El maga noticia ahora lleno de maga report acerca na maga mal palabra, crimen, violencia na otro maga raza y guerra por causa na rabia.

•   “Por causa na guerra na Israel y Gaza y na influencia del maga extremista, mas manada ya el ta hace sale el diila rabia na social media por medio na diila maga palabra.”—The New York Times, Noviembre 15, 2023.

•   “Desde Octubre 7, na entero mundo, bigla ya queda manada el crimen y mal palabra por causa na rabia.”—Dennis Francis, presidente del United Nations General Assembly, Noviembre 3, 2023.

 Gendeh mas nuevo el maga mal palabra, violencia y guerra por causa na rabia. Gane, ya menciona el Biblia acerca na maga gente de antes quien ya “asenta . . . con el diila maga duele palabra igual como maga pana” y ya suporta maga guerra y violencia. (Salmo 64:3; 120:7; 140:1) Pero, ta habla el Biblia que tiene importante razon si porque ansina de grabe el rabia que ta mira kita ahora.

 El Biblia ya menciona dos razon si porque comon ahora el rabia.

1.  1. Ya predicta este un tiempo cuando “el amor ay queda frio na mayor parte del maga gente.” (Mateo 24:12, El Nuevo Testamento na Chavacano) En vez de dale mira amor, el maga gente hay demonstra custumbre que hay causa para rabia kanila el otro.—2 Timoteo 3:1-5.

2.  2. Tiene grabe rabia na mundo ahora por causa na mal influencia de Satanas Diablo. El Biblia ya habla que “el entero mundo talli na poder del demonio.”—1 San Juan 5:19; Revelacion 12:9, 12.

 Pero, ya habla tambien el Biblia que gendeh mas tarda, hay quita el Dios con el todo causa del rabia. Mas pa, hay quita tambien le con el todo sufrimiento que ya causa este. El Biblia ya promete:

•   “Ay limpia [el Dios] el lagrimas na diila maga ojos y nunca mas ay tene muerte, ni dolor, ni tristeza, cay el mundo de antes ya acaba ya.”—Revelacion 21:4.