Na entero mundo, manada lugar el ta experiencia grabe avenida. Nota con este maga report:

•   “Del ya pasa cuanto dia, el centro del China ya puede experiencia con el de con todo recio ulan que nuay sucede del ya pasa maga 140 año. Ya principia Sabado hasta Miercoles, ya puede este man record 744.8 milimetro (29.3 pulgada) de ulan.”—AP News, Agosto 2, 2023.

•   “El Tifun Khanun ya lleva grabe aguacero y fuerte viento na sur parte del Japan na ika-dos dia de este del Jueves. Como resulta, gendeh abaja na dos persona el ya muri. . . . Manada ta expecta que este tifun hay lleva ulan que llega hasta 0.6 metro (2 pies) na central Taiwan.”—Deutsche Welle, Agosto 3, 2023.

•   “El ulan na Atlantic Canada region amo el causa si porque yan avenida del Sabado y Domingo [na Nova Scotia]. Amo este el de con todo recio ulan que ya sucede del ya pasa 50 año.”—BBC News, Julio 24, 2023.

 Cosa ta habla el Biblia acerca con este maga suceso?

 Asegun na Biblia, ta vivi ya kita ahora na un tiempo que ta llama el “ultimo maga dia.” (2 Timoteo 3:1, El Nuevo Testamento na Chavacano) Ya habla si Jesus que na diaton tiempo, hay puede kita mira “maga cosa-cosa bien maca-miedo.” (Lucas 21:11) El climate change amo el uno del maga razon si porque el maga peligroso clima o tiempo mas grabe ya, mas pirmi ya ta sucede y gendeh mas kita ta puede predicta.

 El Biblia ta habla kanaton que el manada maga maka-miedo cosas que ta sucede ahora puede kanaton dale buen razon para queda positivo. Porque? Si Jesus ya habla: “Si ta mira ustedes este maga cosa-cosa, sabe ya ustedes cay el Reino de Dios cerca ya.”—Lucas 21:31; Mateo 24:3.

 El maga cosas que ta sucede ahora ta dale mira que bajo na Reino del Dios, bien cerca ya queda normal el maga elemento del tierra, incluido el water cycle.—Job 36:27, 28; Salmo 107:29.

 Para sabe mas acerca si paquemodo el Reino del Dios hay compone con el condicion del tierra, mira con el articulo “Who Will Save the Earth?”