Ta sinti ba tu que dol bien dificil ya determina si cosa el deverasan y si cosa el gendeh? El maga gente ahora dol ta sigui ya lang na cosa sila ta sinti y ta creé en vez na cosa el deverasan. Na entero mundo, manada gente ta creé que nuay mas verdad ahora.

 Gendeh mas nuevo ese idea. Maga 2,000 año ya el ya pasa, el Romano gobernador que si Poncio Pilato ya pregunta con Jesus: “Cosa man el verdad?” (Juan 18:38, El Nuevo Testamento na Chavacano) Maskin nuay espera si Pilato con el contestacion de Jesus, importante el de suyu pregunta. El Biblia ta dale contestacion que puede ayuda contigo sabe si cosa el deverasan y si cosa el gendeh na este mundo donde mayoria del maga gente el no sabe acerca con ese.

Tiene ba gayot verdad?

 Si. El Biblia ya usa con el palabra “verdad” para refiri na un cosa que deverasan y justo. Ta enseña este que si Dios Jehova a amo el Tuburan del verdad y ya llama con ele “el Dios de verdad.” (Salmo 31:5) El Biblia ta contene el verdad estaba con Dios y ya compara este con el verdad na claridad, ciendo puede este guia kanaton na este mundo donde el manada gente no sabe si cosa el deverasan.—Salmo 43:3; Juan 17:17.

Paquemodo tu puede incuntra con el verdad?

 No quierre el Dios que basta acepta lang kita con el verdad estaba na Biblia. Sino, quierre le que examina kita con ese y gendeh lang basta sigui na diaton emocion. (Roma 12:1) Quierre le que conoce y ama kita con ele “con todo el [diaton] pensamiento” y ta anima le que kita mismo queda convincido na verdad que ta aprende kita na Biblia.—Mateo 22:37, 38; Maga Actividad 17:11.

Onde estaba el imbusterias?

 El Biblia ya habla que ya principia el imbusterias na enemigo del Dios que si Satanas Diablo, el “tata del imbusterias.” (Juan 8:44) Ya habla le imbusterias acerca con Dios na primer man maridable. (Genesis 3:1-6, 13, 17-19; 5:5) Desde aquel tiempo, ya continua si Satanas hace calayat maga imbusterias y ya esconde el verdad acerca con Dios.—Revelacion 12:9.

Porque bien comon ahora el imbusterias?

 Na diaton tiempo ahora que ta llama el Biblia el “ultimo maga dia,” mas manada ya con quien ya puede influencia y engaña si Satanas. El maga gente ta habla maga imbusterias para misguia y hace loco con otro. (2 Timoteo 3:1, 13) Comon tambien el imbusterias na mayoria del maga religion ahora. Como cosa ya habla ya daan el Biblia que hay sucede na diaton tiempo, el maga gente “ay busca maga maestro quien puede satisface [o satisfecha] canila el cosa lang gayot sila quiere oi. Y ay bira sila cara con el verdad.”—2 Timoteo 4:3, 4, El Nuevo Testamento.

Porque importante el verdad?

 Necesita el maga gente con el verdad para puede sila confia con uno y otro. Si nuay el confianza, gendeh tambien queda fuerte el amistad y relacion del maga gente. Ya habla el Biblia que quierre el Dios que base na verdad el diaton adoranza. Este ta habla: “Aquellos quien ta adora con [Dios], necesita adora con Ele na Espiritu y na verdad.” (Juan 4:24) Para sabe si paquemodo el verdad na Biblia puede ayuda contigo para identifica con el maga imbusterias que ta enseña el maga religion y gendeh sigui con ese, le con el serie de articulo “Maga Imbusterias que Ta Hace Lejos con el Maga Gente con Dios.”

Porque quierre el Dios que sabe yo el verdad?

 Quierre el Dios que salva tu y para sucede se, necesita tu aprende el verdad acerca con ele. (1 Timoteo 2:4) Si aprende tu con el maga principio del Dios acerca si cosa el justo y mali, y sigui con ese, hay queda tu de suyu amigo. (Salmo 15:1, 2) Para sabe el maga gente acerca na verdad, ya imbia el Dios con Jesus na tierra. Quierre el Dios que oi kita con el maga enseñanza de Jesus.—Mateo 17:5; Juan 18:37.

Hay quita ba el Dios con el imbusterias?

 Si. No quierre el Dios que engaña el maga gente con otro para toma ventaja kanila. Ya promete le que hay quita le na tierra con aquellos quien ta continua man imbusterias. (Salmo 5:6) Si hay sucede ya se, hay cumpli tambien le con este promesa: “El maga labio que ta habla deverasan hay esta hasta para cuando.”—Proverbio 12:19.