Del Lunes aga, Octubre 10, 2022, el maga missile de Russia ya tupa na maga ciudad de Ukraine. Yan balus el Russia cay dos dia antes este, ya hace rebenta el Ukraine con el puente que ta conecta con el Crimea y Russia, y yan damage este. Antes este sucede, el cuanto maga politico ya dale aviso que posible cerca ya sucede el Armagedon.

•   “Desde na tiempo de Kennedy [presidente de U.S.] y del Cuban Missile Crisis, este ya el tiempo que dol bien cerca ya sucede el Armagedon. . . . Para conmigo, si [usa] nuclear weapon, imposible que gendeh sucede el Armagedon.”—El presidente de U.S. que si Joe Biden, Octubre 6, 2022.

•   “Tan uyun yo que cerca ya kita experiencia con el Armagedon. Hay causa este peligro na entero mundo.”—El presidente de Ukraine que si Volodymyr Zelensky, cuando ya pregunta con ele acerca si cosa el maga resulta si usa maga nuclear weapon, BBC News, Octubre 8, 2022.

 Hay sucede ba el Armagedon si usa ya el maga nacion con el maga nuclear weapon? Cosa el Biblia ta habla?

 Gendeh. El palabra “Harmaguedon” o “Armagedon” puede lang mira una vez na Biblia na Revelacion 16:16. Gendeh este ta refiri na un guerra entre na maga nacion sino un guerra este entre con Dios y “con todo el maga rey na mundo.” (Revelacion 16:14, El Nuevo Testamento na Chavacano) Hay usa el Dios con el guerra de Armagedon para termina con el rulanza del maga gente.—Daniel 2:44.

 Para sabe pa mas acerca si cosa el efecto del Armagedon na tierra, le con el articulo Cosa el Guerra de Armagedon?

 Gendeh. Maskin pa posible usa el maga lider del nacion con el maga nuclear weapon na futuro, gendeh permiti el Dios que destroza el tierra. El Biblia ta habla:

•   “El tierra hay esta hasta para cuando.”—Eclesiastes 1:4.

•   “El maga recto hay hereda con el tierra y hay esta sila alli hasta para cuando.”—Salmo 37:29.

 Pero, el profecia na Biblia y el maga suceso ahora ta indica que cerca ya tene maga grande cambio na tierra. (Mateo 24:3-7; 2 Timoteo 3:1-5) Sabe si cosa ta habla el Biblia acerca na futuro por medio na un libre estudiada del Biblia.