Por causa na guerra na Ukraine y el efecto del climate change, ta continua siempre el problema na comida na entero mundo. Y bien afectao gayot con ese el maga nacion donde tan dificil ya daan obtene bastante comida el maga gente.

•   “Por causa na guerra, climate change, mas caro precio de energia y otro pa, afectao el produccion y supply de comida.”—António Guterres, UN secretary-general, Julio 17, 2023.

•   “Ya predicta el maga experto que ciendo gendeh mas parte el Russia del agreement que man export maga grano estaba na Ukraine, hay queda mas grabe el problema na comida na entero mundo y queda este mas caro na maga pobre nacion, especialmente na North Africa y Middle East.”—Atalayar.com, Julio 23, 2023.

 Considera si cosa el Biblia ta habla acerca na crisis na comida y na futuro.

•   Si Jesus ya predicta: “[El] maga nacion ay man guerra contra otro maga nacion, y maga reino ay man guerra contra otro maga reino. Ay tene donde-donde maga calamidad de hambre.”—Mateo 24:7, El Nuevo Testamento na Chavacano.

•   El libro de Revelacion na Biblia ya menciona acerca na cuatro simbolico caballero. El uno de ese maga caballero ta representa guerra. El sunod de ese ta representa el escasez de comida, el tiempo que bien limitao y caro el comida. “Ya mira yo ta abuya un caballo negro. El quien ta monta ta agarra un pesador. Y ya puede yo oi un voz . . . ta grita: ‘El precio de media ganta de trigo amo el sueldo de un dia. Y el sueldo de un dia amo tamen el precio de un ganta y media de maiz.’”—Revelacion 6:5, 6.

 Este maga profecia na Biblia acerca na crisis na comida ta cumpli ya ahora, el tiempo que ta llama el Biblia “ultimo maga dia.” (2 Timoteo 3:1) Para sabe mas acerca con el “ultimo maga dia” y con el cuatro caballero na Revelacion, mira con el video Ya Cambia el Mundo Desde 1914 y le con el articulo “The Four Horsemen—Who Are They?”

•   El Biblia ta contene maga practical consejo que puede ayuda kanaton para aguanta na maga dificil circumstancia, incluido el subido precio de comida y maskin el escasez de comida. Mira con el cuanto ejemplo na articulo “How to Live on Less.”

•   El Biblia ta dale tambien kanaton esperanza que hay queda enbuenamente el situacion. Ta promete este que llega el tiempo, “hay tene abundancia de grano na tierra” y el todo tiene ya cosa para come. (Salmo 72:16) Para sabe mas acerca con este esperanza na futuro y si porque tu puede confia con ese, le con el articulo “A Real Hope for a Better Tomorrow.”