Uno ba tu del millones de maga gente quien ya queda afectao na grabe clima? Ta experiencia kita con el maga efecto de este na diferente maga manera. El maga tifun y tornado ta causa storm surge, avenida y destrozo na diaton alrededor. Por causa na fuerte ulan, ta tene maga landslide y por causa na maga kirlat, ta tene maga grabe wildfire. Grabe tambien el destrozo que ta lleva el secas, heat wave y fuerte ulan de hielo.

 Na manada parte del mundo, mas pirmi ta sucede el maga calamidad y ta queda este mas grabe. El International Federation of Red Cross and Red Crescent Societies ya habla: “Mas manada gente el ta queda afectao na maga calamidad. Por causa se cay mas manada avenida, tifun y secas el ta sucede. Como resulta, manada gente el ya muri, ya perde lavida y ya queda destrozao el casa.”

 Si ta sucede este maga calamidad, el maga gente gendeh lang ta sufri na fisical sino na emocional tambien. El cuanto ya experiencia que ya perde el diila propiedad, diila casa o ya muri pa gane el familia.

 Si ya sufri tu por causa na maga efecto del grabe calamidad, puede contigo ayuda el Biblia para enfrenta con ese. Ta dale este comforta, esperanza y practical consejo que ya puede ayuda con el bien manada victima de calamidad. (Roma 15:4) Ta contesta tambien este con el un importante pregunta que quierre sabe el manada: Porque ya permiti el Dios que sucede este? Ta castiga ba le conmigo?

 El Biblia ta enseña que gendeh el Dios el causa del maga sufrimiento que ta experiencia el maga gente. Ta asigura este kanaton que “ningunos gendeh ta puede tenta con el Dios para hace malo, ni gendeh tamen el Dios ta tenta con ningunos.” (Santiago 1:13, El Nuevo Testamento na Chavacano) Este quierre decir que gendeh estaba con ele el maga grabe calamidad que ta sucede ahora.

 Deveras, ya menciona el Biblia que tiene maga tiempo, ya usa el Dios maga natural calamidad para castiga con el maga mal gente. Pero, diferente este na maga natural calamidad ahora que ta sucede que nuay aviso y ta afecta na maga bueno y malo. Gane, el maga istoria na Biblia ta dale mira que pirmi ta protege el Dios con el maga inocente, ta dale aviso y ta explica si porque le hace con el un cosa. Por ejemplo, ya explica el Dios si porque le causa grande Avenida na tiempo de Noe. Ya dale le aviso antes se sucede y ya protege con Noe y con el de suyu familia.—Genesis 6:13; 2 Pedro 2:5.

 Para sabe pa mas si porque kita puede asigura que gendeh castigo estaba con Dios el maga natural calamidad que ta sucede ahora, mira con el articulo “Cosa el Biblia Ta Habla Acerca na Natural Calamidad?”

 El Biblia ta revela que amable y tiene empatia si Dios Jehova. a Considera con el siguiente texto.

•   Isaias 63:9: “Na todo diila maga sufrimiento, ya sinti [el Dios] duele.”

   Si cosa quierre decir: Ta sinti duele si Jehova si ta mira le que ta sufri el maga gente.

•   1 Pedro 5:7: “Ele ta cuida con ustedes.”

   Si cosa quierre decir: Interesao si Jehova na de tuyu bien.

 Por causa na amor y empatia de Jehova, ta dale le comforta con el maga gente por medio na practical consejo na Biblia y un esperanza na futuro donde nuay mas maga natural calamidad.—2 Corinto 1:3, 4.

 El Biblia ta habla que ya promete si Jehova que “dale [kanaton] futuro y esperanza.” (Jeremias 29:11) Querrer de suyu que vivi el maga gente na un paraiso tierra y gendeh tene miedo que sufri sila por causa na clima.—Genesis 1:28; 2:15; Isaias 32:18.

 Para cumpli se, hay usa el Dios con el de suyu Reino—un gobierno na cielo donde si Jesus el Rey. (Mateo 6:10) Si Jesus tiene sabeduria y poder para sangga con el maga natural calamidad. Cuando taqui le na tierra, ya dale le mira que tiene le poder para controla con el clima. (Marcos 4:37-41) Hay rula le con entendimiento y sabeduria, y enseña le con el maga gente si paquemodo mentena con el diila alrededor y vivi na manera que gendeh ta causa destrozo. (Isaias 11:2) Bajo na rulanza de Jesus, gendeh mas sufri el maga gente por causa na natural calamidad.

 Baka pensa tu, ‘Cuando usa si Jesus con el de suyu poder para controla con el clima?’ Para contesta con ese pregunta, mira con el articulo “When Will God’s Kingdom Rule the Earth?”

 El maga consejo del Biblia puede ayuda contigo antes, durante y despues del natural calamidad.

•   Antes: Prepara para puede actua dayun.

   Si cosa ta habla el Biblia: “El un sabio ta puede mira con el peligro y ta esconde, pero el nuay experiencia ta continua y hay sufri na mal resulta.”—Proverbio 22:3.

   Si cosa quierre decir: Pensa si cosa el maga natural calamidad que posible sucede na de ustedes lugar para puede tu actua dayun y protege con el de tuyu familia.

   Experiencia: “Na dia que ya sucede el wildfire, preparao kame. Tiene kame diamon go bag, medicina y camisa. El otro maga gente tan panic y gendeh ta puede pensa enbuenamente. Pero, tiene kame el todo cosa kame necesita y ta rindi gayot yo gracias por causa con ese!”—Tamara, California, U.S.A.

•   Durante: Man focus na maga cosas que mas importante.

   Si cosa ta habla el Biblia: “El maga bienes del persona no puede asegura el disuyo vida maskin quemodo le de rico.”—Lucas 12:15.

   Si cosa quierre decir: Mas importante el vida contra na maga material cosas.

   Experiencia: “Cuando ya destroza el diamon casa por causa na Tifun Lawin, b nuay yo puede pensa enbuenamente si cosa yo debe hace. Pero el un cosa que ya hace yo amo que sincero yo ya reza con Dios Jehova. Ya realiza yo que maga material cosas lang el ya perde kanamon y gendeh el diamon vida.”—Leslie, Pilipinas.

•   Despues: Pensa acerca na presente.

   Si cosa ta habla el Biblia: “No ustedes man lingasa ahora si cosa ay pasa mañana, cay mañana otro el lingasa.”—Mateo 6:34.

   Si cosa quierre decir: No sobra man lingasa acerca na maga problema que posible sucede na futuro.

   Experiencia: “Despues man avenida na de mio casa por causa na Tifun Irma, necesita yo hace manada decision y ya queda gayot yo bien stress. Ya pricura yo sigui con el consejo del Biblia que pensa lang acerca na presente. Ya puede yo realiza que na ayuda de Jehova, puede gale yo aguanta na maga bien dificil situacion.”—Sally, Florida, U.S.A.

 Para na mas sugestion si cosa hace, mira con el articulo “When Disaster Strikes—Steps That Can Save Lives.”