Del Julio 2022, tiene maga grabe incidente de tiroteo que ya sucede na entero mundo:

•   “Bien rabiao el maga gente na Japan na matanza del bien conocido politico na diila nacion [el Prime Minister de antes que si Shinzo Abe] y ya sale espantao el entero mundo, especialmente cay nuay tanto ta sucede crimen na Japan y tiene este istricto ley acerca na usada de maga armas.”—Julio 10, 2022, The Japan Times.

•   “Na Denmark, tiene un gunman quien ya mata con el tres persona na un shopping mall na Copenhagen.”—Julio 4, 2022, Reuters.

•   “Na South Africa, 15 el muerto despues supla de tiro el cuanto maga hombre na un bar na Soweto.”—Julio 10, 2022, The Guardian.

•   “Mas de 220 el con quien ya tira y ya mata na maga incidente de tiroteo na U.S. durante el July 4 holiday weekend.”—Julio 5, 2022, CBS News.

 Tiene pa ba esperanza que termina este clase de violencia? Cosa ta habla el Biblia?

 El Biblia ya habla que el diaton tiempo amo el “ultimo maga dia” donde el maga gente hay queda mal clase, brutal y violente. (2 Timoteo 3:1, 3, El Nuevo Testamento na Chavacano) Por causa con ese, el maga gente ta vivi con miedo. (Lucas 21:11) Pero el Biblia ya promete que llega el tiempo hay termina el violencia y el “maga gente hay esta na lugar que tiene paz, na maga residencia que tiene seguridad y na maga lugar de descanzo que tranquilo.” (Isaias 32:18) Paquemodo hay termina el violencia?

 El Dios hay destroza con el todo maga malo y con el todo maga armas.

•   “Si acerca con el maga malo, hay quita kanila na tierra.”—Proverbio 2:22.

•   “Ta termina [el Dios] con el maga guerra na entero mundo. Ta hace le quebra con el pana y ta machaca con el lanza; ta quema le con el maga carro de militar.”—Salmo 46:9.

 Para gendeh mas tene violencia, el Dios hay enseña con el maga gente para vivi con paz.

•   “Gendeh sila causa maskin cosa peligro o destrozo na de mio sagrao monte, cay el tierra hay llena na saber de Jehova igual con el agua ta tapa con el mar.”—Isaias 11:9.

•   Maskin ahora, el Dios ta enseña con el maga gente na entero mundo que evita con el violencia y con el usada de maga armas, y “hace sila pilo de arrao con el diila maga espada y con el diila maga lanza hace sila sanggut.”—Miqueas 4:3.

 Para aprende pa mas acerca na promesa del Biblia que hay vivi kita na un mundo sin miedo, le con el articulo “Freedom From Fear—Is It Possible?”

 Para aprende pa mas acerca na permanente solucion na violencia, le con el articulo “Peace on Earth at Last!”