUNTA ACERCA NA BIBLIA
Cosa el Señal del “Ultimo Maga Dia” o “Tiempo del Fin”?
El Biblia ya menciona manada cosas que junto-junto sucede que amo el señal del ultimo maga dia.
OTRO MAGA TOPICO
Posible Ba Tene un Buen Sistema de Economia?
Tiene un gobierno que puede goberna con el tierra na perfecto manera y completamente quita con el pobreza y lingasa acerca na financial.
ESSENTIAL BIBLE TEACHINGS
Cosa el Reino del Dios?
Durante el de suyu ministerio, manada beses ya enseña si Jesus acerca na Reino del Dios. Por cuanto siglo, el maga gente ta reza que ojala llega ya ese Reino.
