Sean Gladwell/Moment via Getty Images
ESTA ALERTO!
El Maga Gobierno na Entero Mundo Ya Gasta Mas de $2 Trillon Para na Maga Soldao—Cosa el Biblia Ta Habla?
El gasto del maga gobierno na entero mundo para na maga soldao ya alcanza ya 2.24 trillon dollar (U.S.) del 2022. Por causa ese na ataque del Russia na Ukraine. Asegun na report del Stockholm International Peace Research Institute (SIPRI) que ya hace sale del Abril 2023 que durante del 2022:
El gasto del gobierno de Europe para na diila maga soldao ya subi 13 por ciento durante ese año y amo se el de con todo grande por ciento que ya subi desde 1991.
Ya subi maga 9.2 por ciento el gasto del gobierno de Russia para na diila maga soldao. Por causa con ese, sila el ya queda ika-tres na de con todo grande ya gasta na entero mundo.
El United States siempre el tiene de con todo grande gasto cay na todo gasto na entero mundo para na maga soldao, sila el ya gasta 39 por ciento de ese.
“El gasto para na maga soldao na entero mundo que ta continua subi del ya pasa maga año ta indica que ta vivi ya kita na un mundo que mas ta queda peligroso,” ya habla si Dr. Nan Tian, el coauthor del SIPRI report.
El Biblia ya predicta que el maga poderoso nacion hay tene mas problema y pelea na uno y otro. Ta revela tambien este si quien el solamente puede dale paz na entero mundo.
Ya predicta que hay tene mas pelea entre na maga nacion
Asegun na Biblia, ta vivi ya kita ahora na “tiempo del fin.”—Daniel 8:19.
El libro de Daniel ya predicta que hay tene maga poderoso nacion quien hay man competencia con uno y otro durante na ese tiempo. Este maga poderoso nacion hay “man rimpujajan” o pricura domina con uno y otro. Parte na diila esfuerzo para queda mas poderoso que con otro amo que ta gasta sila grande cantidad de sen para na maga soldao.—Daniel 11:40, 42, 43.
Para sabe pa mas acerca con este profecia na Biblia, mira con el video Profecia que Ya Cumpli—Daniel Capitulo 11.
Si paquemodo puede obtene deverasan paz
El Biblia ya habla que hay cambia el Dios con el maga gobierno del gente. Ele “hay forma un reino que nunca hay destroza. Y gendeh hace pasa con este reino na maskin quien gente. Este hay machaca y termina con este todo maga reino, y este solamente hay esta hasta para cuando.”—Daniel 2:44.
Gendeh dura, si Dios Jehova a hay hace el cosa que gendeh ta puede hace el maga gente—hay dale le deverasan paz que hay esta hasta para cuando. Paquemodo? El de suyu Reino o gobierno na cielo hay destroza con el todo armas y termina con el todo violencia.—Salmo 46:8, 9.
Para sabe mas acerca si cosa el Reino del Dios hay cumpli, le con el articulo “Under God’s Kingdom ‘Peace Will Abound.’”
a Jehova el personal nombre del Dios.—Salmo 83:18.